വാഷിംഗ്ടൺ: വാഷിംഗ്ടൺ ഡിസിയിലെ ചരിത്രപ്രസിദ്ധമായ പൊതു പാർക്കും ഗോൾഫ് കോഴ്സും അടച്ചുപൂട്ടാനുള്ള ട്രംപ് ഭരണകൂടത്തിന്റെ നീക്കം ഫെഡറൽ കോടതി തടഞ്ഞു. ഈ പ്രദേശം ലോകോത്തര നിലവാരത്തിലുള്ള ചാമ്പ്യൻഷിപ്പ് ഗോൾഫ് കോഴ്സ് ആക്കി മാറ്റാനുള്ള പ്രസിഡന്റ് ട്രംപിന്റെ പദ്ധതിക്ക് തിരിച്ചടിയാണ് കോടതിയുടെ ഇടപെടൽ. നവംബർ 15 ഞായറാഴ്ച നടത്താനിരുന്ന അടച്ചുപൂട്ടൽ നടപടിയാണ് യുഎസ് ജില്ലാ ജഡ്ജി അന്ന റെയെസ് താൽക്കാലികമായി തടഞ്ഞത്.
ഈസ്റ്റ് പൊട്ടോമാക് പാർക്കും ഗോൾഫ് കോഴ്സും അടച്ചുപൂട്ടാൻ ഭരണകൂടത്തിന് അനുവാദമില്ലെന്നും, എന്നാൽ ഇവ സജീവമായി പരിപാലിക്കാൻ ഭരണകൂടം ബാധ്യസ്ഥമല്ലെന്നും ജഡ്ജി ഉത്തരവിൽ വ്യക്തമാക്കി. നവംബർ 28 വരെയാണ് കോടതിയുടെ താൽക്കാലിക ഉത്തരവ് നിലനിൽക്കുക. പ്രദേശത്തെ ചരിത്രപരമായ പാർക്ക് സംരക്ഷിക്കുന്നതിനായി രംഗത്തുവന്ന ഡി.സി പ്രിസർവേഷൻ ഗ്രൂപ്പും രണ്ട് പ്രാദേശിക ഗോൾഫ് കളിക്കാരും നൽകിയ ഹർജിയിലാണ് കോടതിയുടെ വിധി. പ്രസിദ്ധ ഗോൾഫ് കോഴ്സ് ആർക്കിടെക്റ്റ് ടോം ഫഫിയോയുടെ (Tom Fazio) ഡിസൈനിൽ പുതിയ കോഴ്സ് നിർമ്മിക്കുന്നതിന്റെ ഭാഗമായാണ് അടച്ചുപൂട്ടൽ പ്രഖ്യാപിച്ചിരുന്നത്.
എന്നാൽ പാർക്ക് അടച്ചുപൂട്ടുന്നതിന് ഭരണകൂടം നിരത്തിയ കാരണങ്ങൾ കൃത്രിമമാണെന്നും, പ്രസിഡന്റിന്റെ നിർദ്ദേശം നടപ്പിലാക്കുക മാത്രമാണ് ഇതിലൂടെ ചെയ്യുന്നതെന്നും ജഡ്ജി നിരീക്ഷിച്ചു. അതേസമയം, പൊതുജനങ്ങൾ അപകടസാധ്യത നേരിടുന്ന സാഹചര്യങ്ങളിൽ നാഷണൽ പാർക്ക് സർവീസിന് പ്രവേശനം പരിമിതപ്പെടുത്താൻ അധികാരമുണ്ടെന്നും, പുതിയ ഗോൾഫ് കോഴ്സിനായുള്ള പദ്ധതികൾ തുടരുന്നതിന് കോടതി ഉത്തരവ് തടസ്സമാകില്ലെന്നും ജസ്റ്റിസ് ഡിപ്പാർട്ട്മെന്റ് വക്താവ് വ്യക്തമാക്കി.
1920-കളിൽ പ്രവർത്തനം ആരംഭിച്ച ഈസ്റ്റ് പൊട്ടോമാക് ഗോൾഫ് ലിങ്ക്സിലെ പദ്ധതിക്കെതിരെയുള്ള നിയമപോരാട്ടങ്ങൾക്ക് മാസങ്ങളായി ജഡ്ജി അന്ന റെയെസാണ് നേതൃത്വം നൽകുന്നത്. കഴിഞ്ഞ മാസം നാഷണൽ പാർക്ക് സർവീസ് അധികൃതർ ഇവിടെ അനുമതിയില്ലാതെ 500-ലധികം മരങ്ങൾ വെട്ടിമാറ്റിയിരുന്നു. തുടർന്ന് അധിക മരങ്ങൾ വെട്ടുന്നത് കോടതി തടയുകയും, ഭാവിയിൽ എടുക്കുന്ന നടപടികളെക്കുറിച്ച് കോടതിയെ അറിയിക്കണമെന്ന് ആവശ്യപ്പെടുകയും ചെയ്തിരുന്നു. പുതിയ നിർമ്മാണ പ്രവർത്തനങ്ങൾക്കായി ഫഫിയോയുമായോ മറ്റ് ഏജൻസികളുമായോ യാതൊരുവിധ കരാറുകളിലും ഒപ്പുവെച്ചിട്ടില്ലെന്ന് അസോസിയേറ്റ് അറ്റോർണി ജനറൽ സ്റ്റാൻലി വുഡ്വാർഡ് കഴിഞ്ഞ ദിവസം കോടതിയിൽ വ്യക്തമാക്കുകയും ചെയ്തിരുന്നു.
