കണ്ണൂര്‍: ജില്ലാ സെന്ററില്‍ പോലും പ്രവര്‍ത്തിക്കാന്‍ സമ്മതിക്കുന്നില്ലെന്ന പരാതി സിപിഎം കേന്ദ്ര നേതൃത്വത്തിന് കത്തയച്ച് മുന്‍ കണ്ണൂര്‍ ജില്ലാ പഞ്ചായത്ത് പ്രസിഡന്റായിരുന്ന പി.പി ദിവ്യ.തനിക്കെതിരായ പാര്‍ട്ടി നടപടി പുന:പരിശോധിക്കണമെന്നും സിപിഎം കേന്ദ്രനേതൃത്വത്തിന് അയച്ച കത്തില്‍ ദിവ്യ ആവശ്യപ്പെട്ടു. ജനാധിപത്യ മഹിളാ അസോസിയേഷന്‍ ഭാരവാഹിത്വത്തില്‍ നിന്നും മാറ്റിയതിനെതിരെയും കത്തില്‍ പരമര്‍ശിക്കുന്നുണ്ട്.
സംസ്ഥാന ജോയിന്റ് സെക്രട്ടറി സ്ഥാനത്ത് നിന്ന് നീക്കിയതിന് പിന്നാലെ ജില്ലാ സെന്ററില്‍ പോലും പ്രവര്‍ത്തിക്കാന്‍ അനുവദിക്കുന്നില്ല. ജില്ലാ സെന്ററിലെ പ്രവര്‍ത്തനത്തില്‍ നിന്ന് മാറ്റിയത് ജില്ലാ സെക്രട്ടറി പി കെ ശ്യാമള ആണെന്നും കത്തില്‍ പറയുന്നു. ഇക്കാര്യങ്ങളിലെല്ലാം പുന:പരിശോധന വേണമെന്നാണ് പി പി ദിവ്യയുടെ ആവശ്യം.
പാര്‍ട്ടിയിലേക്കുള്ള തന്റെ തിരിച്ചുവരവ് ചില നേതാക്കള്‍ തടയുന്നുവെന്ന ആരോപണവും ദിവ്യ മുന്നോട്ടു വെയ്ക്കുന്നു ജനാധിപത്യ മഹിളാ അസോസിയേഷന്‍ ഭാരവാഹിത്വത്തില്‍ നിന്നും മാറ്റിയത് പ്രതികാരമെന്നാണ് ആരോപണം. സംസ്ഥാന ജോയിന്റ് സെക്രട്ടറി സ്ഥാനത്ത് നിന്നും ജില്ലാ സെന്ററില്‍ നിന്നും നീക്കി. സിപിഎം ജില്ലാ നേതൃത്വം പോലും അറിയാതെയാണ് ഇക്കാര്യം നടത്തിയതെന്നും പുനഃപരിശോധന വേണമെന്നും ആവശ്യമുണ്ട്.
കത്ത് ലഭിച്ചുവെന്നും വിഷയം ചര്‍ച്ച ചെയ്യാമെന്നും സിപിഎം ജനറല്‍ സെക്രട്ടറി എംഎ ബേബി അറിയിച്ചു. പിപി ദിവ്യയുമായി ഫോണില്‍ സംസാരിച്ചെന്നും അദ്ദേഹം പറഞ്ഞു. വിപുലീകൃത ജില്ലാ കമ്മിറ്റിക്ക് തൊട്ട് മുമ്പാണ് ദിവ്യ കേന്ദ്രനേതൃത്വത്തിന് കത്ത് അയച്ചത്. നവീന്‍ ബാബുവിന്റെ മരണത്തിന് പിന്നാലെയാണ് പി പി ദിവ്യയെ കണ്ണൂര്‍ ജില്ലാ കമ്മിറ്റിയില്‍ നിന്ന് ഇരിണാവ് ബ്രാഞ്ചിലേക്ക് തരം താഴ്ത്തിയത്.
Not even allowed to function at the district centre: P.P. Divya sends letter to CPM central leadership
