സുമോദ് തോമസ് നെല്ലിക്കാല
ഫിലഡല്‍ഫിയ: ട്രൈസ്റ്റേറ്റ് കേരള ഫോറത്തിന്റെ ആഭിമുഖ്യത്തില്‍ സംഘടിപ്പിക്കുന്ന കേരളപ്പിറവി ദിനാഘോഷം നവംബര്‍ എട്ട് ഞായറാഴ്ച വൈകുന്നേരം നാലിന് ഫിലഡല്‍ഫിയയിലെ അസന്‍ഷന്‍ മാര്‍ത്തോമ്മാ ചര്‍ച്ച് ഓഡിറ്റോറിയത്തില്‍ (10197 Northeast Ave, Philadelphia, PA 19116) വിപുലമായ പരിപാടികളോടെ നടക്കും. കേരളത്തിന്റെ ഭാഷ, സംസ്‌കാരം, പാരമ്പര്യം എന്നിവ ഉയര്‍ത്തിപ്പിടിക്കുന്നതിനൊപ്പം പ്രവാസി മലയാളികളുടെ ഐക്യവും കൂട്ടായ്മയും സൗഹൃദവും ശക്തിപ്പെടുത്തുക എന്ന ലക്ഷ്യത്തോടെയാണ് ആഘോഷം സംഘടിപ്പിക്കുന്നത്.
24 ന്യൂസ് അസോസിയേറ്റ് എക്‌സിക്യൂട്ടീവ് എഡിറ്റര്‍ വി. അരവിന്ദ് ആഘോഷത്തില്‍ മുഖ്യാതിഥിയായി പങ്കെടുക്കും. മാധ്യമരംഗത്തെ പ്രമുഖ വ്യക്തിത്വമായ അദ്ദേഹത്തിന്റെ സാന്നിധ്യം ചടങ്ങിന് പ്രത്യേക പ്രാധാന്യവും മികവും പകരും. പ്രശസ്ത ഇമിഗ്രേഷന്‍ അഭിഭാഷകന്‍ മിസ്റ്റര്‍ റിക്കി പല്ലഡിനോ വിശിഷ്ടാതിഥിയായി പങ്കെടുക്കും. അമേരിക്കയിലെ മലയാളി പ്രവാസി സമൂഹത്തിന് ഏറെ പ്രസക്തിയുള്ള വിഷയങ്ങള്‍ ചര്‍ച്ച ചെയ്യുന്നതിനും ആശയവിനിമയത്തിനും ഈ സാന്നിധ്യങ്ങള്‍ അവസരമൊരുക്കും.
കേരളപ്പിറവി ആഘോഷത്തിന്റെ ഭാഗമായി കലാ-സാംസ്‌കാരിക പരിപാടികള്‍ക്കൊപ്പം സീനിയര്‍ കെയര്‍, റിട്ടയര്‍മെന്റ് ജീവിതം എന്നീ വിഷയങ്ങളെ ആസ്പദമാക്കി പ്രത്യേക ചര്‍ച്ചയും സംഘടിപ്പിക്കും. അമേരിക്കയില്‍ പ്രായമായ മാതാപിതാക്കളുടെയും മുതിര്‍ന്ന പൗരന്മാരുടെയും പരിചരണം, അവരുടെ ആരോഗ്യ-സാമൂഹിക സുരക്ഷ, റിട്ടയര്‍മെന്റ് ജീവിതത്തിനുള്ള തയ്യാറെടുപ്പുകള്‍, സാമ്പത്തിക ആസൂത്രണം, കുടുംബത്തിന്റെ ഉത്തരവാദിത്തങ്ങള്‍ തുടങ്ങിയ വിഷയങ്ങള്‍ ചര്‍ച്ചയില്‍ പ്രാധാന്യത്തോടെ അവതരിപ്പിക്കും. പ്രവാസി മലയാളി കുടുംബങ്ങള്‍ക്ക് ഏറെ പ്രയോജനകരമായ വിവരങ്ങളും അനുഭവങ്ങളും പങ്കുവെക്കാന്‍ ഈ ചര്‍ച്ച വേദിയാകും.
ആഘോഷത്തിന്റെ മറ്റൊരു പ്രധാന ആകര്‍ഷണം സംഗീതസായാഹ്നമാണ്. സംഗീതവും നൃത്തവും ഉള്‍പ്പെടെയുള്ള വിവിധ കലാപരിപാടികള്‍ അരങ്ങേറും. ട്രൈസ്റ്റേറ്റ് മേഖലയിലെ മലയാളി കലാകാരന്മാരുടെയും കലാപ്രതിഭകളുടെയും പങ്കാളിത്തത്തോടെ ഒരുക്കുന്ന സംഗീതവിരുന്ന് ആഘോഷത്തിന് കൂടുതല്‍ നിറവും ആവേശവും പകരും.
കേരളത്തിന്റെ സാംസ്‌കാരിക പൈതൃകം പ്രവാസി സമൂഹത്തിലും പുതുതലമുറയിലും കൂടുതല്‍ ശക്തമായി പരിചയപ്പെടുത്തുന്നതിനും മലയാള ഭാഷയോടും സംസ്‌കാരത്തോടുമുള്ള ആഭിമുഖ്യം വളര്‍ത്തുന്നതിനും ഇത്തരം ആഘോഷങ്ങള്‍ നിര്‍ണായക പങ്കുവഹിക്കുന്നതായി സംഘാടകര്‍ ചൂണ്ടിക്കാട്ടി.
കേരളത്തില്‍നിന്ന് ആയിരക്കണക്കിന് മൈലുകള്‍ അകലെ ജീവിക്കുമ്പോഴും കേരളത്തിന്റെ പാരമ്പര്യവും ഭാഷയും സംസ്‌കാരവും ഹൃദയത്തോട് ചേര്‍ത്തുപിടിക്കുന്ന പ്രവാസി മലയാളികളുടെ വലിയൊരു സംഗമമായി ഈ ആഘോഷം മാറുമെന്നാണ് പ്രതീക്ഷിക്കുന്നത്.
ട്രൈസ്റ്റേറ്റ് കേരള ഫോറം കേരളാ ഡേ ചെയര്‍മാന്‍ തോമസ് പോള്‍ പരിപാടിയുടെ വിജയത്തിനായി വിവിധ ക്രമീകരണങ്ങള്‍ക്ക് നേതൃത്വം നല്‍കിവരുന്നു. ചെയര്‍മാന്‍ ലെനോ സ്‌കറിയ, സെക്രട്ടറി ജോബി ജോര്‍ജ്, ട്രഷറര്‍ രാജന്‍ സാമുവല്‍ എന്നിവരുടെ നേതൃത്വത്തിലുള്ള എക്‌സിക്യൂട്ടീവ് കമ്മിറ്റിയും ആഘോഷത്തിന്റെ ഒരുക്കങ്ങളില്‍ സജീവമാണ്.
വിപുലമായ സംഘാടക സമിതിയാണ് പരിപാടിയുടെ വിജയകരമായ നടത്തിപ്പിനായി പ്രവര്‍ത്തിക്കുന്നത്. വിന്‍സന്റ് ഇമ്മാനുവല്‍, സുരേഷ് നായര്‍, ജീമോന്‍ ജോര്‍ജ്, ബിനു മാത്യു, റോണി വര്‍ഗീസ്, ജോര്‍ജ് ഓലിക്കല്‍, അലക്‌സ് തോമസ്, സുധ കര്‍ത്ത, അഭിലാഷ് ജോണ്‍, ഫിലിപ്പോസ് ചെറിയാന്‍, സുമോദ് നെല്ലിക്കാല, സാജന്‍ വര്‍ഗീസ്, ആഷ അഗസ്റ്റ്യന്‍, ദിലീപ് ജോര്‍ജ്, അരുണ്‍ കോവാട്ട്, അനിഷ് ജോയ്, ജോണ്‍ പണിക്കര്‍ എന്നിവര്‍ വിവിധ ചുമതലകള്‍ ഏറ്റെടുത്ത് പ്രവര്‍ത്തിച്ചുവരുന്നു.
മലയാളി സംഘടനകളുടെ കൂട്ടായ്മയും സഹകരണവും പ്രതിഫലിപ്പിക്കുന്ന ട്രൈസ്റ്റേറ്റ് കേരള ഫോറത്തിന്റെ ഈ കേരളപ്പിറവി ആഘോഷം കുടുംബസമേതം പങ്കെടുത്ത് വിജയിപ്പിക്കണമെന്ന് ഭാരവാഹികളും സംഘാടക സമിതി അംഗങ്ങളും ഫിലഡല്‍ഫിയയിലെയും സമീപ പ്രദേശങ്ങളിലെയും എല്ലാ മലയാളികളോടും അഭ്യര്‍ത്ഥിച്ചു.
പ്രവേശനം സൗജന്യമാണ്. എല്ലാ മലയാളി സുഹൃത്തുക്കളെയും കുടുംബസമേതം ഹൃദയപൂര്‍വം സ്വാഗതം ചെയ്യുന്നതായി സംഘാടകര്‍ അറിയിച്ചു.
Tri-State Kerala Forum to host Keralapiravi celebrations in Philadelphia on November 8; V. Aravind, Associate Executive Editor of 24 News, to be the chief guest.
