വാഷിംഗ്ടൺ: പ്രസിഡന്റ് ഡോണൾഡ് ട്രംപിന്റെ രാഷ്ട്രീയ എതിരാളികൾക്കെതിരായ അന്വേഷണങ്ങൾ പലതും തിരിച്ചടികൾ നേരിടുന്നതിനിടെ, ട്രംപിന്റെ കടുത്ത വിമർശകരിലൊരാളായ മുൻ ദേശീയ സുരക്ഷാ ഉപദേഷ്ടാവ് ജോൺ ബോൾട്ടൺ ദേശീയ സുരക്ഷാ വിവരങ്ങൾ നിയമവിരുദ്ധമായി കൈവശംവെച്ച കേസിൽ കുറ്റം സമ്മതിച്ചു. വെള്ളിയാഴ്ച ഫെഡറൽ കോടതിയിൽ ഹാജരായ ബോൾട്ടൺ കുറ്റസമ്മതം നടത്തിയതോടെ കേസിൽ ശിക്ഷാ നടപടികളിലേക്ക് നീങ്ങുകയാണ്. അതീവ രഹസ്യസ്വഭാവമുള്ള ദേശീയ സുരക്ഷാ രേഖകൾ അനധികൃതമായി കൈവശംവെച്ചെന്ന കുറ്റമാണ് ബോൾട്ടണിനെതിരെ ചുമത്തിയിരിക്കുന്നത്.
ട്രംപിന്റെ രാഷ്ട്രീയ എതിരാളികൾക്കെതിരായ ജസ്റ്റിസ് ഡിപ്പാർട്ട്മെന്റിന്റെ അന്വേഷണങ്ങളിൽ ശ്രദ്ധേയമായ മുന്നേറ്റമായാണ് ഈ സംഭവവികാസം വിലയിരുത്തപ്പെടുന്നത്. കോടതിയിൽ കുറ്റം ചെയ്തിട്ടുണ്ടോയെന്ന ജഡ്ജിയുടെ ചോദ്യത്തിന് താൻ കുറ്റക്കാരനാണെന്നും സംഭവത്തിൽ ഖേദമുണ്ടെന്നും ബോൾട്ടൺ മറുപടി നൽകി. പ്രോസിക്യൂഷനും പ്രതിഭാഗവും തമ്മിലുള്ള പ്ലീ അഗ്രിമെന്റിന്റെ അടിസ്ഥാനത്തിൽ പരമാവധി 60 മാസത്തെ തടവും 22.5 ലക്ഷം ഡോളർ പിഴയുമാണ് ശുപാർശ ചെയ്തിരിക്കുന്നത്. പിഴത്തുകയുടെ പകുതി ശിക്ഷാവിധി പ്രഖ്യാപിച്ചതിന് അഞ്ച് ദിവസത്തിനകം അടയ്ക്കണമെന്നും കരാറിൽ വ്യവസ്ഥയുണ്ട്.
അതേസമയം, ഈ കുറ്റത്തിന് നിയമപ്രകാരം പരമാവധി 10 വർഷം വരെ തടവുശിക്ഷ ലഭിക്കാമെന്ന് കോടതി ചൂണ്ടിക്കാട്ടി. ശിക്ഷാ നിർണയവുമായി ബന്ധപ്പെട്ട മാർഗനിർദേശങ്ങൾ സ്വതന്ത്രമായി വിലയിരുത്തുമെന്നും, അത് പ്രോസിക്യൂഷനും പ്രതിഭാഗവും തമ്മിലുള്ള ധാരണയിൽ നിന്ന് വ്യത്യസ്തമായിരിക്കാമെന്നും ഹിയറിംഗിനിടെ ജഡ്ജി തിയോഡോർ ചുവാങ് ബോൾട്ടണിന് മുന്നറിയിപ്പ് നൽകി. വെള്ളിയാഴ്ച രാവിലെ ഫെഡറൽ കോടതിയിലെത്തിയ ബോൾട്ടൺ മാധ്യമങ്ങളുടെ ചോദ്യങ്ങൾക്ക് പ്രതികരിക്കാൻ തയ്യാറായില്ല. കേസിൽ ശിക്ഷാവിധി പിന്നീട് പ്രഖ്യാപിക്കും.
