ഭാരതത്തിന്റെ 77-ാം റിപ്പബ്ലിക് ദിനത്തിൽ ഇന്ത്യയ്ക്കും ഇന്ത്യൻ ജനതയ്ക്കും ഹൃദയം നിറഞ്ഞ ആശംസകൾ നേർന്ന് അമേരിക്കൻ പ്രസിഡന്റ് ഡൊണാൾഡ് ട്രംപ്. ഇന്ത്യയും അമേരിക്കയും തമ്മിലുള്ള ബന്ധം വെറും സൗഹൃദമല്ലെന്നും അത് ചരിത്രപരമായ ഒരു വലിയ കൂട്ടുക്കെട്ടാണെന്നും അദ്ദേഹം തന്റെ സന്ദേശത്തിൽ ഓർമ്മിപ്പിച്ചു. ലോകത്തിലെ ഏറ്റവും വലിയ രണ്ട് ജനാധിപത്യ രാജ്യങ്ങൾ എന്ന നിലയിൽ ഇരുരാജ്യങ്ങളും തമ്മിലുള്ള സഹകരണം വരും വർഷങ്ങളിൽ കൂടുതൽ ശക്തമാകുമെന്ന് അദ്ദേഹം പ്രത്യാശ പ്രകടിപ്പിച്ചു.
ഇന്ത്യയുടെ കരുത്തും വളർച്ചയും അത്ഭുതപ്പെടുത്തുന്നതാണെന്നും ആഗോള തലത്തിൽ നിർണ്ണായക പങ്ക് വഹിക്കാൻ ഇന്ത്യയ്ക്ക് സാധിക്കുന്നുണ്ടെന്നും ട്രംപ് തന്റെ സന്ദേശത്തിൽ കുറിച്ചു. പ്രതിരോധം, സാങ്കേതികവിദ്യ, വ്യാപാരം തുടങ്ങിയ മേഖലകളിൽ ഇരുരാജ്യങ്ങളും തമ്മിലുള്ള പങ്കാളിത്തം പുതിയ ഉയരങ്ങളിലേക്ക് എത്തുകയാണെന്നും അദ്ദേഹം ചൂണ്ടിക്കാട്ടി. പ്രധാനമന്ത്രി നരേന്ദ്ര മോദിയുമായുള്ള തന്റെ വ്യക്തിപരമായ സൗഹൃദത്തെക്കുറിച്ചും അദ്ദേഹം പരാമർശിച്ചതായി റിപ്പോർട്ടുകൾ വ്യക്തമാക്കുന്നു.
വാഷിംഗ്ടണിലെ ഇന്ത്യൻ എംബസി സംഘടിപ്പിച്ച റിപ്പബ്ലിക് ദിനാഘോഷങ്ങൾക്കിടയിലാണ് പ്രസിഡന്റ് ട്രംപിന്റെ ഈ സന്ദേശം പുറത്തുവന്നത്. അമേരിക്കയിലെ ഇന്ത്യൻ പ്രവാസി സമൂഹം ഇരുരാജ്യങ്ങൾക്കുമിടയിൽ ഒരു സുപ്രധാനമായ പാലമായി പ്രവർത്തിക്കുന്നുണ്ടെന്നും അദ്ദേഹം അഭിനന്ദിച്ചു. ട്രംപിന്റെ ഈ ഹൃദ്യമായ സന്ദേശം ഇന്ത്യ-അമേരിക്ക ബന്ധത്തിൽ വലിയ പ്രാധാന്യത്തോടെയാണ് രാഷ്ട്രീയ നിരീക്ഷകർ കാണുന്നത്.
