വാഷിംഗ്ടൺ: വാഹനാപകടത്തിൽ ഗുരുതരമായി പരിക്കേറ്റ് ആശുപത്രിയിൽ കഴിയുന്ന മുൻ ന്യൂയോർക്ക് മേയർ റൂഡോൾഫ് ഗില്ലിയാനിയെ രാജ്യത്തെ പരമോന്നത സിവിലിയൻ ബഹുമതിയായ പ്രസിഡൻഷ്യൽ മെഡൽ ഓഫ് ഫ്രീഡം നൽകി ആദരിക്കുമെന്ന് യുഎസ് പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. സോഷ്യൽ മീഡിയ വഴിയായിരുന്നു അദ്ദേഹത്തിന്റെ പ്രഖ്യാപനം.
കഴിഞ്ഞ ശനിയാഴ്ചയുണ്ടായ വാഹനാപകടത്തിൽ പരിക്കേറ്റ ഗില്ലിയാനി ന്യൂ ഹാംഷെയറിലെ ആശുപത്രിയിൽ ചികിത്സയിലാണ്. നട്ടെല്ലിനും കൈകാലുകൾക്കും ഗുരുതര പരിക്കേറ്റ അദ്ദേഹത്തിന്റെ നില തൃപ്തികരമാണെന്ന് ആശുപത്രി അധികൃതർ അറിയിച്ചു.
“ന്യൂയോർക്ക് സിറ്റിയുടെ ചരിത്രത്തിലെ ഏറ്റവും മഹാനായ മേയർ, അതുപോലെ മഹാനായ ഒരു അമേരിക്കൻ ദേശസ്നേഹി,” ട്രംപ് ഗില്ലിയാനിയെ വിശേഷിപ്പിച്ചു. 2001-ലെ സെപ്റ്റംബർ 11 ആക്രമണത്തിന് ശേഷം ന്യൂയോർക്കിനെ നയിച്ചുകൊണ്ട് “അമേരിക്കയുടെ മേയർ” എന്ന വിശേഷണം നേടിയ ഗില്ലിയാനിയുടെ പ്രതിച്ഛായയ്ക്ക് ഈ പുരസ്‌കാരം മാറ്റുകൂട്ടുമെന്നാണ് വിലയിരുത്തൽ.
എന്നാൽ, ട്രംപിന്റെ 2020-ലെ തിരഞ്ഞെടുപ്പ് തട്ടിപ്പ് ആരോപണങ്ങളെ പിന്തുണച്ചതിന് ശേഷം അദ്ദേഹത്തിന്റെ രാഷ്ട്രീയ ജീവിതം വലിയ പ്രതിസന്ധിയിലായിരുന്നു. ഈ പ്രസ്താവന വിവാദങ്ങൾക്ക് തിരികൊളുത്തിയിട്ടുണ്ട്.
