വാഷിംഗടണ്‍: കാലിഫോര്‍ണിയയില്‍ വോട്ടര്‍ പട്ടികയുമായി ബന്ധപ്പെട്ട വിവാദത്തില്‍ പ്രസിഡന്റ് ഡൊണാള്‍ഡ് ട്രംപ് ഭരണകൂടത്തിന് തിരിച്ചടി. സംശയാസ്പദമായ വോട്ടര്‍മാരുടേതെന്ന് ആരോപിക്കപ്പെടുന്ന 20,000 തപാല്‍ വോട്ടുകള്‍ പ്രത്യേകം മാറ്റിവയ്ക്കണമെന്ന നീതിന്യായ വകുപ്പിന്റെ അടിയന്തര ആവശ്യം ഫെഡറല്‍ അപ്പീല്‍ കോടതി തള്ളി. തിങ്കളാഴ്ചയാണ് ഒമ്പതാം സര്‍ക്യൂട്ട് അപ്പീല്‍ കോടതിയിലെ മൂന്നംഗ ബെഞ്ച് രണ്ടിനെതിരെ ഒന്നെന്ന ഭൂരിപക്ഷത്തില്‍ തീരുമാനമെടുത്തത്. കേസിന്റെ ഈ ഘട്ടത്തില്‍ ഇടപെടാന്‍ കോടതിക്ക് അധികാരമില്ലെന്നാണ് ഭൂരിപക്ഷത്തിന്റെ നിലപാട്. ഇതോടെ കേസ് വീണ്ടും ജില്ലാ കോടതിയുടെ പരിഗണനയ്ക്ക് വിട്ടു. വിഷയത്തില്‍ ചൊവ്വാഴ്ച ഉച്ചയ്ക്ക് ജില്ലാ കോടതിയില്‍ വാദം നടക്കും.
അടുത്ത ആഴ്ച നടക്കാനിരിക്കുന്ന ഇടക്കാല തിരഞ്ഞെടുപ്പിനായി കാലിഫോര്‍ണിയയില്‍ തപാല്‍ വോട്ടുകള്‍ വിതരണം ചെയ്തവരില്‍ അമേരിക്കന്‍ പൗരന്മാരല്ലാത്തവരുണ്ടെന്നായിരുന്നു ട്രംപ് ഭരണകൂടത്തിന്റെ ആരോപണം. ഇത്തരക്കാരുടെ പട്ടിക പരിശോധിക്കുന്നതില്‍ സംസ്ഥാന സര്‍ക്കാര്‍ വീഴ്ച വരുത്തിയെന്നും നീതിന്യായ വകുപ്പ് ആരോപിച്ചു. ഇതിന്റെ അടിസ്ഥാനത്തിലാണ് ഈ മാസം ആദ്യം കാലിഫോര്‍ണിയക്കെതിരെ കേസ് ഫയല്‍ ചെയ്തത്. എന്നാല്‍ 20,000 പേരുടെ പട്ടികയിലെ 200 പേരെക്കുറിച്ച് നടത്തിയ പ്രാഥമിക പരിശോധനയില്‍, വലിയൊരു വിഭാഗം അമേരിക്കയില്‍ ജനിച്ചവരാണെന്ന് വ്യക്തമാകുന്നതായി ലോസ് ആഞ്ചലസ് അധികൃതര്‍ കോടതിയെ അറിയിച്ചു. പരിശോധിച്ച രേഖകളില്‍ 40 ശതമാനത്തോളം പേര്‍ അമേരിക്കയില്‍ ജനിച്ചവരാണെന്നും 71.2 ശതമാനം പേരുടെയും രേഖകളില്‍ മുന്‍കാല വോട്ടിംഗ് വിവരങ്ങളില്ലെന്നും അധികൃതര്‍ വ്യക്തമാക്കി.
അപ്പീല്‍ കോടതിയിലെ ജഡ്ജിമാരായ മാര്‍ക്ക് ബെന്നറ്റും ഗബ്രിയേല്‍ സാഞ്ചസും ട്രംപ് ഭരണകൂടത്തിന്റെ ആവശ്യം നിരസിച്ചപ്പോള്‍, ട്രംപ് നിയമിച്ച മറ്റൊരു ജഡ്ജിയായ പാട്രിക് ബുമറ്റേയ് വിയോജിച്ചു. അടിയന്തര ഇടപെടല്‍ ആവശ്യപ്പെട്ട സര്‍ക്കാര്‍ തന്നെ കേസ് ഫയല്‍ ചെയ്യുന്നതില്‍ കാലതാമസം വരുത്തിയതായി ഭൂരിപക്ഷ വിധിയില്‍ ചൂണ്ടിക്കാട്ടി. കാലിഫോര്‍ണിയയിലെ തിരഞ്ഞെടുപ്പ് നടപടികള്‍ സംസ്ഥാന നിയമപ്രകാരമാണ് നിയന്ത്രിക്കപ്പെടുന്നതെന്നും ദശലക്ഷക്കണക്കിന് വോട്ടര്‍മാരുടെ വോട്ടുകള്‍ കൈകാര്യം ചെയ്യാന്‍ ആവശ്യമായ സമയക്രമം സംസ്ഥാനത്തിനുണ്ടെന്നും കോടതി നിരീക്ഷിച്ചു. അതിനാല്‍ സര്‍ക്കാര്‍ ഉന്നയിക്കുന്ന അടിയന്തര സാഹചര്യം ഭാഗികമായെങ്കിലും സര്‍ക്കാര്‍ തന്നെ സൃഷ്ടിച്ചതാണെന്നും ജഡ്ജിമാര്‍ വ്യക്തമാക്കി.
കേസിന്റെ നിയമപരമായ അടിത്തറയെക്കുറിച്ചും കോടതി ആശങ്ക പ്രകടിപ്പിച്ചു. അമേരിക്കന്‍ ഭരണഘടനയിലെ തിരഞ്ഞെടുപ്പ് വ്യവസ്ഥകള്‍ പ്രകാരം തിരഞ്ഞെടുപ്പ് നടത്തിപ്പിന്റെ രീതികള്‍ നിയന്ത്രിക്കാനുള്ള അധികാരം സംസ്ഥാന നിയമനിര്‍മാണ സഭകള്‍ക്കാണെന്ന വാദമാണ് പ്രധാനമായും ഉയര്‍ന്നത്. അമേരിക്കന്‍ കോണ്‍ഗ്രസും കാലിഫോര്‍ണിയ നിയമസഭയും പൗരന്മാരല്ലാത്തവര്‍ക്ക് വോട്ട് ചെയ്യുന്നത് നിയമവിരുദ്ധമാക്കിയിരിക്കെ, ഫെഡറല്‍ ക്രിമിനല്‍ നിയമം ചൂണ്ടിക്കാട്ടി സംസ്ഥാനത്തിന്റെ തിരഞ്ഞെടുപ്പ് നടപടികളില്‍ എങ്ങനെ ഇടപെടാനാകുമെന്ന് ജഡ്ജി മാര്‍ക്ക് ബെന്നറ്റ് നീതിന്യായ വകുപ്പ് അഭിഭാഷകനോട് ചോദിച്ചു. ജില്ലാ കോടതിയില്‍ ചൊവ്വാഴ്ച വാദം നിശ്ചയിച്ചിരിക്കെ അടിയന്തരമായി അപ്പീല്‍ കോടതിയെ സമീപിച്ചതിന്റെ ആവശ്യകതയും അദ്ദേഹം ചോദ്യം ചെയ്തു.
അതേസമയം, കാലിഫോര്‍ണിയയുടെ തിരഞ്ഞെടുപ്പ് നടപടികള്‍ ഫെഡറല്‍ നിയമം നടപ്പാക്കുന്നതിന് തടസമാകുന്നുവെന്നാണ് നീതിന്യായ വകുപ്പിന്റെ വാദം. പൗരന്മാരല്ലാത്തവര്‍ വോട്ട് ചെയ്യുന്നത് തടയാനുള്ള ഫെഡറല്‍ സര്‍ക്കാരിന്റെ അധികാരത്തെ സംസ്ഥാനത്തിന്റെ നടപടികള്‍ ബാധിക്കുന്നുവെന്നും സര്‍ക്കാര്‍ അഭിഭാഷകന്‍ വാദിച്ചു. എന്നാല്‍ തപാല്‍ വോട്ടുകളുടെ പരിശോധനയും തിരഞ്ഞെടുപ്പ് നടത്തിപ്പും സംബന്ധിച്ച അധികാരപരിധി, വോട്ടര്‍മാരുടെ പൗരത്വം സ്ഥിരീകരിക്കുന്ന രീതി തുടങ്ങിയ വിഷയങ്ങളില്‍ നിയമപരമായ തര്‍ക്കം തുടരുകയാണ്. അപ്പീല്‍ കോടതി അടിയന്തര ഉത്തരവ് പുറപ്പെടുവിക്കാന്‍ വിസമ്മതിച്ചതോടെ കേസിന്റെ അടുത്ത ഘട്ടം ജില്ലാ കോടതിയിലെ വാദത്തെ ആശ്രയിച്ചിരിക്കും. അമേരിക്കയിലെ തിരഞ്ഞെടുപ്പ് സുരക്ഷയും സംസ്ഥാന-ഫെഡറല്‍ അധികാരബന്ധവും സംബന്ധിച്ച ചര്‍ച്ചകള്‍ക്ക് ഈ കേസ് കൂടുതല്‍ പ്രാധാന്യം നല്‍കുന്നു
California voter roll controversy: Appeals court declines to intervene in Trump’s petition
