വാഷിംഗ്ടൺ: കുടിയേറ്റക്കാർക്കെതിരെയുള്ള ട്രംപ് ഭരണകൂടത്തിന്റെ കടുത്ത നടപടികളിൽ പ്രതിഷേധിച്ച് അമേരിക്കയിലുടനീളം വൻ ജനരോഷം. ആയിരക്കണക്കിന് ആളുകൾ തെരുവിലിറങ്ങിയ ‘ദേശീയ പണിമുടക്കിന്റെ’ രണ്ടാം ദിനമായ ശനിയാഴ്ചയും രാജ്യം സംഘർഷഭരിതമായി തുടർന്നു. ഇതിനിടെ, മിനസോട്ടയിലെ വിവാദമായ ഇമിഗ്രേഷൻ ഓപ്പറേഷൻ തടയണമെന്ന ആവശ്യം കോടതി നിരാകരിച്ചത് ഫെഡറൽ ഗവൺമെന്റിന് വലിയ വിജയമായി.
മിനസോട്ടയിലെ ‘ട്വിൻ സിറ്റീസിൽ’ ആയിരക്കണക്കിന് ഏജന്റുമാരെ വിന്യസിച്ച് നടത്തുന്ന ഇമിഗ്രേഷൻ നടപടികൾ തടയണമെന്ന മിനസോട്ട സർക്കാരിന്റെ ഹർജി യുഎസ് ഡിസ്ട്രിക്റ്റ് ജഡ്ജി കാതറിൻ മെനൻഡസ് തള്ളി.
ഓപ്പറേഷൻ തുടരാമെന്നാണ് ശനിയാഴ്ച പുറപ്പെടുവിച്ച വിധിയിൽ കോടതി വ്യക്തമാക്കിയത്. രണ്ട് പേരുടെ മരണത്തിനിടയാക്കിയ ഈ നടപടിയെ ‘ഫെഡറൽ അധിനിവേശം’ എന്നാണ് മിനസോട്ടയും മിനിയാപൊളിസ് അധികൃതരും വിശേഷിപ്പിച്ചത്. വാറന്റില്ലാത്ത അറസ്റ്റുകളും അമിത ബലപ്രയോഗവും നടക്കുന്നുണ്ടെന്നും ഇവർ ആരോപിച്ചു.
പ്രതിഷേധങ്ങൾ കൊടുമ്പിരിക്കൊള്ളുമ്പോഴും നിലപാടിൽ ഉറച്ചുനിൽക്കുകയാണ് പ്രസിഡന്റ് ഡൊണാൾഡ് ട്രംപ്.
ഡെമോക്രാറ്റിക് പാർട്ടിയുടെ ഭരണത്തിലുള്ള നഗരങ്ങളിലെ പ്രതിഷേധങ്ങളിലോ കലാപങ്ങളിലോ പ്രാദേശിക ഉദ്യോഗസ്ഥർ ഔദ്യോഗികമായി സഹായം അഭ്യർത്ഥിക്കാതെ ഇടപെടരുതെന്ന് അദ്ദേഹം ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോമിന് നിർദ്ദേശം നൽകി.
ഇമിഗ്രേഷൻ ഏജന്റുമാർ (ICE) നഗരങ്ങൾ വിട്ടുപോകണമെന്നാവശ്യപ്പെട്ട് കടലോര നഗരങ്ങൾ മുതൽ ഉൾപ്രദേശങ്ങൾ വരെ വൻ പ്രകടനങ്ങൾ നടക്കുന്നു.
സൊമാലിയയിൽ നിന്നുള്ള രേഖകളില്ലാത്ത കുടിയേറ്റക്കാരെയാണ് ഈ ഓപ്പറേഷൻ ലക്ഷ്യമിടുന്നത്. ഇത് മിനിയാപൊളിസിലെ ജനങ്ങളും സർക്കാരും തമ്മിലുള്ള ബന്ധം കൂടുതൽ വഷളാക്കിയിരിക്കുകയാണ്.
