പെൻസിൽവാനിയ : അമേരിക്കയിൽ ഏറ്റവും വലിയ അഞ്ചാംപനി വ്യാപനത്തിന് സാക്ഷ്യം വഹിക്കുന്ന പെൻസിൽവാനിയയിൽ രോഗബാധ മൂലം അഞ്ചാമതൊരു മരണം കൂടി സ്ഥിരീകരിച്ചു. വാക്സിൻ സ്വീകരിക്കാത്ത ലാൻകാസ്റ്റർ കൗണ്ടി സ്വദേശിയാണ് വൈറസ് ബാധയെ തുടർന്ന് മരിച്ചതെന്ന് പെൻസിൽവാനിയ ആരോഗ്യ വകുപ്പ് ബുധനാഴ്ച വ്യക്തമാക്കി. രോഗിയെക്കുറിച്ചുള്ള മറ്റ് വിവരങ്ങൾ അധികൃതർ പുറത്തുവിട്ടിട്ടില്ല.
ബുധനാഴ്ച വരെയുള്ള കണക്കുകൾ പ്രകാരം ഈ വർഷം സംസ്ഥാനത്ത് 39 കൗണ്ടികളിലായി ആകെ 943 പേർക്കാണ് രോഗബാധ സ്ഥിരീകരിച്ചിട്ടുള്ളത്. തിങ്കളാഴ്ച ഇത് 903 ആയിരുന്നു. കഴിഞ്ഞ ഒക്ടോബറിൽ തുടങ്ങി ഈ വർഷം ഏപ്രിൽ വരെ നീണ്ടുനിന്ന സൗത്ത് കരോലിനയിലെ രോഗവ്യാപനത്തിൽ 997 കേസുകളാണ് സ്ഥിരീകരിച്ചിരുന്നത്. പെൻസിൽവാനിയയിലെ കണക്കുകൾ ഇതിലേക്ക് അടുത്തു കൊണ്ടിരിക്കുകയാണ്.
പെൻസിൽവാനിയയിലുണ്ടായ പുതിയ മരണത്തിൽ അഗാധമായ ദുഃഖം രേഖപ്പെടുത്തുന്നതായി യു.എസ് ആരോഗ്യ-മാനവ സേവന വകുപ്പ് വക്താവ് എമിലി ഹിലിയാർഡ് പ്രസ്താവനയിൽ അറിയിച്ചു. രോഗബാധ നിയന്ത്രിക്കാൻ സഹായിക്കുന്നതിനായി രോഗവ്യാപന വിദഗ്ദ്ധരെ അയക്കാൻ യു.എസ് സെന്റർസ് ഫോർ ഡിസീസ്‌ കൺട്രോൾ ആൻഡ് പ്രിവൻഷൻ (സി.ഡി.സി) സന്നദ്ധമാണെന്നും, എന്നാൽ സംസ്ഥാനത്തിന്റെ ഭാഗത്തുനിന്ന് ഔദ്യോഗികമായി സഹായം തേടിയിട്ടില്ലെന്നും അവർ വ്യക്തമാക്കി.
2026-ൽ സി.ഡി.സിയുടെ ദേശീയ കണക്കുകളിൽ രണ്ട് അഞ്ചാംപനി മരണങ്ങൾ മാത്രമാണ് ഉൾപ്പെടുത്തിയിരിക്കുന്നത്. മരണ സർട്ടിഫിക്കറ്റുകളിൽ അഞ്ചാംപനിയാണ് മരണകാരണമായി മുഖ്യമായി രേഖപ്പെടുത്തിയിട്ടുള്ളവയെ മാത്രമാണ് നിലവിൽ സി.ഡി.സി കണക്കാക്കുന്നത് എന്നതാണ് ഇതിന് കാരണം. സംസ്ഥാനങ്ങൾ നൽകുന്ന കണക്കുകൾ പൂർണ്ണമായി ഇവർ ഉൾപ്പെടുത്താറില്ലെന്ന് വാഷിംഗ്ടൺ പോസ്റ്റ് വിശദീകരിക്കുന്നു.
പെൻസിൽവാനിയയിലെ സാഹചര്യം രാജ്യവ്യാപകമായുള്ള വലിയൊരു പ്രതിസന്ധിയുടെ ഭാഗം മാത്രമാണ്. സെപ്റ്റംബർ 24 വരെയുള്ള കണക്കുകൾ പ്രകാരം 45 സംസ്ഥാനങ്ങളിലും വാഷിംഗ്ടൺ ഡി.സിയിലുമായി ആകെ 3,659 അഞ്ചാംപനി കേസുകളാണ് രാജ്യത്ത് സ്ഥിരീകരിച്ചിട്ടുള്ളത്.
കഴിഞ്ഞ വർഷം ആകെ റിപ്പോർട്ട് ചെയ്ത 2,289 കേസുകളെ അപേക്ഷിച്ച് ഇത് വളരെ കൂടുതലാണ്. കഴിഞ്ഞ 35 വർഷത്തിനിടയിലെ ഏറ്റവും ഉയർന്ന വാർഷിക കണക്കാണിത്. എന്നാൽ അഞ്ചാംപനി ബാധിച്ച പലരും വൈദ്യസഹായം തേടാറില്ലാത്തതിനാൽ യഥാർത്ഥ രോഗികളുടെ എണ്ണം ഇതിലും എത്രയോ അധികമായിരിക്കുമെന്ന് പൊതുാരോഗ്യ വിദഗ്ദ്ധർ മുന്നറിയിപ്പ് നൽകുന്നു.
