മുംബൈയിൽ നടൻ ഇമ്രാൻ ഖാൻ പങ്കെടുത്ത എസ്.ഐ.ആർ വിരുദ്ധ സമരവുമായി ബന്ധപ്പെട്ട് ബോംബെ ഹൈക്കോടതിയിൽ നിരുപാധികം മാപ്പ് പറഞ്ഞു. സത്യവാങ്മൂലത്തിലൂടെയാണ് നടൻ ഖേദം പ്രകടിപ്പിച്ചത്. ഒ.സി.ഐ (OCI) കാർഡുള്ള വ്യക്തി എന്ന നിലയിൽ ഇന്ത്യയിൽ രാഷ്ട്രീയ പ്രതിഷേധങ്ങളിൽ പങ്കെടുക്കാൻ നിയമപരമായ അവകാശമില്ലെന്ന് വ്യക്തമാക്കിയ ഹൈക്കോടതി, ഒ.സി.ഐ കാർഡുടമകളെയും ഇന്ത്യൻ പൗരന്മാരെയും ഒരുപോലെ കാണാനാവില്ലെന്ന് ചൂണ്ടിക്കാട്ടി.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഒക്ടോബർ 10-ന് സി.ജെ.പി നടത്തിയ പ്രതിഷേധത്തിൽ പങ്കെടുത്തതിനെ തുടർന്ന്, ഒക്ടോബർ 28-നകം ഇന്ത്യ വിടണമെന്ന് ഫോറിനേഴ്സ് റീജിയണൽ രജിസ്ട്രേഷൻ ഓഫീസ് (FRRO) നടന് നോട്ടീസ് നൽകിയിരുന്നു. ഇതിനെതിരെ ഇമ്രാൻ ഖാൻ സമർപ്പിച്ച ഹർജി പരിഗണിക്കവേയാണ് കോടതി പരാമർശം. ജീവിതത്തിന്റെ ഭൂരിഭാഗവും ഇന്ത്യയിലാണ് കഴിച്ചുകൂട്ടിയതെന്നും അമേരിക്കൻ പൗരത്വം ജനനം കൊണ്ടുമാത്രമാണെന്നും നടൻ വിശദീകരിച്ചെങ്കിലും, മറ്റ് രാജ്യങ്ങളിൽ ഇത്തരം ലംഘനം നടത്തിയാൽ ഉടനടി നാടുകടത്തപ്പെടുമെന്ന് കോടതി ഓർമ്മിപ്പിച്ചു.
നടൻ നിരുപാധികം മാപ്പപേക്ഷിച്ച പശ്ചാത്തലത്തിൽ, കേസിൽ വാദം കേൾക്കാൻ കോടതി കൂടുതൽ സമയം അനുവദിച്ചു. വരും ശനിയാഴ്ച ഹർജിയിൽ വീണ്ടും വാദം കേൾക്കുന്നത് വരെ ഇമ്രാൻ ഖാൻ രാജ്യം വിടേണ്ടതില്ലെന്ന് ബെഞ്ച് ഉത്തരവിട്ടു. ഹർജി വീണ്ടും പരിഗണിച്ച ശേഷമായിരിക്കും അദ്ദേഹത്തിന്റെ തുടർന്നുള്ള താമസത്തെക്കുറിച്ച് അന്തിമ തീരുമാനമെടുക്കുക.
