വാഷിംഗ്ടൺ: ഇറാനെതിരായ സംയുക്ത സൈനിക നീക്കങ്ങൾ നാലാം ദിവസവും ശക്തമായി തുടരുന്നതിനിടെ, അമേരിക്കയുമായി ചർച്ചയ്ക്ക് ഇറാൻ സന്നദ്ധത പ്രകടിപ്പിച്ചതായി പ്രസിഡന്റ് ഡോണൾഡ് ട്രംപ് അവകാശപ്പെട്ടു. എന്നാൽ ചർച്ചകൾക്കുള്ള സമയം അതിക്രമിച്ചു കഴിഞ്ഞുവെന്ന നിലപാടാണ് അദ്ദേഹം ഇപ്പോൾ സ്വീകരിച്ചിരിക്കുന്നത്. ഇറാന്റെ വ്യോമ പ്രതിരോധ സംവിധാനങ്ങളും വ്യോമസേനയും നാവികസേനയും തകർന്നടിഞ്ഞെന്നും അവരുടെ നേതൃത്വം ഇല്ലാതായെന്നും അവകാശപ്പെട്ട ട്രംപ്, ഇപ്പോൾ അവർ സംസാരിക്കാൻ ആഗ്രഹിക്കുന്നു, എന്നാൽ അത് വളരെ വൈകിപ്പോയി എന്ന് തന്റെ സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിലൂടെ വ്യക്തമാക്കി.
കഴിഞ്ഞ ശനിയാഴ്ച അമേരിക്കയും ഇസ്രായേലും ചേർന്ന് ഇറാനിൽ ആക്രമണം ആരംഭിച്ചതിന് പിന്നാലെ, ഇറാൻ നേതൃത്വവുമായി സംസാരിക്കാൻ താൻ തയ്യാറാണെന്ന് ട്രംപ് ഞായറാഴ്ച സൂചിപ്പിച്ചിരുന്നു. ഇറാൻ ചർച്ചകൾക്കായി സമീപിച്ചെന്നും താൻ അതിന് സമ്മതം മൂളിയെന്നും അന്ന് അദ്ദേഹം പറഞ്ഞിരുന്നുവെങ്കിലും, വരും ദിവസങ്ങളിൽ തന്റെ നിലപാട് കർക്കശമാക്കുകയായിരുന്നു അദ്ദേഹം. അവർ ഇത് നേരത്തെ ചെയ്യേണ്ടതായിരുന്നു എന്നതായിരുന്നു ഞായറാഴ്ചത്തെ അദ്ദേഹത്തിന്റെ പ്രതികരണം.
സൈനിക നടപടികൾക്ക് മുന്നോടിയായി അമേരിക്കയും ഇറാനും തമ്മിൽ മൂന്ന് റൗണ്ട് ചർച്ചകൾ നടന്നിരുന്നു. ഇതിൽ അവസാന ഘട്ട ചർച്ചകൾ കഴിഞ്ഞ ആഴ്ച ജനീവയിലാണ് അവസാനിച്ചത്. എന്നാൽ ഈ ചർച്ചകൾ പരാജയപ്പെട്ടതിനെത്തുടർന്നാണ് ട്രംപ് ഭരണകൂടം അതിശക്തമായ സൈനിക നീക്കങ്ങളിലേക്ക് കടന്നത്. നിലവിൽ ഇറാന്റെ സൈനിക ശേഷി ഗണ്യമായി കുറഞ്ഞുവെന്നും ലക്ഷ്യങ്ങൾ വേഗത്തിൽ പൂർത്തിയാക്കുമെന്നുമാണ് വൈറ്റ് ഹൗസ് നൽകുന്ന സൂചന.
