വാഷിംഗ്ടൺ: നിക്ഷേപകർക്ക് യുഎസ് ഗ്രീൻ കാർഡ് ലഭ്യമാക്കുന്ന പ്രമുഖ ഇമിഗ്രന്റ് ഇൻവെസ്റ്റർ പ്രോഗ്രാമായ ഇ.ബി-5 (EB-5) വിസ അപേക്ഷാ ഫീസുകൾ അമേരിക്കൻ പൗരത്വ-കുടിയേറ്റ സേവന വിഭാഗം (യു.എസ്.സി.ഐ.എസ്) കുത്തനെ വർദ്ധിപ്പിച്ചു. നവംബർ 30 മുതൽ പുതിയ നിരക്കുകൾ പ്രാബല്യത്തിൽ വരും. നിലവിലെ കുറഞ്ഞ നിരക്കിൽ അപേക്ഷ സമർപ്പിക്കാൻ തയ്യാറെടുക്കുന്ന നിക്ഷേപകർക്ക് നവംബർ 29 വരെ മാത്രമാണ് ഇനി അവസരമുള്ളത്. 2026 സെപ്റ്റംബർ 30-ന് പ്രസിദ്ധീകരിച്ച പുതിയ ഇ.ബി-5 ഫീസ് ചട്ടം, നിക്ഷേപത്തിലൂടെ ഗ്രീൻ കാർഡ് സ്വന്തമാക്കാനുള്ള ചെലവ് ഗണ്യമായി വർദ്ധിക്കുന്നതിന്റെ വ്യക്തമായ സൂചനയാണെന്ന് പ്രമുഖ ഇൻവെസ്റ്റ്‌മെന്റ് സ്ഥാപനമായ എൽ.സി.ആർ ക്യാപിറ്റൽ പാർട്‌‌ണേഴ്‌സ് സി.ഇ.ഒ ഷെർമാൻ ബാൾഡ്വിൻ വ്യക്തമാക്കി.
അപേക്ഷാ രേഖകൾ ഇതിനകം പൂർത്തിയാക്കിയ നിക്ഷേപകർക്ക് സമയം നിർണായകമാണെന്നും, നവംബർ 30-ന് മുമ്പ് അപേക്ഷിക്കുന്നതിലൂടെ നിലവിലെ കുറഞ്ഞ ഫീസ് ഘടന പ്രയോജനപ്പെടുത്താമെന്നും അദ്ദേഹം ചൂണ്ടിക്കാട്ടി. പ്രാഥമിക ഇ.ബി-5 പെറ്റീഷൻ ഫീസ് മാത്രം പുതിയ നിയമപ്രകാരം ഇരട്ടിയിലധികമായി വർദ്ധിക്കുമെന്നും ബാൾഡ്വിൻ കൂട്ടിച്ചേർത്തു. യു.എസ് ഡിപ്പാർട്ട്‌മെന്റ് ഓഫ് ഹോംലാൻഡ് സെക്യൂരിറ്റി (ഡി.എച്ച്.എസ്) ഫെഡറൽ രജിസ്റ്ററിൽ പ്രസിദ്ധീകരിച്ച ഉത്തരവ് 2026 നവംബർ 30 മുതലാണ് പ്രാബല്യത്തിൽ വരുന്നത്. അന്നേ ദിവസമോ അതിനുശേഷമോ തപാൽ മാർഗ്ഗം സമർപ്പിക്കുന്ന എല്ലാ അപേക്ഷകൾക്കും പുതിയ നിരക്കുകൾ ബാധകമായിരിക്കും.
റീജിയണൽ സെന്റർ വഴി ഫയൽ ചെയ്യുന്ന നിക്ഷേപകരുടെ പ്രാഥമിക ഫോം I-526E ഫീസ് നിലവിലെ 3,675 ഡോളറിൽ നിന്ന് 4,175 ഡോളർ വർദ്ധിച്ച് 7,850 ഡോളറായി ഉയരും. വ്യക്തിഗത നിക്ഷേപകരുടെ സ്റ്റാൻഡ്‌എലോൺ ഫോം I-526 ഫീസ് 3,675 ഡോളറിൽ നിന്ന് 7,615 ഡോളറാകും. രണ്ട് ഫോമുകളിലും 75 ഡോളർ ടെക്നോളജി ഫീസും ഉൾപ്പെടുത്തിയിട്ടുണ്ട്. ഇതിനുപുറമെ, ഗ്രീൻ കാർഡിലെ നിബന്ധനകൾ നീക്കം ചെയ്യാൻ സമർപ്പിക്കുന്ന ഫോം I-829 ഫീസ് 3,750 ഡോളറിൽ നിന്ന് 5,000 ഡോളറായും, I-526E ഫോമിനൊപ്പമുള്ള ഇ.ബി-5 ഇന്റഗ്രിറ്റി ഫണ്ട് ഫീസ് 1,000 ഡോളറിൽ നിന്ന് 1,100 ഡോളറായും ഉയരും.
ഇ.ബി-5 പദ്ധതി നടത്തിപ്പിന്റെ യഥാർത്ഥ ചെലവുകൾക്ക് അനുസൃതമായി വരുമാനം കണ്ടെത്തുന്നതിനാണ് ഫീസ് വർദ്ധനവെന്ന് യു.എസ്.സി.ഐ.എസ് വ്യക്തമാക്കി. പദ്ധതിക്ക് പ്രതിവർഷം ശരാശരി 105 ദശലക്ഷം ഡോളർ പ്രവർത്തനച്ചെലവ് വരുമ്പോൾ നിലവിലെ ഫീസ് ഘടനയിലൂടെ 56.6 ദശലക്ഷം ഡോളർ മാത്രമാണ് ലഭിക്കുന്നത്. നിലവിലുള്ള ഒൻപത് ഇ.ബി-5 ഫോമുകളിലായി ശരാശരി 70.7 ശതമാനം വർദ്ധനവാണ് വരുത്തിയിരിക്കുന്നത്. ഈ മാറ്റം പ്രതിവർഷം സമർപ്പിക്കപ്പെടുന്ന ഏകദേശം 16,600 ഇ.ബി-5 അപേക്ഷകളെ നേരിട്ട് ബാധിക്കുമെന്നാണ് ഡി.എച്ച്.എസിന്റെ കണക്കുകൂട്ടൽ.
