തിരുവനന്തപുരം/ന്യൂഡൽഹി: കേരളത്തിലെ യുഡിഎഫ് വിജയത്തിന് പിന്നാലെ മുഖ്യമന്ത്രിയെ തീരുമാനിക്കാനുള്ള ചർച്ചകൾ ഡൽഹിയിൽ നിർണ്ണായക ഘട്ടത്തിലേക്ക്. വി.ഡി. സതീശനും രമേശ് ചെന്നിത്തലയും സ്ഥാനത്തിനായി ഉറച്ചുനിൽക്കുന്നതോടെ ഹൈക്കമാൻഡ് കടുത്ത സമ്മർദ്ദത്തിലായി. ഗ്രൂപ്പ് വൈരങ്ങൾ തെരുവിലേക്ക് പടരുന്നതിനിടെ, ഇരുപക്ഷവും തങ്ങളുടെ വാദങ്ങളുമായി ഹൈക്കമാൻഡിനെ സമീപിച്ചിരിക്കുകയാണ്. പ്രതിപക്ഷ നേതാവെന്ന നിലയിൽ വിജയത്തിന് ചുക്കാൻ പിടിച്ച തനിക്ക് പദവി നൽകണമെന്ന് സതീശൻ പക്ഷം ആവശ്യപ്പെടുമ്പോൾ, മുതിർന്ന നേതാവെന്ന നിലയിൽ ചെന്നിത്തലയെ പരിഗണിക്കണമെന്ന് അദ്ദേഹത്തെ അനുകൂലിക്കുന്നവർ വാദിക്കുന്നു.
തിരുവനന്തപുരത്തും കോട്ടയത്തും ഇരുനേതാക്കൾക്കുമായി പ്രവർത്തകർ ഫ്ലക്സ് ബോർഡുകൾ ഉയർത്തുകയും പ്രകടനങ്ങൾ നടത്തുകയും ചെയ്തത് ഹൈക്കമാൻഡിനെ ചൊടിപ്പിച്ചിട്ടുണ്ട്. ചേരിതിരിഞ്ഞുള്ള നീക്കങ്ങൾ അവസാനിപ്പിക്കണമെന്ന് വി.ഡി സതീശൻ പരസ്യമായി അഭ്യർത്ഥിച്ചെങ്കിലും അണിയറയിൽ ചർച്ചകൾ കൊഴുക്കുകയാണ്. അതിനിടെ, കെ.സി വേണുഗോപാലിന്റെ പേരും മുഖ്യമന്ത്രി സ്ഥാനത്തേക്ക് ഉയർന്നു വരുന്നുണ്ട്. തർക്കം പരിഹരിക്കാനായില്ലെങ്കിൽ ഒരു ‘സർപ്രൈസ്’ സ്ഥാനാർത്ഥിയെ ഹൈക്കമാൻഡ് മുന്നോട്ട് വെച്ചേക്കുമെന്ന സൂചനകളും പുറത്തുവരുന്നുണ്ട്.
ഡൽഹിയിൽ എഐസിസി അധ്യക്ഷന്റെ നേതൃത്വത്തിൽ നടക്കുന്ന ചർച്ചകളിൽ സംസ്ഥാനത്തിന്റെ ചുമതലയുള്ള നേതാക്കളും പങ്കെടുക്കുന്നുണ്ട്. ഘടകകക്ഷികൾക്കും വി.ഡി സതീശനോടാണ് കൂടുതൽ താൽപ്പര്യമെങ്കിലും ഗ്രൂപ്പ് സമവാക്യങ്ങൾ പഴുതടച്ച് പരിഹരിക്കാനാണ് കേന്ദ്ര നേതൃത്വത്തിന്റെ നീക്കം. വരും മണിക്കൂറുകളിൽ നിരീക്ഷകർ കേരളത്തിലെത്തി എംഎൽഎമാരുടെ രഹസ്യ ബാലറ്റിലൂടെയുള്ള അഭിപ്രായം തേടും. ഇതിനുശേഷമായിരിക്കും കേരളത്തിന്റെ പുതിയ മുഖ്യമന്ത്രി ആരാണെന്ന കാര്യത്തിൽ ഔദ്യോഗിക പ്രഖ്യാപനമുണ്ടാവുക.
