തിരുവനന്തപുരം: മുഖ്യമന്ത്രിയെ വഴിയിൽ തടഞ്ഞുനിർത്തി അധിക്ഷേപിച്ച കേസിൽ അറസ്റ്റിലായ പ്രതിക്കെതിരെ ഗൂഢാലോചനക്കുറ്റം കൂടി ചുമത്താൻ പോലീസ് തീരുമാനം. ഇതുമായി ബന്ധപ്പെട്ട വിശദമായ റിപ്പോർട്ട് പോലീസ് ഇന്ന് കോടതിയിൽ സമർപ്പിക്കും.
മുഖ്യമന്ത്രി ചടങ്ങിൽ പങ്കെടുക്കില്ലെന്ന് മുൻകൂട്ടി അറിഞ്ഞിട്ടും, അദ്ദേഹത്തെ മനഃപൂർവം വഴിയിൽ തടഞ്ഞ് ആക്ഷേപിക്കാനും പൊതുജനമധ്യത്തിൽ അപമാനിക്കാനും ആസൂത്രിതമായി ഗൂഢാലോചന നടന്നതായാണ് പോലീസിന്റെ പ്രാഥമിക നിഗമനം. ഇതിന്റെ പശ്ചാത്തലത്തിലാണ് കേസിൽ കൂടുതൽ വകുപ്പുകൾ കൂട്ടിച്ചേർക്കുന്നത്.
സംഭവത്തിൽ കൂടുതൽ പേർക്ക് പങ്കാളിത്തമുണ്ടോയെന്ന് പോലീസ് വിശദമായി അന്വേഷിച്ചുവരികയാണ്. ഇതിനായി പ്രതിയുടെ മൊബൈൽ ഫോൺ കസ്റ്റഡിയിലെടുത്ത് സന്ദേശങ്ങളും കോൾ വിവരങ്ങളും കേന്ദ്രീകരിച്ച് ശാസ്ത്രീയ പരിശോധന നടത്താനും പോലീസ് തീരുമാനിച്ചിട്ടുണ്ട്.
കഴിഞ്ഞ ദിവസമാണ് ചെമ്പഴന്തിയിലെ പരിപാടിക്കിടെ മുഖ്യമന്ത്രിയുടെ വാഹനവ്യൂഹം തടയുകയും വഴിയിൽ വെച്ച് അധിക്ഷേപിക്കുകയും ചെയ്തത്. സംഭവം ഗുരുതരമായ സുരക്ഷാ വീഴ്ചയാണെന്ന വിലയിരുത്തലിലാണ് പോലീസ് അന്വേഷണം ഊർജ്ജിതമാക്കിയിരിക്കുന്നത്.
