ഡെൻവർ: കോടതി ഉത്തരവിനെ തുടർന്ന് കസ്റ്റഡിയിൽ നിന്ന് മോചിതരായ കുടിയേറ്റക്കാരെ വീണ്ടും ഉടനടി അറസ്റ്റ് ചെയ്ത സംഭവത്തിൽ ഡെൻവർ ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് ആക്ടിംഗ് ഫീൽഡ് ഓഫീസ് മേധാവി ഫെഡറൽ കോടതിയിൽ ഹാജരായി വിശദീകരണം നൽകി. കുടിയേറ്റക്കാരുടെ നിയമപരമായ അവകാശങ്ങളെയും ഭയത്തെയും ബാധിക്കുന്ന ഗൗരവമേറിയ വിഷയമാണിതെന്ന് യുഎസ് ജില്ലാ ജഡ്ജ് ഷാർലറ്റ് സ്വീനി വ്യക്തമാക്കി. സംഭവത്തിൽ കോടതിയലക്ഷ് നടപടികൾ സ്വീകരിക്കുന്നത് സംബന്ധിച്ച് ജഡ്ജ് ഉടൻ തീരുമാനമെടുക്കും.
ഔറോറയിലെ ജിയോ ഡിറ്റൻഷൻ സെന്ററിൽ കഴിഞ്ഞ ആഴ്ചകളിൽ കുറഞ്ഞത് 18 തടവുകാരെയെങ്കിലും മോചിപ്പിച്ചയുടൻ വീണ്ടും അറസ്റ്റ് ചെയ്തതായി കോടതിയിൽ തെളിവുകൾ പുറത്തുവന്നു. ഇതിനെത്തുടർന്ന് തടങ്കൽ കേന്ദ്രത്തിന് പുറത്ത് വലിയ പ്രതിഷേധങ്ങളും അരങ്ങേറിയിരുന്നു. ഒക്ടോബർ 27 മുതൽ നിയമപരമായ അധികാരം ഉപയോഗിച്ച് ഹേബിയസ് കോർപ്പസ് നടപടികളെ തുടർന്ന് മോചിപ്പിക്കപ്പെടുന്ന തടവുകാരെ വീണ്ടും അറസ്റ്റ് ചെയ്യാൻ തന്റെ ടീമിന് നിർദ്ദേശം നൽകിയിരുന്നതായി ഡെൻവർ ഐ.സി.ഇ ആക്ടിംഗ് ഡയറക്ടർ നഥാൻ റാസ്പർ കോടതിയിൽ സാക്ഷി്യപ്പെടുത്തി. ശരിയായ രേഖകൾ ഇല്ലാതെയാണ് ചിലരെ അറസ്റ്റ് ചെയ്തിരുന്നതെന്നും, മോചിപ്പിച്ച ശേഷം പുതിയ വാറന്റുകൾ നൽകി നടപടിക്രമങ്ങൾ ശരിയാക്കുക മാത്രമാണ് ചെയ്തതെന്നുമാണ് അദ്ദേഹം വാദിച്ചത്.
എന്നാൽ ഈ നടപടി കോടതി ഉത്തരവുകളുടെ ലംഘനമല്ലെന്ന് കരുതിയെങ്കിലും, നവംബർ 4 മുതൽ ഈ രീതി നിർത്തിവെക്കാൻ താൻ ഉത്തരവിട്ടിരുന്നതായും റാസ്പർ ജഡ്ജിയെ അറിയിച്ചു. ഐസിഇയുടെ ഇത്തരം നടപടികൾ ക്രൂരത നിറഞ്ഞതാണെന്നും വാഷിംഗ്ടണിൽ നിന്നുള്ള തെറ്റായ നിർദ്ദേശങ്ങളാണ് ഇതിന് കാരണമെന്നും അമേരിക്കൻ സിവിൽ ലിബർട്ടീസ് യൂണിയൻ കുറ്റപ്പെടുത്തി. മിഡ്‌ടേം തിരഞ്ഞെടുപ്പ് ഫലങ്ങളിൽ നിന്നും ഭരണകൂടം യാതൊരു പാഠവും പഠിച്ചിട്ടില്ല എന്നതിന്റെ തെളിവാണ് ഇതെന്നും അധികൃതർ ചൂണ്ടിക്കാണിച്ചു. വിഷയത്തിൽ ജഡ്ജ് ഷാർലറ്റ് സ്വീനിയുടെ തുടർന്നുള്ള ഉത്തരവുകൾക്കായി കാത്തിരിക്കുകയാണ് ഇരുവിഭാഗവും.
