മേരിലാൻഡ്: മേരിലാൻഡ് സംസ്ഥാനത്ത് പ്രായപൂർത്തിയാകാത്ത കുറ്റവാളികൾക്ക് ആശ്വാസകരമായ ‘യൂത്ത് ചാർജിംഗ് റീഫോം ആക്ട്’ വ്യാഴാഴ്ച പ്രാബല്യത്തിൽ വന്നു. പ്രായപൂർത്തിയാകാത്തവർ ഉൾപ്പെടുന്ന ചില ക്രിമിനൽ കേസുകൾ നേരിട്ട് മുതിർന്നവരുടെ കോടതികളിൽ വിചാരണ ചെയ്യുന്നതിന് പകരം ഇനി മുതൽ ജുവനൈൽ കോടതികളിൽ തന്നെ വിചാരണ ആരംഭിക്കാൻ അനുമതി നൽകുന്നതാണ് പുതിയ നിയമം. അതേസമയം, പൊതുസുരക്ഷയും കുറ്റവാളികളുടെ പുനരധിവാസവും തമ്മിലുള്ള സന്തുലിതാവസ്ഥയെക്കുറിച്ച് സംസ്ഥാനത്ത് വലിയ രീതിയിലുള്ള വാഗ്വാദങ്ങൾക്ക് ഈ നിയമം വഴിതുറന്നിട്ടുണ്ട്.
കവർച്ച, ഒന്നാം ഘട്ട ആക്രമണശ്രമം, ആയുധങ്ങളും മയക്കുമരുന്നുമായി ബന്ധപ്പെട്ട കേസുകൾ എന്നിവയിലാണ് വിചാരണ ജുവനൈൽ കോടതിയിലേക്ക് മാറ്റുന്നത്. കുറ്റവാളികളായ യുവാക്കൾക്ക് വേഗത്തിൽ വിദ്യാഭ്യാസവും മാനസിക പുനരധിവാസ സൗകര്യങ്ങളും ലഭ്യമാക്കാനും അവർ വീണ്ടും കുറ്റകൃത്യങ്ങളിൽ ഏർപ്പെടുന്നത് തടയാനുമാണ് ഈ മാറ്റമെന്ന് ബില്ലിന്റെ പ്രയോക്താവായ സ്റ്റേറ്റ് സെനറ്റർ വിൽ സ്മിത്ത് വ്യക്തമാക്കി. കേസ് മുതിർന്നവരുടെ കോടതിയിൽ ദീർഘകാലം കെട്ടിക്കിടക്കുന്നത് ശിക്ഷാനടപടികൾ വൈകിപ്പിക്കാൻ മാത്രമേ ഉപകരിക്കൂ എന്ന് ഗവർണറുടെ ഓഫീസും പിന്തുണയറിയിച്ചു. എന്നാൽ കൊലപാതകം, ബലാത്സംഗം, കാർ തട്ടിയെടുക്കൽ തുടങ്ങിയ ഗുരുതര കുറ്റകൃത്യങ്ങൾ മുതിർന്നവരുടെ കോടതിയിൽ തന്നെ തുടരും.
അതേസമയം, പ്രായപൂർത്തിയാകാത്തവരുടെ അതിക്രമങ്ങൾക്ക് ഇരയായ കുടുംബങ്ങൾ പുതിയ നിയമത്തിനെതിരെ ശക്തമായി രംഗത്തെത്തിയിട്ടുണ്ട്. മോഷ്ടിച്ച കാറുമായി വന്ന് മൂന്ന് വയസ്സുകാരിയായ മകളെ ഇടിച്ചുകൊന്ന 14-കാരന് ജുവനൈൽ കോടതിയിലൂടെ സാധാരണ ജീവിതത്തിലേക്ക് മടങ്ങാൻ അവസരം ലഭിച്ചത് ചൂണ്ടിക്കാട്ടി ഇരയുടെ മാതാവ് നൈജാഡ ബില്ലി നിയമത്തിനെതിരെ പ്രതിഷേധം രേഖപ്പെടുത്തി. ഇരകൾക്ക് നീതി നിഷേധിക്കുകയും കുറ്റവാളികൾക്ക് വീണ്ടും വീണ്ടും അവസരങ്ങൾ നൽകുകയും ചെയ്യുന്നതാണ് ഈ നിയമമെന്നാണ് എതിർക്കുന്നവരുടെ പ്രധാന വിമർശനം.
