വാഷിംഗ്ടൺ: അമേരിക്കൻ സൈന്യം പസഫിക് സമുദ്രത്തിൽ നടത്തിയ ആക്രമണത്തിൽ രണ്ട് പേർ കൂടി കൊല്ലപ്പെട്ടു. ലഹരിക്കടത്ത് തടയുന്നതിനായി ട്രംപ് ഭരണകൂടം ആരംഭിച്ച ‘ഓപ്പറേഷൻ സതേൺ സ്പിയർ’ എന്ന ദൗത്യത്തിന്റെ ഭാഗമായാണ് വെള്ളിയാഴ്ച ഈ ആക്രമണം നടന്നത്. യുഎസ് സതേൺ കമാൻഡിന്റെ കീഴിലുള്ള ‘ജോയിന്റ് ടാസ്ക് ഫോഴ്സ് സതേൺ സ്പിയർ’ ആണ് പസഫിക് സമുദ്രത്തിൽ ലഹരിക്കടത്ത് സംഘത്തിന്റെ ബോട്ട് ലക്ഷ്യമിട്ട് മാരകമായ ആക്രമണം നടത്തിയത്.
ആക്രമണത്തിൽ ബോട്ടിലുണ്ടായിരുന്ന രണ്ട് പേർ കൊല്ലപ്പെട്ടു. ഒരാൾ രക്ഷപ്പെട്ടതായും ഇയാൾക്കായി യുഎസ് കോസ്റ്റ് ഗാർഡ് തിരച്ചിൽ തുടരുകയാണെന്നും അധികൃതർ അറിയിച്ചു. അമേരിക്കൻ പ്രതിരോധ സെക്രട്ടറി പീറ്റ് ഹെഗ്സെത്തിന്റെ നേരിട്ടുള്ള നിർദ്ദേശപ്രകാരമാണ് ഈ നീക്കം നടന്നതെന്ന് സതേൺ കമാൻഡ് എക്സ് പ്ലാറ്റ്ഫോമിലൂടെ വ്യക്തമാക്കി. ലഹരിക്കടത്ത് നടത്തുന്ന ‘നിയുക്ത ഭീകര സംഘടനകളെ’ നേരിടാനാണ് ഈ ദൗത്യം ലക്ഷ്യമിടുന്നത്. ഈ ഓപ്പറേഷൻ ആരംഭിച്ചതിനുശേഷം ഇതുവരെ വിവിധ ആക്രമണങ്ങളിലായി ഏകദേശം 117 പേർ കൊല്ലപ്പെട്ടതായാണ് റിപ്പോർട്ടുകൾ സൂചിപ്പിക്കുന്നത്. അമേരിക്കൻ തീരങ്ങളിലേക്ക് ലഹരിമരുന്ന് എത്തുന്നത് തടയാൻ സമുദ്രമേഖലകളിൽ കൂടുതൽ കർശനമായ സൈനിക നടപടികൾ തുടരുമെന്ന് ട്രംപ് ഭരണകൂടം ആവർത്തിച്ച് പ്രഖ്യാപിച്ചിട്ടുണ്ട്.
