എറണാകുളം: സമൂഹമാധ്യമങ്ങളിൽ ‘തൊപ്പി’ എന്ന പേരിൽ അറിയപ്പെടുന്ന വിവാദ യൂട്യൂബർ നിഹാദിനും ഇയാളുടെ സംഘത്തിനുമെതിരെ കൊച്ചി സൈബർ പൊലീസ് അന്വേഷണം ആരംഭിച്ചു. പോക്സോ (POCSO), ലഹരിമരുന്ന് ഉപയോഗം, സോഷ്യൽ മീഡിയയിലൂടെയുള്ള അശ്ലീല പ്രചരണം തുടങ്ങിയ ഗുരുതരമായ കുറ്റകൃത്യങ്ങളിലാണ് അന്വേഷണം നടക്കുന്നത്. സംസ്ഥാന സൈബർ ഓപ്പറേഷൻസ് വിഭാഗം നൽകിയ പ്രത്യേക നിർദ്ദേശത്തിന്റെ അടിസ്ഥാനത്തിലാണ് കൊച്ചി പൊലീസ് കേസിൽ നടപടികൾ ശക്തമാക്കിയത്.
അഭിഭാഷകനായ ശ്രീജിത്ത് പെരുമന നൽകിയ ഔദ്യോഗിക പരാതിയുടെ അടിസ്ഥാനത്തിലാണ് തൊപ്പിക്കും സംഘത്തിനുമെതിരെ ഇപ്പോൾ അന്വേഷണം പ്രഖ്യാപിച്ചിരിക്കുന്നത്. ഇതിന് പുറമെ വിവിധ സോഷ്യൽ മീഡിയ പ്ലാറ്റ്ഫോമുകൾ വഴിയും ഇയാൾക്കെതിരെ വ്യാപകമായി പരാതികൾ ഉയർന്നിരുന്നു. പൊതുവേദികളിലും സമൂഹമാധ്യമങ്ങളിലും പരസ്യമായി അശ്ലീല പ്രദർശനം നടത്തുന്നതും, സ്ത്രീവിരുദ്ധ പരാമർശങ്ങൾ ഉന്നയിക്കുന്നതും, ക്രിമിനൽ കുറ്റങ്ങൾ വലിയ കാര്യമായി വിളിച്ചുപറയുന്നതും യാതൊരു കാരണവശാലും അംഗീകരിക്കാൻ കഴിയില്ലെന്ന് പരാതിക്കാരനായ ശ്രീജിത്ത് പെരുമന വ്യക്തമാക്കി.
കുട്ടികളെയും യുവാക്കളെയും തെറ്റായ വഴിയിലേക്ക് നയിക്കുന്ന രീതിയിലാണ് ഇയാളുടെ വീഡിയോകൾ എന്ന ആക്ഷേപം ശക്തമാണ്. യൂട്യൂബ് ചാനലുകൾ വഴിയും മറ്റ് സോഷ്യൽ മീഡിയ അക്കൗണ്ടുകൾ വഴിയും ഇവർ പങ്കുവെച്ച ഉള്ളടക്കങ്ങൾ സൈബർ പൊലീസ് വിശദമായി പരിശോധിച്ചുവരികയാണ്. വരും ദിവസങ്ങളിൽ ഇയാളെയും സംഘത്തെയും ചോദ്യം ചെയ്യാനായി വിളിച്ചുവരുത്തുമെന്നാണ് പൊലീസ് വൃത്തങ്ങളിൽ നിന്ന് ലഭിക്കുന്ന സൂചന.
