ബാങ്കോക്ക്/ഫ്നോം പെൻ: യുഎസ് പ്രസിഡന്‍റ് ഡോണൾഡ് ട്രംപ് വെടിനിർത്തൽ ചർച്ചകൾക്ക് ഇരു തെക്കുകിഴക്കൻ ഏഷ്യൻ രാജ്യങ്ങളും സമ്മതിച്ചുവെന്ന് പ്രഖ്യാപിച്ചതിന് ശേഷവും കംബോഡിയയും തായ്ലൻഡും തമ്മിലുള്ള വെടിവെപ്പ് തുടരുന്നു. പോരാട്ടം തുടരുകയാണെങ്കിൽ വാഷിംഗ്ടണുമായുള്ള വ്യാപാരക്കരാറുകൾക്ക് തിരിച്ചടിയാകുമെന്ന് ട്രംപ് മുന്നറിയിപ്പ് നൽകിയിരുന്നു. വ്യാഴാഴ്ച ആരംഭിച്ച ഈ സംഘർഷത്തിൽ ഇതുവരെ 32 പേർ കൊല്ലപ്പെടുകയും 200,000-ത്തിലധികം ആളുകൾക്ക് വീടുകൾ ഉപേക്ഷിച്ചു പോകേണ്ടി വരികയും ചെയ്തതായി തായ്, കംബോഡിയൻ ഉദ്യോഗസ്ഥർ അറിയിച്ചു.
യുഎൻ, യുഎസ്, ചൈന തുടങ്ങിയ രാജ്യങ്ങൾ പോരാട്ടം നിർത്താൻ ആവശ്യപ്പെട്ടിട്ടും സംഘർഷം തുടരുകയാണ്.
അതിർത്തിയിലെ ഏറ്റവും പുതിയ സംഘർഷത്തിന് തുടക്കമിട്ടത് തങ്ങളല്ലെന്ന് ഇരുപക്ഷവും പരസ്പരം കുറ്റപ്പെടുത്തുന്നു. ട്രംപിന്റെ പ്രഖ്യാപനത്തിന് മണിക്കൂറുകൾക്ക് ശേഷം, തായ്ലൻഡ് സൈനിക നടപടികൾ നിർത്താൻ തയ്യാറല്ല എന്ന് ഞായറാഴ്ച അറിയിച്ചു. കംബോഡിയ തങ്ങളുടെ സുരിൻ പ്രവിശ്യയിലെ അതിർത്തിയിലും മറ്റ് പല പ്രദേശങ്ങളിലും സാധാരണക്കാർ താമസിക്കുന്ന മേഖലകളിൽ ഹെവി ആർട്ടിലറി ഉപയോഗിച്ച് വെടിയുതിർക്കുന്നത് തുടരുകയാണെന്നും തായ്ലൻഡ് ആരോപിച്ചു.
കംബോഡിയ മനുഷ്യാവകാശങ്ങളുടെയും മാനുഷിക നിയമങ്ങളുടെയും അടിസ്ഥാന തത്വങ്ങൾ ആവർത്തിച്ച് ലംഘിക്കുന്ന സാഹചര്യത്തിൽ ഏതൊരു വെടിനിർത്തലും സാധ്യമല്ല എന്ന് തായ്ലൻഡ് വിദേശകാര്യ മന്ത്രാലയം പ്രസ്താവനയിൽ പറഞ്ഞു. അതിർത്തി സംഘർഷം തുടരുകയാണെങ്കിൽ ഇരുരാജ്യങ്ങളുമായും വ്യാപാരക്കരാറുകൾ ഉണ്ടാക്കില്ലെന്ന് തായ്, കംബോഡിയൻ നേതാക്കൾക്ക് ട്രംപ് മുന്നറിയിപ്പ് നൽകിയിരുന്നതായും റിപ്പോർട്ടുകളുണ്ട്.
