കാവേരി നദീജലം പങ്കുവെക്കുന്നതുമായി ബന്ധപ്പെട്ട് കർണാടക, തമിഴ്നാട് മുഖ്യമന്ത്രിമാർ നടത്താനിരുന്ന നിർണായക കൂടിക്കാഴ്ച റദ്ദാക്കിയതായി കർണാടക ഉപമുഖ്യമന്ത്രി ഡി.കെ. ശിവകുമാർ അറിയിച്ചു. നിലവിൽ തമിഴ്നാടുമായി ചർച്ച നടത്തുന്നതിന് അനുയോജ്യമായ സാഹചര്യമല്ല ഉള്ളതെന്നും അതിനാൽ തിങ്കളാഴ്ചത്തെ കൂടിക്കാഴ്ചയ്ക്കായി തമിഴ്നാട് മുഖ്യമന്ത്രി വിജയ് ബെംഗളൂരുവിലേക്ക് വരേണ്ടതില്ലെന്ന് അഭ്യർത്ഥിക്കുമെന്നും അദ്ദേഹം വ്യക്തമാക്കി. തമിഴ്നാട് മുഖ്യമന്ത്രിക്കെതിരെ കന്നഡ സംഘടനകൾ പ്രതിഷേധം കടുപ്പിച്ചതും വിമാനത്താവളത്തിൽ തടയുമെന്ന് മുന്നറിയിപ്പ് നൽകിയതുമാണ് കൂടിക്കാഴ്ച നീട്ടിവെക്കാൻ സർക്കാരിനെ പ്രേരിപ്പിച്ചത്.
തമിഴ്നാടിന് പ്രതിദിനം 3,500 ക്യുസെക്സ് വീതം 15 ദിവസത്തേക്ക് വെള്ളം തുറന്നുവിടണമെന്ന കാവേരി വാട്ടർ റെഗുലേഷൻ കമ്മിറ്റിയുടെ (സി.ഡബ്ല്യു.ആർ.സി.) ഉത്തരവാണ് പ്രതിഷേധങ്ങൾക്ക് കാരണമായത്. മഴക്കുറവും ജലസംഭരണികളിലെ കുറഞ്ഞ ജലനിരപ്പും കാരണം വെള്ളം വിട്ടുനൽകിയാൽ ബെംഗളൂരുവിൽ കുടിവെള്ളക്ഷാമം രൂക്ഷമാകുമെന്നാണ് കർണാടകയുടെ നിലപാട്. ഉത്തരവിനെതിരെ കാവേരി വാട്ടർ മാനേജ്മെന്റ് അതോറിറ്റിയെ സമീപിക്കാൻ കർണാടക തീരുമാനിച്ചപ്പോൾ, വെള്ളം ഉടൻ വിട്ടുനൽകണമെന്ന ആവശ്യത്തിൽ തമിഴ്നാട് ഉറച്ചുനിൽക്കുകയാണ്.
തർക്കം രൂക്ഷമായതോടെ വിഷയത്തിൽ ഓഗസ്റ്റ് 13-ന് കർണാടകയിൽ 12 മണിക്കൂർ ബന്ദിന് കന്നഡ സംഘടനകൾ ആഹ്വാനം ചെയ്തു. രാവിലെ 6 മുതൽ വൈകീട്ട് 6 വരെയാണ് ബന്ദ് പ്രഖ്യാപിച്ചിരിക്കുന്നത്. പതിറ്റാണ്ടുകളായി തുടരുന്ന കാവേരി ജലതർക്കം ഇതോടെ വീണ്ടും വൻ രാഷ്ട്രീയ-നിയമ പോരാട്ടങ്ങളിലേക്കും പരസ്യമായ പ്രക്ഷോഭങ്ങളിലേക്കും വഴിമാറിയിരിക്കുകയാണ്.
