കോൺഗ്രസ് നേതാക്കളും സഹോദരങ്ങളുമായ രാഹുൽ ഗാന്ധിക്കും പ്രിയങ്കാ ഗാന്ധിക്കുമിടയിൽ അഭിപ്രായവ്യത്യാസങ്ങൾ നിലനിൽക്കുന്നുണ്ടെന്ന പുതിയ ആരോപണവുമായി ബിജെപി. പ്രിയങ്കയുടെ മകൻ റെയ്ഹാൻ വാദ്രയുടെ ഫോട്ടോ പ്രദർശനത്തിൽനിന്ന് ചില രാഷ്ട്രീയ ചിത്രങ്ങൾ നീക്കം ചെയ്യേണ്ടി വന്ന വിവാദത്തിൽ രാഹുൽ ഗാന്ധി ഇതുവരെ പ്രതികരിക്കാത്തത് ആയുധമാക്കിയാണ് ബിജെപി വക്താവ് പ്രദീപ് ഭണ്ഡാരി ഈ വാദവുമായി എത്തിയത്. കോൺഗ്രസിൽ രാഹുലും പ്രിയങ്കയും നേർക്കുനേരെയാണെന്ന് അദ്ദേഹം സമൂഹമാധ്യമമായ എക്സിൽ കുറിച്ചു.
റെയ്ഹാൻ വാദ്രയുടെ ബിക്കാനീർ ഹൗസിലെ ഫോട്ടോ പ്രദർശനവുമായി ബന്ധപ്പെട്ട വിവാദങ്ങൾ ഇതിനോടകം രാഷ്ട്രീയ തലത്തിൽ വലിയ ചർച്ചയായിട്ടുണ്ട്. രാഷ്ട്രീയ ഉള്ളടക്കമില്ലെന്ന് കാണിച്ച് അനുമതി വാങ്ങിയ ശേഷം പ്രദർശനത്തിൽ രാഷ്ട്രീയ ചിത്രങ്ങൾ ഉൾപ്പെടുത്തുകയായിരുന്നുവെന്നും, തുടർന്നാണ് അവ നീക്കം ചെയ്യാൻ അധികൃതർ ആവശ്യപ്പെട്ടതെന്നും പ്രദീപ് ഭണ്ഡാരി വ്യക്തമാക്കുന്നു. വിവാദങ്ങളിലൂടെ മകനെ രാഷ്ട്രീയത്തിലേക്ക് കൊണ്ടുവരാനാണ് പ്രിയങ്ക ശ്രമിക്കുന്നതെന്നും, എന്നാൽ ഇതിൽ രാഹുൽ ഗാന്ധിക്ക് താല്പര്യമില്ലെന്നുമാണ് ബിജെപിയുടെ പ്രധാന ആരോപണം.
മറ്റു പല വിഷയങ്ങളിലും സാമൂഹിക മാധ്യമങ്ങളിലൂടെ നിരന്തരം പ്രതികരിക്കുന്ന രാഹുൽ ഗാന്ധി, റെയ്ഹാന്റെ വിഷയത്തിൽ യാതൊരു പ്രതികരണവും നടത്താത്തത് ഇരുവർക്കുമിടയിലെ ഭിന്നതയാണ് വ്യക്തമാക്കുന്നതെന്നും ബിജെപി കുറ്റപ്പെടുത്തുന്നു. കുടുംബത്തിനുള്ളിലെ ഈ വടംവലി കോൺഗ്രസിനുള്ളിലെ അധികാര തർക്കങ്ങളുടെ പ്രതിഫലനമാണെന്നാണ് ബിജെപിയുടെ വാദം. വിവാദത്തിൽ കോൺഗ്രസ് നേതൃത്വം ഇതുവരെ ഔദ്യോഗികമായി പ്രതികരിച്ചിട്ടില്ലെങ്കിലും ഈ വിഷയം രാഷ്ട്രീയമായി ചൂടുപിടിച്ചിരിക്കുകയാണ്.
