ലാരെഡോ (ടെക്സസ്): അമേരിക്ക-മെക്സിക്കോ അതിർത്തി നഗരമായ ടെക്സസിലെ ലാരെഡോയിൽ ഇമിഗ്രേഷൻ ആൻഡ് കസ്റ്റംസ് എൻഫോഴ്‌സ്‌മെന്റ് (ഐസിഇ) ഉദ്യോഗസ്ഥരെ സ്കൂളുകൾക്ക് സമീപം കാണുന്നത് പതിവ് കാഴ്ചയാണെങ്കിലും, കോടതി വാറന്റോ സമൻസോ ഇല്ലാതെ അവരെ സ്കൂളിനുള്ളിലേക്ക് പ്രവേശിപ്പിക്കില്ലെന്ന് ഉറച്ച നിലപാടെടുത്ത് പ്രാദേശിക വിദ്യാഭ്യാസ നേതൃത്വം. യുണൈറ്റഡ് ഇൻഡിപെൻഡന്റ് സ്കൂൾ ഡിസ്ട്രിക്റ്റിലെ മുതിർന്ന ഉദ്യോഗസ്ഥയായ ആൻഡ്രിയ ഗാർസയാണ് (Andrea Garza) വിദ്യാർത്ഥികളുടെ അവകാശങ്ങൾ സംരക്ഷിക്കുന്നതിനായി നിയമപരമായ ഈ നിലപാട് വ്യക്തമാക്കിയത്.
94 ശതമാനവും ഹിസ്പാനിക് വിഭാഗക്കാർ താമസിക്കുന്ന ലാരെഡോ മേഖലയിൽ, സ്കൂൾ സമയത്ത് വിദ്യാർത്ഥികളുടെ രക്ഷിതാക്കളുടെ സ്ഥാനത്താണ് അധ്യാപകരും സ്കൂൾ അധികൃതരും പ്രവർത്തിക്കുന്നതെന്ന് ഗാർസ ചൂണ്ടിക്കാട്ടി. ഉദ്യോഗസ്ഥരെ തടയുന്നത് നിയമലംഘനമല്ലെന്നും, മറിച്ച് എല്ലാവരും നിയമം പാലിക്കുന്നുണ്ടെന്ന് ഉറപ്പുവരുത്തുക മാത്രമാണ് ചെയ്യുന്നതെന്നും അവർ വ്യക്തമാക്കി.
നിയമപരമായ അവ്യക്തതയും ട്രംപിന്റെ നയമാറ്റവും
പ്രസിഡന്റ് ഡോണൾഡ് ട്രംപ് രണ്ടാം തവണ അധികാരമേറ്റതിന് പിന്നാലെ, സ്കൂളുകൾ, പള്ളികൾ തുടങ്ങിയ ‘സെൻസിറ്റീവ്’ സ്ഥലങ്ങളിൽ ഇമിഗ്രേഷൻ പരിശോധനകൾക്ക് ഉണ്ടായിരുന്ന സംരക്ഷണം എടുത്തുകളഞ്ഞിരുന്നു. കുറ്റവാളികൾക്ക് സ്കൂളുകളിലും പള്ളികളിലും ഒളിച്ചിരിക്കാൻ ഇനി കഴിയില്ലെന്നായിരുന്നു ഹോംലാന്റ് സെക്യൂരിറ്റി ഡിപ്പാർട്ട്‌മെന്റിന്റെ വിശദീകരണം.
ഫെഡറൽ ഇമിഗ്രേഷൻ നടപടികളെ തടസ്സപ്പെടുത്തുന്നതിൽ നിന്ന് പ്രാദേശിക ഏജൻസികളെ ടെക്സസ് സംസ്ഥാന നിയമം വിലക്കുന്നുണ്ടെങ്കിലും, പൊതുവിദ്യാലയങ്ങളിൽ ഇമിഗ്രേഷൻ ഉദ്യോഗസ്ഥർക്ക് എത്രത്തോളം പ്രവേശനാനുമതി നൽകണമെന്ന കാര്യത്തിൽ വ്യക്തമായ സംസ്ഥാന നിയമങ്ങളില്ലെന്ന് എൻ.പി.ആർ റിപ്പോർട്ട് ചെയ്യുന്നു. അമേരിക്കയിലെ പല സംസ്ഥാനങ്ങളിലും ഇക്കാര്യത്തിൽ കൃത്യമായ മാർഗ്ഗനിർദ്ദേശങ്ങളില്ലാത്തത് സ്കൂൾ അധികൃതരെയും രക്ഷിതാക്കളെയും ഒരുപോലെ ആശങ്കയിലാക്കുന്നുണ്ട്.
