മോസ്കോ: യുക്രെയ്നിലെയും ഗൾഫ് മേഖലയിലെയും യുദ്ധങ്ങൾ പ്രധാന ചർച്ചാവിഷയമാക്കി റഷ്യൻ വിദേശകാര്യ മന്ത്രിയും അമേരിക്കൻ വിദേശകാര്യ സെക്രട്ടറിയും ഫിലിപ്പീൻസ് തലസ്ഥാനമായ മനിലയിൽ വെച്ച് കൂടിക്കാഴ്ച നടത്തും. തെക്കുകിഴക്കൻ ഏഷ്യൻ രാജ്യങ്ങളുടെ കൂട്ടായ്മയായ ആസിയാൻ വിദേശകാര്യ മന്ത്രിമാരുടെ ഉച്ചകോടിയുടെ ഭാഗമായി വ്യാഴാഴ്ച രാവിലെയാണ് നിർണായകമായ ഈ ചർച്ച നടക്കുക.
എന്തായാലും ഈ കൂടിക്കാഴ്ച പ്രയോജനകരമായിരിക്കുമെന്നും, ചോദ്യങ്ങൾ ചോദിക്കാനും അതിനുള്ള ഉത്തരങ്ങൾ നേടിയെടുക്കാനും ഇത് നല്ലൊരു അവസരമാണെന്നും റഷ്യൻ വിദേശകാര്യ മന്ത്രി സെർജി ലാവ്റോവ് വാർത്താ സമ്മേളനത്തിൽ പറഞ്ഞു. അതേസമയം, ഇറാനിൽ അടുത്തിടെ അമേരിക്ക നടത്തിയ ബോംബാക്രമണങ്ങളെയും സൈനിക നീക്കങ്ങളെയും മോസ്കോ ശക്തമായ ഭാഷയിൽ അപലപിച്ചിട്ടുണ്ട്.
