വാഷിംഗ്ടൺ: ഇറാനുമായുള്ള നയതന്ത്ര ചർച്ചകളെക്കുറിച്ചുള്ള വാർത്താ സമ്മേളനത്തിനിടയിൽ, തനിക്ക് പുതിയ ഔദ്യോഗിക പ്രതിരോധ വിമാനം സമ്മാനിച്ച ഖത്തർ അമീർ ഷെയ്ഖ് തമീം ബിൻ ഹമദ് അൽ ഥാനിയെ പ്രശംസിച്ച് യുഎസ് പ്രസിഡന്റ് ഡോണൾഡ് ട്രംപ്. അമേരിക്കൻ പ്രസിഡന്റുമാർ ഔദ്യോഗിക യാത്രകൾക്കായി ഉപയോഗിക്കുന്ന മുൻപത്തെ ‘എയർഫോഴ്സ് വൺ’ വിമാനത്തിന് 35 വർഷത്തോളം പഴക്കമുണ്ടായിരുന്നുവെന്ന് ട്രംപ് ചൂണ്ടിക്കാട്ടി.
“മികച്ചൊരു വ്യക്തിത്വത്തിന് ഉടമയായ അമീർ തമീം, അമേരിക്കയ്ക്കായി ഒരു സംഭാവന നൽകാൻ താൻ ആഗ്രഹിക്കുന്നുവെന്ന് നേരിട്ട് അറിയിക്കുകയായിരുന്നു,” എന്ന് ട്രംപ് മാധ്യമപ്രവർത്തകരോട് പറഞ്ഞു. ഖത്തർ അമീറിന്റെ ഈ നീക്കം തികച്ചും അഭിനന്ദനാർഹമാണെന്ന് വ്യക്തമാക്കിയ ട്രംപ്, വെറും അഞ്ച് മാസത്തിനുള്ളിൽ ഈ വിമാനത്തെ അമേരിക്കൻ പ്രസിഡന്റിന്റെ സുരക്ഷാ മാനദണ്ഡങ്ങൾക്കനുസൃതമായി മാറ്റിയെടുക്കാൻ സാധിച്ചതായും കൂട്ടിച്ചേർത്തു.
സുരക്ഷാ ക്രമീകരണങ്ങളുടെ കാര്യത്തിൽ ഈ വിമാനത്തിന് തുല്യമായി മറ്റൊന്നുമില്ലെന്നും, ഇത് കാണുമ്പോൾ എല്ലാവർക്കും അത്ഭുതം തോന്നുമെന്നും ട്രംപ് മാധ്യമങ്ങളോട് വ്യക്തമാക്കി. അന്താരാഷ്ട്ര തലത്തിൽ നിർണ്ണായകമായ പല മധ്യസ്ഥ ചർച്ചകൾക്കും നേതൃത്വം നൽകുന്ന ഖത്തറുമായി അമേരിക്ക പുലർത്തുന്ന അടുത്ത നയതന്ത്ര ബന്ധത്തിന്റെ തെളിവായിക്കൂടിയാണ് ഈ സംഭാവന വിലയിരുത്തപ്പെടുന്നത്.
