ഡോ. ജോര്‍ജ് എം. കാക്കനാട്
ഹ്യൂസ്റ്റണ്‍: 2030-ല്‍ ആഘോഷിക്കാനിരിക്കുന്ന മലങ്കര കത്തോലിക്കാ സഭയുടെ ചരിത്രപ്രധാനമായ പുനരൈക്യ ശതാബ്ദിയുടെ മുന്നോടിയായി, സഭ ഈ വര്‍ഷം കാരുണ്യത്തിന്റെയും നീതിയുടെയും വര്‍ഷമായി ആചരിക്കുന്നു. ഹ്യൂസ്റ്റണിലെ സെന്റ് പീറ്റേഴ്സ് മലങ്കര കത്തോലിക്കാ ദേവാലയത്തില്‍ നടന്ന ചടങ്ങില്‍ അഭിവന്ദ്യ ജോഷ്വാ മാര്‍ ഇഗ്‌നാത്തിയോസ് മെത്രാപ്പോലീത്ത വര്‍ഷാചരണത്തിന്റെ ഉദ്ഘാടനം നിര്‍വഹിക്കുകയും വിശുദ്ധ കുര്‍ബാന അര്‍പ്പിക്കുകയും ചെയ്തു. സ്‌നേഹം, കാരുണ്യം, നീതി, ദരിദ്രരോടുള്ള കരുതല്‍ എന്നിവ സുവിശേഷത്തിന്റെ അടിസ്ഥാന മൂല്യങ്ങളായി ജീവിതത്തില്‍ പ്രാവര്‍ത്തികമാക്കണമെന്ന് അദ്ദേഹം വിശ്വാസികളോട് ആഹ്വാനം ചെയ്തു.
ദൈവവചനം മാംസമായി നമ്മുടെ ഇടയില്‍ വസിച്ചു എന്ന സത്യത്തെ അനുസ്മരിച്ചുകൊണ്ട്, ദൈവവചനം കേള്‍ക്കുന്നതില്‍ മാത്രം ഒതുങ്ങാതെ അതനുസരിച്ച് ജീവിക്കേണ്ടതിന്റെ പ്രാധാന്യം ബിഷപ്പ് തന്റെ വചനസന്ദേശത്തില്‍ എടുത്തുപറഞ്ഞു. ”നിത്യജീവന്‍ അവകാശമാക്കാന്‍ ഞാന്‍ എന്തുചെയ്യണം?” എന്നും ”എന്റെ അയല്‍ക്കാരന്‍ ആരാണ്?” എന്നും സുവിശേഷം ഉയര്‍ത്തുന്ന ചോദ്യങ്ങളെക്കുറിച്ച് അദ്ദേഹം വിശ്വാസികളെ ചിന്തിപ്പിച്ചു. നല്ല സമരിയാക്കാരന്റെ ഉപമയിലൂടെ യേശു നല്‍കുന്ന സന്ദേശവും ”നീയും പോയി അതുപോലെ ചെയ്യുക” എന്ന അവിടുത്തെ ആഹ്വാനവും ക്രൈസ്തവ ജീവിതത്തിന്റെ മാര്‍ഗദര്‍ശനമാണെന്ന് അദ്ദേഹം ഓര്‍മിപ്പിച്ചു.
മത്തായി 25:40-ല്‍ യേശു അരുളിച്ചെയ്യുന്ന വചനവും ബിഷപ്പ് ഉദ്ധരിച്ചു: ”എന്റെ ഏറ്റവും എളിയ ഈ സഹോദരന്മാരില്‍ ഒരുവന് നിങ്ങള്‍ ഇതു ചെയ്തുകൊടുത്തപ്പോള്‍ എനിക്കുതന്നെയാണ് ചെയ്തുതന്നത്.” കാരുണ്യം സ്വന്തം കുടുംബത്തില്‍നിന്ന് ആരംഭിക്കേണ്ടതാണെങ്കിലും അത് സമൂഹത്തിലേക്കും ദരിദ്രരിലേക്കും അവഗണിക്കപ്പെട്ടവരിലേക്കും വ്യാപിക്കണമെന്നും അദ്ദേഹം വ്യക്തമാക്കി. ആവശ്യത്തിലിരിക്കുന്നവരെ സഹായിക്കുന്നതോടൊപ്പം ദരിദ്രരുടെ അന്തസ്സും അവകാശങ്ങളും സംരക്ഷിക്കുകയും നീതിപൂര്‍ണവും കരുണനിറഞ്ഞതുമായ ഒരു സമൂഹം കെട്ടിപ്പടുക്കാന്‍ പരിശ്രമിക്കുകയും വേണം. കുടുംബങ്ങളിലും ഇടവകകളിലും സമൂഹത്തിലും ഈ മൂല്യങ്ങള്‍ പ്രാവര്‍ത്തികമാക്കേണ്ടത് ഓരോ വിശ്വാസിയുടെയും ഉത്തരവാദിത്വമാണ്.
ചടങ്ങിന്റെ ഭാഗമായി, ഇടവകയുടെ എക്‌സിക്യൂട്ടീവ് കമ്മിറ്റി അംഗങ്ങളും പാസ്റ്ററല്‍ കൗണ്‍സില്‍ അംഗങ്ങളും ചേര്‍ന്ന് അഭിവന്ദ്യ ജോഷ്വാ മാര്‍ ഇഗ്‌നാത്തിയോസ് മെത്രാപ്പോലീത്തയെ പൊന്നാട അണിയിച്ച് ആദരിച്ചു. ഇടവക വികാരി ഫാ. ബിന്നി ഫിലിപ്പിന്റെ നേതൃത്വത്തില്‍ പാരിഷ് കൗണ്‍സിലാണ് ഇന്നത്തെ പരിപാടി ക്രമീകരിച്ചത്.
ആര്‍ച്ച് ബിഷപ്പ് ബനഡിക്ട് മാര്‍ ഗ്രിഗോറിയോസിന്റെ സ്മരണയില്‍
പരിപാടിയുടെ ഭാഗമായി മലങ്കര കത്തോലിക്കാ സഭയുടെ രണ്ടാമത്തെ മെത്രാപ്പോലീത്തയായിരുന്ന ആര്‍ച്ച് ബിഷപ്പ് ബനഡിക്ട് മാര്‍ ഗ്രിഗോറിയോസിന്റെ ദീപ്തമായ ജീവിതവും സേവനങ്ങളും അനുസ്മരിച്ചു. അദ്ദേഹത്തിന്റെ 32-ാം ചരമവാര്‍ഷികത്തോടനുബന്ധിച്ച് ബിഷപ്പ് ജോഷ്വാ മാര്‍ ഇഗ്‌നാത്തിയോസ്, അദ്ദേഹത്തിന്റെ പൗരോഹിത്യ വിളിയെക്കുറിച്ചും കത്തോലിക്കാ സഭയോടുള്ള അചഞ്ചലമായ പ്രതിബദ്ധതയെക്കുറിച്ചും മനുഷ്യസേവനത്തിനായി അദ്ദേഹം നടത്തിയ സമര്‍പ്പിത പ്രവര്‍ത്തനങ്ങളെക്കുറിച്ചും അനുസ്മരണ സന്ദേശം നല്‍കി.
”പാവപ്പെട്ടവരുടെ തിരുമേനി” എന്ന പേരില്‍ സ്‌നേഹാദരങ്ങളോടെ അറിയപ്പെട്ടിരുന്ന ബനഡിക്ട് മാര്‍ ഗ്രിഗോറിയോസ് 41 വര്‍ഷക്കാലം സഭയ്ക്കായി സമര്‍പ്പിത സേവനം അനുഷ്ഠിച്ചു. സാമ്പത്തികശാസ്ത്രത്തിലും കൃഷിയിലും ഉണ്ടായിരുന്ന അറിവ് സാധാരണക്കാരുടെ ജീവിതനിലവാരം ഉയര്‍ത്തുന്നതിനായി അദ്ദേഹം പ്രയോജനപ്പെടുത്തി. മെച്ചപ്പെട്ടൊരു സമൂഹത്തിന്റെ നിര്‍മാണത്തിന് വിദ്യാഭ്യാസം അനിവാര്യമാണെന്ന് തിരിച്ചറിഞ്ഞ അദ്ദേഹം പാര്‍ശ്വവല്‍ക്കരിക്കപ്പെട്ടവരുടെ ഉന്നമനത്തിനായി പ്രവര്‍ത്തിച്ചു.
കുഷ്ഠരോഗബാധിതര്‍ക്കായുള്ള സേവനസംരംഭങ്ങളും പരിചരണവും പിന്തുണയും ആവശ്യമായവര്‍ക്കായി ചെഷയര്‍ ഹോം പോലുള്ള സ്ഥാപനങ്ങളുമായി ബന്ധപ്പെട്ട പ്രവര്‍ത്തനങ്ങളും അദ്ദേഹത്തിന്റെ പാവങ്ങളോടുള്ള കരുതലിന്റെ ഉദാഹരണങ്ങളായിരുന്നു.
സഭയുടെ അതിരുകള്‍ക്കപ്പുറത്തേക്കും വ്യാപിച്ച അദ്ദേഹത്തിന്റെ സ്‌നേഹവും കരുതലും എല്ലാ മനുഷ്യരെയും ഒരേ കുടുംബത്തിലെ അംഗങ്ങളായി കാണുന്ന വിശാലമായ കാഴ്ചപ്പാടില്‍ അധിഷ്ഠിതമായിരുന്നു. ഇന്ത്യയുടെ വിവിധ ഭാഗങ്ങളിലും വിദേശരാജ്യങ്ങളിലും, അമേരിക്കയുള്‍പ്പെടെ, മലങ്കര കത്തോലിക്കാ സഭയുടെ വളര്‍ച്ചയ്ക്കും വ്യാപനത്തിനും അദ്ദേഹം നല്‍കിയ സംഭാവനകള്‍ വിലപ്പെട്ടതാണ്. അഞ്ച് മാര്‍പാപ്പമാരുടെയും അഞ്ച് ഇന്ത്യന്‍ രാഷ്ട്രപതിമാരുടെയും കാലഘട്ടങ്ങളില്‍ സഭയ്ക്കും സമൂഹത്തിനും വേണ്ടി അദ്ദേഹം സേവനം അനുഷ്ഠിച്ചതും അദ്ദേഹത്തിന്റെ ദീര്‍ഘമായ പൊതുസേവനജീവിതത്തിന്റെ പ്രത്യേകതയാണ്
മാര്‍ ഇവാനിയോസിന്റെ ദര്‍ശനവും ധീരമായ നേതൃത്വവും
മലങ്കര കത്തോലിക്കാ സഭയുടെ ചരിത്രത്തില്‍ നിര്‍ണായക പങ്കുവഹിച്ച ആര്‍ച്ച് ബിഷപ്പ് മാര്‍ ഇവാനിയോസിന്റെ ധീരമായ നേതൃത്വത്തെയും പ്രവാചകദര്‍ശനത്തെയും ബിഷപ്പ് ജോഷ്വാ മാര്‍ ഇഗ്‌നാത്തിയോസ് അനുസ്മരിച്ചു. മാര്‍ ഇവാനിയോസിന്റെ ഉറച്ച വിശ്വാസവും ദീര്‍ഘവീക്ഷണവും സഭയുടെ വളര്‍ച്ചയ്ക്കും ദൗത്യനിര്‍വഹണത്തിനും നല്‍കിയ സംഭാവനകള്‍ അദ്ദേഹം എടുത്തുപറഞ്ഞു.
മാര്‍ ഇവാനിയോസിന്റെയും ബനഡിക്ട് മാര്‍ ഗ്രിഗോറിയോസിന്റെയും ജീവിതങ്ങള്‍ വിശ്വാസം, ത്യാഗം, കാരുണ്യം, നീതി, പാവപ്പെട്ടവരോടുള്ള ഐക്യദാര്‍ഢ്യം എന്നിവയുടെ ഉജ്ജ്വല സാക്ഷ്യങ്ങളാണ്. അവരുടെ ജീവിതവും സേവനങ്ങളും പുതിയ തലമുറകള്‍ക്ക് പ്രചോദനവും മാര്‍ഗദര്‍ശനവുമാണ്.
ശതാബ്ദി ആഘോഷം ഒരു പുതിയ ദൗത്യമായി മാറണം
2030-ലെ പുനരൈക്യ ശതാബ്ദിയിലേക്ക് മലങ്കര കത്തോലിക്കാ സഭ മുന്നേറുമ്പോള്‍, കാരുണ്യത്തിന്റെയും നീതിയുടെയും ഈ വര്‍ഷം സഭയുടെ സ്ഥാപകപിതാക്കന്മാരുടെയും സമര്‍പ്പിത ഇടയന്മാരുടെയും ആത്മീയദര്‍ശനം പുതുക്കി ഏറ്റെടുക്കാനുള്ള സുവര്‍ണാവസരമാണ്.
ശതാബ്ദി ആഘോഷം ചരിത്രത്തെ അനുസ്മരിക്കുന്ന ഒരു ചടങ്ങില്‍ മാത്രം ഒതുങ്ങരുത്. മറിച്ച്, ക്രിസ്തു ഏല്‍പ്പിച്ച ദൗത്യം കൂടുതല്‍ ആത്മാര്‍ത്ഥതയോടെ തുടരാനുള്ള ആഹ്വാനമായി അത് മാറണം. സുവിശേഷം അറിയുക മാത്രമല്ല, അത് ജീവിതത്തില്‍ പ്രാവര്‍ത്തികമാക്കുകയും വേണം. വിശക്കുന്നവരിലും രോഗികളിലും ഉപേക്ഷിക്കപ്പെട്ടവരിലും ദരിദ്രരിലും ക്രിസ്തുവിന്റെ മുഖം ദര്‍ശിക്കാനും അവരുടെ ജീവിതത്തില്‍ പ്രത്യാശയും ആശ്വാസവും പകരാനും ഓരോ വിശ്വാസിയും തയ്യാറാകണം.
കാരുണ്യം സ്‌നേഹത്തിലൂടെ പ്രകടമാകുകയും നീതി പ്രായോഗിക പ്രവര്‍ത്തനങ്ങളിലൂടെ യാഥാര്‍ഥ്യമാകുകയും ചെയ്യുന്ന ഒരു സമൂഹം കെട്ടിപ്പടുക്കുക എന്നതായിരിക്കണം ഈ വര്‍ഷത്തിന്റെ ലക്ഷ്യം.
The Malankara Catholic Church is observing a Year of Mercy and Justice in preparation for the centenary of the Reunion.
