വിവാദങ്ങളും ആരോപണങ്ങളും നേരിടുന്ന ജയിൽമേധാവി എസ്. ശ്രീജിത്തിന് ഡിജിപിയായി സ്ഥാനക്കയറ്റം നൽകിയ സർക്കാർ നടപടിയിൽ കടുത്ത വിമർശനവുമായി ഹൈക്കോടതി. ആരോപണവിധേയനായ ഉദ്യോഗസ്ഥന് സ്ഥാനക്കയറ്റം നൽകാൻ എന്താണ് ഇത്ര തിടുക്കമെന്ന് ചോദിച്ച കോടതി, ഹർജി പരിഗണനയിലിരിക്കെ തിടുക്കത്തിൽ തീരുമാനമെടുത്തത് ചട്ടങ്ങൾക്ക് വിരുദ്ധമാണെന്ന് വ്യക്തമാക്കി.
എഡിജിപിയെ ഡിജിപി പദവിയിലേക്ക് ഉയർത്തുമ്പോൾ നിർബന്ധമായും ഉണ്ടായിരിക്കേണ്ട വിജിലൻസ് ക്ലിയറൻസ് ഇവിടെ പാലിക്കപ്പെട്ടിട്ടില്ലെന്ന് കോടതി ചൂണ്ടിക്കാട്ടി. മുൻകൂട്ടി അനുമതി വാങ്ങാതെ വിദേശയാത്ര നടത്തിയതടക്കമുള്ള ഗുരുതര വിവാദങ്ങൾ നിലനിൽക്കെയാണ് ആഭ്യന്തര വകുപ്പ് ശ്രീജിത്തിന് ഡിജിപിയായി പ്രൊമോഷൻ നൽകി ഉത്തരവിറക്കിയത്. കോടതി നിർദേശങ്ങൾ അവഗണിച്ചതിൽ ഹൈക്കോടതി കടുത്ത അതൃപ്തി രേഖപ്പെടുത്തി.
എഡിജിപി എം.ആർ. അജിത് കുമാർ സസ്പെൻഷനിലായ സാഹചര്യത്തിലാണ് ശ്രീജിത്തിന് ഡിജിപിയായി വഴിതുറന്നത്. നവകേരള സദസിനിടെ ഗൺമാൻമാർ നടത്തിയ മർദന കേസ് അട്ടിമറിക്കാൻ നീക്കം നടത്തിയതിനെ തുടർന്നായിരുന്നു അജിത് കുമാറിനെതിരെ നടപടിയുണ്ടായത്. നിലവിൽ സ്ഥാനക്കയറ്റം ലഭിച്ചെങ്കിലും ശ്രീജിത്ത് ജയിൽ മേധാവിയായി തന്നെ തുടരും.
