ലോസ് ഏഞ്ചൽസ്: മതിയായ കാരണങ്ങളില്ലാതെ ആളുകളെ അനധികൃത കുടിയേറ്റക്കാരായി സംശയിച്ച് തടങ്കലിൽ വെക്കുന്നതിലേക്ക് നയിക്കുന്ന പട്രോളിംഗുകൾ നടത്തുന്നതിൽ നിന്ന് കുടിയേറ്റ ഏജന്‍റുമാരെ തടഞ്ഞുകൊണ്ടുള്ള ഉത്തരവ് യുഎസ് അപ്പീൽ കോടതി ശരിവെച്ചു. കാലിഫോർണിയയിലാണ് ഈ ഉത്തരവ് ബാധകം.
കഴിഞ്ഞ വെള്ളിയാഴ്ച രാത്രി മൂന്നംഗ ബെഞ്ചിന്റെ ഈ വിധി, ലോസ് ഏഞ്ചൽസിലെ റോവിംഗ് പട്രോളിംഗുകൾ നിർത്തലാക്കാൻ ആവശ്യപ്പെട്ട ജൂലൈയിലെ താത്കാലിക ഉത്തരവിനെതിരെ ഫെഡറൽ ഗവൺമെന്റ് നൽകിയ അപ്പീൽ തള്ളി. കുടിയേറ്റ അവകാശ ഗ്രൂപ്പുകൾ ഈ പട്രോളിംഗുകളെ വംശീയ പ്രൊഫൈലിംഗ് ഉപയോഗിച്ച് നടത്തുന്ന നിയമവിരുദ്ധ പ്രവർത്തനങ്ങളായാണ് വിശേഷിപ്പിച്ചത്.
സർക്കാർ നടത്തുന്ന അന്യായമായ പിടിച്ചെടുക്കലുകൾക്കെതിരായ ഒരു വ്യക്തിയുടെ ഭരണഘടനാപരമായ അവകാശങ്ങൾ ലംഘിക്കുന്നതാണ് ഇത്തരം നടപടികളെന്ന് ചൂണ്ടിക്കാട്ടി, ഡിസ്ട്രിക്റ്റ് ജഡ്ജി മാമെ എവുസി-മെൻസാ ഫ്രിംപോങ് അറസ്റ്റുകൾ അവസാനിപ്പിക്കാൻ ഉത്തരവിട്ടിരുന്നു.
