വാഷിങ്ടൺ: ഇറാനെതിരെ ഉടൻ സൈനികാക്രമണം ഉണ്ടായേക്കുമെന്ന് മുന്നറിയിപ്പ് നൽകി യുഎസ് പ്രസിഡന്റ് ഡോണൾഡ് ട്രംപ്. ഇറാനെതിരെ മറ്റൊരു സൈനിക നടപടി ഉണ്ടായേക്കാമെന്ന് തലേദിവസം സൂചിപ്പിച്ചതിനു പിന്നാലെയാണ് ഞായറാഴ്ചയോടെ ആക്രമണം നടന്നേക്കാമെന്ന് ട്രംപ് വ്യക്തമാക്കിയത്. അതേസമയം, സമാധാന കരാറിലെത്താനുള്ള സാധ്യതയും അദ്ദേഹം പൂർണമായി തള്ളിയിട്ടില്ല.
ഫ്ലോറിഡയിൽ ഇടക്കാല തിരഞ്ഞെടുപ്പിൽ വോട്ട് രേഖപ്പെടുത്തിയശേഷം മാധ്യമപ്രവർത്തകരോട് സംസാരിക്കുകയായിരുന്നു ട്രംപ്. ആക്രമണത്തിന് അന്തിമ തീരുമാനമെടുത്തിട്ടുണ്ടോയെന്ന ചോദ്യത്തിന്, “ഞാൻ അത് നിങ്ങളോട് പറയുമെന്ന് കരുതുന്നുണ്ടോ? ഒരുപക്ഷേ നാളെ ഉണ്ടായേക്കാം. ആക്രമണം നടത്താനുള്ള സാധ്യതയുണ്ട്. അതുപോലെ, നല്ലൊരു വലിയ കരാറിലെത്താനുള്ള സാധ്യതയും നിലനിൽക്കുന്നുണ്ട്” എന്നായിരുന്നു മറുപടി. എഎൻഐയാണ് ഇക്കാര്യം റിപ്പോർട്ട് ചെയ്തത്.
വെള്ളിയാഴ്ച ഫ്ലോറിഡയിൽ നടന്ന റാലിയിൽ സംസാരിക്കവെ, ഇറാനെതിരെ ‘എപ്പിക് ഫ്യൂറി’ എന്ന പേരിൽ മറ്റൊരു സൈനിക നീക്കം ആരംഭിച്ചേക്കുമെന്ന് ട്രംപ് മുന്നറിയിപ്പ് നൽകിയിരുന്നു. ഗൾഫിലെ കടലിനടിയിലൂടെയുള്ള ആശയവിനിമയ കേബിളുകൾ തകർക്കാൻ ടെഹ്‌റാൻ പദ്ധതിയിടുന്നതായി റിപ്പോർട്ടുകൾ പുറത്തുവന്നതിന് പിന്നാലെയായിരുന്നു ഈ പ്രതികരണം. ഫെബ്രുവരി 28നാണ് യുഎസും ഇസ്രയേലും ചേർന്ന് ഇറാനിലെ സൈനിക കേന്ദ്രങ്ങൾക്കും നേതാക്കളുടെ ഓഫീസുകൾക്കും നേരെ വ്യോമാക്രമണം ആരംഭിച്ചതെന്ന് റിപ്പോർട്ടിൽ പറയുന്നു. ഈ ആക്രമണത്തിൽ അന്നത്തെ ഇറാന്റെ പരമോന്നത നേതാവ് ആയത്തൊള്ള അലി ഖമേനി കൊല്ലപ്പെട്ടതായും റിപ്പോർട്ടിലുണ്ട്.
ഇറാനെതിരെ അമേരിക്കൻ സൈന്യം വൻ വിജയം നേടിയെന്ന് ട്രംപ് അവകാശപ്പെട്ടു. ഇറാന്റെ യുദ്ധവിമാനങ്ങൾ മുഴുവൻ തകർത്തതായും 259 കപ്പലുകൾ കടലിന്റെ അടിത്തട്ടിലാക്കിയതായും അദ്ദേഹം പറഞ്ഞു. ഇറാൻ നിലവിൽ റെക്കോർഡ് പണപ്പെരുപ്പം നേരിടുകയാണെന്നും ട്രംപ് കൂട്ടിച്ചേർത്തു. കരാറുകളിൽ ഒപ്പുവെച്ചശേഷം ഇറാൻ അവ പാലിക്കുമോയെന്ന കാര്യത്തിൽ സംശയമുണ്ടെന്നും അദ്ദേഹം പറഞ്ഞു. ഇറാൻ അണുബോംബ് നിർമിക്കുന്നത് തടയുക മാത്രമാണ് അമേരിക്കയുടെ ലക്ഷ്യമെന്നും ട്രംപ് വ്യക്തമാക്കി.
അതേസമയം, യുഎസ് നാവിക ഉപരോധം നീക്കുന്നതിന് പകരമായി ഹോർമുസ് കടലിടുക്ക് തുറന്നുകൊടുക്കാൻ പാകിസ്ഥാൻ മധ്യസ്ഥർ വഴി ഇറാൻ പുതിയ നിർദേശം മുന്നോട്ടുവെച്ചെന്ന റിപ്പോർട്ടുകൾ ടെഹ്‌റാൻ നിഷേധിച്ചു. സൗദി അറേബ്യൻ മാധ്യമങ്ങൾ പുറത്തുവിട്ട വാർത്തകൾ വ്യാജമാണെന്ന് ഇറാനിയൻ റെവല്യൂഷണറി ഗാർഡ് കോർപ്സുമായി ബന്ധമുള്ള തസ്നിം വാർത്താ ഏജൻസി വ്യക്തമാക്കി.
