വാഷിംഗ്ടൺ: ചൈനയുടെ സ്റ്റേറ്റ് സെക്യൂരിറ്റി മന്ത്രാലയത്തിനെതിരെ ഗുരുതര സൈബർ ചാരവൃത്തി ആരോപണങ്ങളുടെ പേരിൽ ഏർപ്പെടുത്താൻ ഉദ്ദേശിച്ച ഉപരോധം അമേരിക്ക താൽക്കാലികമായി ഉപേക്ഷിച്ചതായി റിപ്പോർട്ട്. ഈ വർഷം ഇരുരാജ്യങ്ങളും തമ്മിൽ ഉണ്ടാക്കിയ വ്യാപാര വെടിനിർത്തൽ കരാർ തകരാതിരിക്കാനാണ് ഈ തീരുമാനമെന്ന് ബുധനാഴ്ച പുറത്തുവന്ന വാർത്തകൾ വ്യക്തമാക്കുന്നു.
“സോൾട്ട് ടൈഫൂൺ” എന്ന രഹസ്യനാമത്തിലറിയപ്പെടുന്ന വർഷങ്ങളോളം നീണ്ട സൈബർ ആക്രമണപരമ്പരയിൽ അമേരിക്കൻ ടെലികോം കമ്പനികളെയും ഒരു സംസ്ഥാന ആർമി നാഷണൽ ഗാർഡ് നെറ്റ്വർക്കിനെയും ചൈനീസ് ഹാക്കർമാർ ലക്ഷ്യമിട്ടിരുന്നു. ഈ ഗുരുതര ഭീഷണിക്കെതിരെ കടുക്കുന്ന നടപടിയായിരുന്നു ഉപരോധം.
എന്നാൽ, ചൈനയ്ക്കെതിരെ പുതിയ കയറ്റുമതി നിയന്ത്രണങ്ങളും ഏർപ്പെടുത്തില്ലെന്ന് ട്രംപ് ഭരണകൂടം തീരുമാനിച്ചതായി നിരവധി ഉദ്യോഗസ്ഥരെ ഉദ്ധരിച്ച് റിപ്പോർട്ടുകൾ പറയുന്നു. വൈറ്റ് ഹൗസ് ഇതുവരെ ഔദ്യോഗിക പ്രതികരണം നൽകിയിട്ടില്ല.
നീണ്ട വ്യാപാരയുദ്ധത്തിനൊടുവിൽ ഒക്ടോബർ 30-ന് ദക്ഷിണ കൊറിയയിൽ വെച്ച് പ്രസിഡന്റ് ട്രംപും ഷി ജിൻപിംഗും ഒപ്പുവെച്ച ചട്ടക്കൂട് കരാറിന്റെ ഭാഗമായി ചൈനീസ് ഇറക്കുമതിക്ക് 100 ശതമാനം തീരുവ ഏർപ്പെടുത്താതിരിക്കാൻ യുഎസ് സമ്മതിച്ചിരുന്നു. പകരമായി, അപൂർവ ധാതുക്കളുടെയും മാഗ്നറ്റുകളുടെയും കയറ്റുമതി നിയന്ത്രണം ചൈന താൽക്കാലികമായി നിർത്തിവെക്കുകയും ചെയ്തു. സൈബർ സുരക്ഷാ പ്രശ്നങ്ങൾ ഉയർത്തി ഉപരോധം ഏർപ്പെടുത്താതെ വ്യാപാര സമാധാനം നിലനിർത്താനുള്ള ശ്രമത്തിന്റെ ഭാഗമാണ് ഈ പുതിയ നിലപാട്.
