ജീമോൻ റാന്നി
ഡാളസ്: മാർത്തോമാ ചർച്ച് ഓഫ് ഡാളസ് (ഫാർമേഴ്സ് ബ്രാഞ്ച്) ഇടവകയുടെ സുവർണ്ണ ജൂബിലി ആഘോഷങ്ങളുടെ സമാപന സമ്മേളനം (Jubilee Finale) 2026 ജൂലൈ 31 വെള്ളിയാഴ്ച മുതൽ ഓഗസ്റ്റ് 2 ഞായറാഴ്ച വരെ വിവിധ പരിപാടികളോടെ നടത്തപ്പെടുന്നു. മാർത്തോമാ സഭയുടെ പരമാധ്യക്ഷൻ മോസ്റ്റ് റവ. ഡോ. തിയോഡോഷ്യസ് മാർത്തോമാ മെത്രാപ്പോലീത്ത സമാപന സമ്മേളനങ്ങളിൽ മുഖ്യാതിഥിയായി പങ്കെടുക്കും.
‘ക്രിസ്തു സഹയാത്രികർ’ (Sojourners with Christ)എന്ന ജൂബിലി പ്രമേയത്തെ മുൻനിർത്തി, ഈശ്വരകൃപയുടെയും ക്രിസ്തീയ സ്നേഹത്തിന്റെയും അമ്പതു വർഷങ്ങൾ പൂർത്തിയാക്കുമ്പോൾ, സഹജീവികളോട് കരുണയും ആർദ്രതയും കാണിക്കുക എന്ന വലിയ ദൗത്യമാണ് ഈ ജൂബിലി വർഷത്തിൽ ഇടവക ഏറ്റെടുത്തത്. ക്രിസ്തുവിന്റെ സ്നേഹം പ്രവൃത്തി പഥത്തിൽ എത്തിച്ചുകൊണ്ട് നിരവധി സാമൂഹിക, ജീവകാരുണ്യ, ആത്മീയ പദ്ധതികൾ ഇടവക പൂർത്തീകരിച്ചു:
* ഛത്തീസ്ഗഡ് ബസ്തർ മിഷൻ ഫീൽഡിലെ ചാപ്പൽ നിർമ്മാണം
* സുവിശേഷകരുടെ മക്കൾക്കുള്ള വിദ്യാഭ്യാസ സഹായം
* സ്നേഹതീരം ചാരിറ്റി സഹായം
* ഭിന്നശേഷിയുള്ള കുട്ടികൾക്കുള്ള പിന്തുണ പദ്ധതികൾ
* വൈദികവിദ്യാർത്ഥികൾക്കുള്ള വിദ്യാഭ്യാസ ധനസഹായം
* ‘കനവ്’ പദ്ധതിയിലൂടെ 3 ഭവനങ്ങളുടെ നിർമാണം
* ലോക്കൽ മിഷൻ പ്രവർത്തനങ്ങൾ
* റിവൈവൽ യോഗങ്ങൾ, സ്റ്റഡി ഫോറം
* ബൈബിൾ എഴുത്ത്
* ഭവന സന്ദർശനവും ജൂബിലി സമ്മാന വിതരണവും
* ജൂബിലി ഡിവൈൻ മെലഡീസ് ഗാനപുസ്തകം
* ജൂബിലി സൂവനീർ
* സഭാ ചരിത്ര ഡോക്യുമെന്ററി
* മ്യൂസിക് ആൽബം
* ജൂബിലി ചായ് റൺ (5K Run)
* സ്റ്റേജ് പ്രോഗ്രാം
* പിക്ക്ൾബോൾ ടൂർണമെന്റ്
സമാപന സമ്മേളന തീയതികളും സമയക്രമവും:
*ജൂലൈ 31 (വെള്ളിയാഴ്ച): വൈകുന്നേരം 6:00 ന് റിവൈവൽ നൈറ്റ് (Revival Night)
*ഓഗസ്റ്റ് 01 (ശനിയാഴ്ച): വൈകുന്നേരം 5:30 ന് പൊതുസമ്മേളനം (Public Meeting)
*ഓഗസ്റ്റ് 02 (ഞായറാഴ്ച): രാവിലെ 8:30 ന് ഡോ. തിയോഡോഷ്യസ് മാർത്തോമാ മെത്രാപ്പോലീത്തയുടെ മുഖ്യകാർമ്മികത്വത്തിൽ വിശുദ്ധ കുർബാന (Holy Communion – Malayalam)
ഇടവകജനങ്ങളുടെ നിർലോഭമായ പിന്തുണയോടെയും സ്നേഹമസൃണമായ പങ്കാളിത്തത്തോടെയും പ്രയാസങ്ങളനുഭവിക്കുന്ന അനേകം ജനങ്ങൾക്ക് ആശ്വാസവും സഹായവും എത്തിക്കാൻ ഈ ജൂബിലി വർഷത്തിൽ സാധിച്ചത് ദൈവത്തിന്റെ വലിയ നിയോഗവും കാരുണ്യവുമായി കാണുന്നുവെന്ന് ഇടവക വികാരി പ്രസ്താവിച്ചു.
വികാരി റവ. എബ്രഹാം വി. സാംസൺ, അസിസ്റ്റന്റ് വികാരി റവ. ജെസ്വിൻ ജോൺ, കൺവീനർമാരായ എബി തോമസ്, ക്രിസ്റ്റോ മേക്കാട്ടുകുളം എന്നിവരുടെ നേതൃത്വത്തിൽ വിവിധ കമ്മിറ്റികൾ പരിപാടിയുടെ വിജയകരമായ നടത്തിപ്പിനായി പ്രവർത്തിച്ചുവരുന്നു.
മൂന്ന് ദിവസങ്ങളിലായി നടക്കുന്ന ഈ അനുഗ്രഹീത ചടങ്ങുകളിൽ മറ്റ് മാർത്തോമാ ഇടവകകളിലെ വൈദികരും, ഡാളസിലെ സഹോദരീ സഭകളിലെ പട്ടക്കാരും, സാമൂഹിക-സാംസ്കാരിക നേതാക്കളും പങ്കെടുക്കും.
ഓഗസ്റ്റ് 01 ശനിയാഴ്ച വൈകുന്നേരം 5:30 ന് നടക്കുന്ന പൊതുസമ്മേളനത്തിലേക്ക് ജാതിമത ഭേദമെന്യേ ഏവരെയും സ്നേഹപൂർവ്വം സ്വാഗതം ചെയ്യുന്നതായി ഭാരവാഹികൾ അറിയിച്ചു.
