വാഷിംഗ്ടൺ: ചൈനീസ് രഹസ്യാന്വേഷണ വിഭാഗവുമായി ബന്ധമുണ്ടെന്ന ആരോപണത്തെത്തുടർന്ന് എൻവിഡിയ സിഇഒ ജെൻസൻ ഹുവാങ്ങിനെതിരെ കമ്പനി ബോർഡ് അന്വേഷണം പ്രഖ്യാപിച്ചതായി റിപ്പോർട്ട്. സംഭവവികാസങ്ങൾക്ക് പിന്നാലെ തിങ്കളാഴ്ച വ്യാപാരം ആരംഭിച്ചയുടൻ എൻവിഡിയയുടെ ഓഹരി വിലയിൽ വൻ ഇടിവുണ്ടായി. ലോകത്തെ രണ്ടാമത്തെ വലിയ കമ്പനിയായി കണക്കാക്കപ്പെടുന്ന എൻവിഡിയയുടെ തലപ്പത്ത് ജെൻസൻ ഹുവാങ്ങിന്റെ ഭാവി എന്താകുമെന്ന ആശങ്കയും ഇതോടെ ശക്തമായി.
തിങ്കളാഴ്ച രാവിലെ വ്യാപാരം ആരംഭിച്ചയുടൻ എൻവിഡിയയുടെ ഓഹരി വില 5.7 ശതമാനം ഇടിഞ്ഞ് 176.24 ഡോളറിലെത്തി. ഓഹരിക്ക് 10.40 ഡോളറിന്റെ ഇടിവാണ് രേഖപ്പെടുത്തിയത്. ഏകദേശം 4.5 ട്രില്യൺ ഡോളർ വിപണിമൂല്യമുള്ള കമ്പനിയെ സംബന്ധിച്ചിടത്തോളം ഈ സംഭവവികാസം വലിയ പ്രത്യാഘാതങ്ങൾ സൃഷ്ടിക്കുമെന്നാണ് വിലയിരുത്തൽ.
ചൈനീസ് സ്റ്റേറ്റ് സെക്യൂരിറ്റിയുടെ ചാരയായി പ്രവർത്തിച്ചുവെന്ന് യുഎസ് രഹസ്യാന്വേഷണ ഉദ്യോഗസ്ഥർ സംശയിക്കുന്ന ആലീസ് ഹുവാങ്ങുമായി ജെൻസൻ ഹുവാങ്ങിന് അടുത്ത ബന്ധമുണ്ടെന്ന റിപ്പോർട്ടുകളാണ് വിവാദത്തിന് പിന്നിൽ. ആരോപണങ്ങളിൽ സ്വതന്ത്ര അന്വേഷണം നടത്തുമെന്ന് എൻവിഡിയ ബോർഡ് ഞായറാഴ്ച വ്യക്തമാക്കിയിരുന്നു. എന്നാൽ, കമ്പനിയുടെ രഹസ്യങ്ങളോ ദേശീയ സുരക്ഷയെ ബാധിക്കുന്ന വിവരങ്ങളോ ചോർന്നതായി കരുതുന്നില്ലെന്നും ബോർഡ് അറിയിച്ചു.
സംഭവം കമ്പനിയിൽ ജെൻസൻ ഹുവാങ്ങിന്റെ ഭാവിയെക്കുറിച്ച് ചോദ്യങ്ങളുയർത്തുന്നതാണെന്ന് യോർക്ക്‌വിൽ ഐവ്സ് അനലിസ്റ്റ് ഡാൻ ഐവ്സ് വിലയിരുത്തി. ഓഹരി വിപണിയിലും കമ്പനിയുടെ ദീർഘകാല പ്രവർത്തനങ്ങളിലും വിവാദം പ്രത്യാഘാതമുണ്ടാക്കിയേക്കാമെന്നും അദ്ദേഹം ചൂണ്ടിക്കാട്ടി. അതേസമയം, ജെൻസൻ ഹുവാങ്ങിനെതിരായ ചാരവൃത്തി ആരോപണങ്ങൾ അടിസ്ഥാനരഹിതവും അപകീർത്തികരവുമാണെന്ന് ചൈനീസ് വിദേശകാര്യ മന്ത്രാലയ വക്താവ് ഗുവോ ജിയാകുൻ പ്രതികരിച്ചു.
നിർമിതബുദ്ധി മേഖലയിലെ വൻ വളർച്ചയ്ക്കിടയിലും വിവിധ വെല്ലുവിളികൾ നേരിടുന്ന എൻവിഡിയയ്ക്ക് പുതിയ വിവാദം കൂടുതൽ സമ്മർദമുണ്ടാക്കുമെന്നാണ് വിലയിരുത്തൽ. നേരത്തേ ചൈനയിലേക്കുള്ള ചിപ്പ് കയറ്റുമതി നിയന്ത്രണങ്ങളിൽ ഇളവ് അനുവദിക്കണമെന്ന് ആവശ്യപ്പെട്ട് ജെൻസൻ ഹുവാങ് പ്രസിഡന്റ് ഡൊണാൾഡ് ട്രംപിനെ സമീപിച്ചിരുന്നു. പുതിയ ആരോപണങ്ങൾ യുഎസ് സർക്കാർ ചിപ്പ് കയറ്റുമതിയിൽ കൂടുതൽ കർശനമായ നിയന്ത്രണങ്ങൾ ഏർപ്പെടുത്തുന്നതിന് കാരണമായേക്കാമെന്നും വിദഗ്ധർ മുന്നറിയിപ്പ് നൽകുന്നു.
