മയാമി: 2026-ലെ അറ്റ്ലാന്റിക് സീസണിലെ ആദ്യ ചുഴലിക്കാറ്റായ ‘ഇസൈയാസ്’ (Isaias) കൂടുതൽ ശക്തിപ്രാപിച്ച് കാറ്റഗറി 3 വിഭാഗത്തിൽപ്പെട്ട വലിയ ചുഴലിക്കാറ്റായി മാറി. വെള്ളിയാഴ്ച രാവിലെയോടെയാണ് ഇത് കൂടുതൽ ശക്തമായത്. മിസിസിപ്പി, അലബാമ, ഫ്ലോറിഡ പാൻഹാൻഡിലിന്റെ പടിഞ്ഞാറൻ ഭാഗങ്ങൾ എന്നിവ ലക്ഷ്യമാക്കി നീങ്ങുന്ന കാറ്റ് ഇന്ന് (അമേരിക്കൻ സമയം)
വൈകുന്നേരത്തോടെ വടക്കൻ ഗൾഫ് തീരത്ത് കരയിലെത്തുമെന്നാണ് നാഷണൽ ഹറികെയ്ൻ സെന്റർ അറിയിക്കുന്നത്.
അടിയന്തര തയ്യാറെടുപ്പുകൾ ഉടൻ പൂർത്തിയാക്കണമെന്നും ഇന്ന് കാലാവസ്ഥ പെട്ടെന്ന് വഷളാകുമെന്നും അധികൃതർ മുന്നറിയിപ്പ് നൽകി. മണിക്കൂറിൽ 120 മൈൽ വേഗതയിൽ ആഞ്ഞടിക്കുന്ന ഇസൈയാസ് വളരെ വേഗത്തിലാണ് ശക്തിപ്രാപിച്ചത്. ഫ്ലോറിഡ പാൻഹാൻഡിൽ, അലബാമ തീരങ്ങളിൽ ജീവന് വരെ ഭീഷണിയായേക്കാവുന്ന ഉയർന്ന തിരമാലകളും (സ്റ്റോം സർജ്) ശക്തമായ കാറ്റും ഉണ്ടാകാൻ സാധ്യതയുണ്ടെന്ന് കേന്ദ്രം വ്യക്തമാക്കുന്നു. കരയിലേക്ക് പ്രവേശിക്കുമ്പോഴും കാറ്റിന്റെ തീവ്രത കുറയില്ലെന്നാണ് വിലയിരുത്തൽ.
നാഷണൽ ഹറികെയ്ൻ സെന്ററിന്റെ കണക്കുകൾ പ്രകാരം മിസിസിപ്പി നദിയുടെ മുഖത്തിന് ഏകദേശം 145 മൈൽ തെക്ക്-തെക്കുകിഴക്കായി സ്ഥിതി ചെയ്യുന്ന കാറ്റ് മണിക്കൂറിൽ 16 മൈൽ വേഗതയിലാണ് വടക്ക്-വടക്കുകിഴക്കോട്ട് നീങ്ങുന്നത്. ചുഴലിക്കാറ്റിന്റെ കേന്ദ്രഭാഗത്തുനിന്ന് 35 മൈൽ ചുറ്റളവിൽ ശക്തമായ ഹറികെയ്ൻ കാറ്റും, 205 മൈൽ ദൂരത്തിൽ ട്രോപ്പിക്കൽ കൊടുങ്കാറ്റിന്റെ വേഗതയുള്ള കാറ്റും വീശിയടിക്കുന്നുണ്ട്. മിസിസിപ്പിയിലെ ഓഷ്യൻ സ്പ്രിങ്സ് മുതൽ ഫ്ലോറിഡയിലെ ബേ/ഗൾഫ് കൗണ്ടി അതിർത്തി വരെയുള്ള തീരപ്രദേശങ്ങളിൽ ഹറികെയ്ൻ വാണിങ് നിലവിലുണ്ട്.
അപകടകരമായ തിരമാലകളും വേലിയേറ്റവും കാരണം തീരപ്രദേശങ്ങളിൽ വെള്ളപ്പൊക്കത്തിന് സാധ്യതയുണ്ട്. അലബാമ-ഫ്ലോറിഡ അതിർത്തി മുതൽ ഗ്രേട്ടൺ ബീച്ച് വരെയുള്ള പ്രദേശങ്ങളിൽ 9 അടി വരെ ഉയർന്ന തിരമാലകൾ ഉണ്ടാകാൻ ഇടയുണ്ട്. ഫ്ലോറിഡ പാൻഹാൻഡിലിന്റെ മറ്റ് ഭാഗങ്ങളിൽ 6 അടി വരെ ഉയരത്തിൽ വെള്ളം കയറിയേക്കാം. തീരത്തുനിന്ന് 100 മൈൽ അകലെയുള്ള തെക്കൻ അലബാമയുടെ ഉൾപ്രദേശങ്ങളിലേക്ക് വരെ ചുഴലിക്കാറ്റിന്റെ വേഗതയിലുള്ള കാറ്റ് വീശിയടിക്കുമെന്നും കാലാവസ്ഥാ നിരീക്ഷകർ മുന്നറിയിപ്പ് നൽകിയിട്ടുണ്ട്.
