വാഷിംഗ്ടണ്‍: അമേരിക്കയുടെ ഗള്‍ഫ് തീരത്തേക്ക് നീങ്ങുന്ന ഇസയാസ് ചുഴലിക്കാറ്റ് കാറ്റഗറി രണ്ടായി ശക്തിയാര്‍ജിച്ചതോടെ തീരമേഖലകളില്‍ അതീവ ജാഗ്രത പ്രഖ്യാപിച്ചു. വ്യാഴാഴ്ച രാത്രിയോടെ കാറ്റിന്റെ വേഗം മണിക്കൂറില്‍ 169 കിലോമീറ്റര്‍ വരെ ഉയര്‍ന്നതായി ദേശീയ ചുഴലിക്കാറ്റ് കേന്ദ്രം അറിയിച്ചു. ഫ്‌ലോറിഡയിലെ പാന്‍ഹാന്‍ഡില്‍ മേഖലയെ ലക്ഷ്യമാക്കി വടക്കോട്ട് നീങ്ങുന്ന ചുഴലിക്കാറ്റ് വെള്ളിയാഴ്ച രാത്രിയോടെ കരതൊടുമെന്നാണ് പ്രവചനം. അറ്റ്‌ലാന്റിക് സമുദ്രത്തിലെ ഈ സീസണിലെ ആദ്യ ചുഴലിക്കാറ്റാണ് ഇസയാസ്.
മിസിസിപ്പി തീരത്തുനിന്ന് ഏകദേശം 418 കിലോമീറ്റര്‍ അകലെയായിരുന്ന ചുഴലിക്കാറ്റ് വെള്ളിയാഴ്ചയോടെ താല്‍ക്കാലികമായി കാറ്റഗറി മൂന്നിലേക്ക് ശക്തിപ്രാപിക്കാന്‍ സാധ്യതയുണ്ടെന്ന് മുന്നറിയിപ്പുണ്ട്. പിന്നീട് ശക്തി കുറയുമെന്നാണ് പ്രവചനമെങ്കിലും വടക്കന്‍ ഗള്‍ഫ് തീരത്തെത്തുമ്പോള്‍ അപകടകാരിയായി തുടരുമെന്നാണ് അധികൃതരുടെ വിലയിരുത്തല്‍. മിസിസിപ്പി മുതല്‍ ഫ്‌ലോറിഡയിലെ ഹോഴ്‌സ്ഷൂ ബീച്ച് വരെയുള്ള പ്രദേശങ്ങളില്‍ കടല്‍ക്ഷോഭ മുന്നറിയിപ്പ് പുറപ്പെടുവിച്ചിട്ടുണ്ട്. മിസിസിപ്പി തീരം മുതല്‍ ഫ്‌ലോറിഡയുടെ പടിഞ്ഞാറന്‍ പാന്‍ഹാന്‍ഡില്‍ മേഖലവരെ അഞ്ച് മുതല്‍ ഏഴ് അടി വരെ ഉയരത്തില്‍ കടല്‍വെള്ളം കരയിലേക്ക് കയറാന്‍ സാധ്യതയുണ്ടെന്നും മുന്നറിയിപ്പുണ്ട്.
ചുഴലിക്കാറ്റിനെ നേരിടാന്‍ ഫ്‌ലോറിഡയിലും അലബാമയിലും അടിയന്തര നടപടികള്‍ ശക്തമാക്കി. ഫ്‌ലോറിഡയില്‍ 25 കൗണ്ടികളിലും അലബാമയില്‍ 40 കൗണ്ടികളിലും അടിയന്തരാവസ്ഥ പ്രഖ്യാപിച്ചു. ഫ്‌ലോറിഡയിലെ തീരപ്രദേശങ്ങളിലും താഴ്ന്ന പ്രദേശങ്ങളിലുമുള്ള നിരവധി കൗണ്ടികളില്‍നിന്ന് ജനങ്ങളോട് ഒഴിഞ്ഞുപോകാന്‍ നിര്‍ദേശിച്ചിട്ടുണ്ട്. ദുരിതാശ്വാസ കേന്ദ്രങ്ങളും സജ്ജമാക്കിയതായി അധികൃതര്‍ അറിയിച്ചു. ഒഴിപ്പിക്കല്‍ മേഖലകളിലുള്ളവര്‍ നിര്‍ദേശങ്ങള്‍ കര്‍ശനമായി പാലിക്കണമെന്ന് ഫ്‌ലോറിഡ ഗവര്‍ണര്‍ റോണ്‍ ഡിസാന്റിസ് ആവശ്യപ്പെട്ടു. വൈദ്യുതി തടസ്സങ്ങള്‍ പരിഹരിക്കുന്നതിനും അവശ്യസാധനങ്ങള്‍ സംഭരിക്കുന്നതിനും ജനങ്ങളെ സുരക്ഷിതമായി മാറ്റുന്നതിനുമായി ദേശീയ ഗാര്‍ഡിനെയും അടിയന്തര സേവന വിഭാഗങ്ങളെയും വിന്യസിച്ചിട്ടുണ്ട്.
അലബാമ ഗവര്‍ണര്‍ കേയ് ഐവിയും ജനങ്ങള്‍ക്ക് ജാഗ്രതാനിര്‍ദേശം നല്‍കി. ബാള്‍ഡ്വിന്‍ കൗണ്ടിയില്‍ ഗള്‍ഫ് ഇന്റര്‍കോസ്റ്റല്‍ വാട്ടര്‍വേയുടെ തെക്കുഭാഗത്തുള്ള പ്രദേശങ്ങളില്‍ താമസക്കാരല്ലാത്തവരെല്ലാം ഇവിടെ നിന്നും ഒഴിഞ്ഞുപോകാന്‍ നിര്‍ദേശം നല്‍കി.
ഗള്‍ഫ് ഷോര്‍സ്, ഓറഞ്ച് ബീച്ച്, മൊബൈല്‍ കൗണ്ടിയിലെ ഡോഫിന്‍ ദ്വീപ് എന്നിവിടങ്ങളും ഇതില്‍ ഉള്‍പ്പെടുന്നു. ഏറ്റവും പുതിയ പ്രവചനമനുസരിച്ച് ചുഴലിക്കാറ്റ് പെന്‍സക്കോളയ്ക്ക് സമീപം വെള്ളിയാഴ്ച രാത്രി കരതൊടാനാണ് സാധ്യത. കരതൊടുന്നതിന് മുമ്പ് കാറ്റിന്റെ ശക്തി കുറഞ്ഞ് കാറ്റഗറി ഒന്നായി മാറിയേക്കുമെന്നും കാലാവസ്ഥാ നിരീക്ഷകര്‍ വിലയിരുത്തുന്നു.
വെള്ളിയാഴ്ച രാവിലെ ന്യൂ ഓര്‍ലിയന്‍സ് മുതല്‍ പെന്‍സക്കോള വരെയുള്ള ഗള്‍ഫ് തീരമേഖലയില്‍ ശക്തമായ കാറ്റിനും മഴയ്ക്കും സാധ്യതയുണ്ട്. വെള്ളിയാഴ്ച മുതല്‍ ഈ ആഴ്ച്ച ്അവസാനം വരെ മധ്യ ഗള്‍ഫ് തീരപ്രദേശങ്ങളില്‍ നാല് മുതല്‍ എട്ട് ഇഞ്ച് വരെ മഴ ലഭിച്ചേക്കും. ചില പ്രദേശങ്ങളില്‍ മഴയുടെ അളവ് 15 ഇഞ്ച് വരെയാകാമെന്നും മുന്നറിയിപ്പുണ്ട്. ഒറ്റപ്പെട്ട ചുഴലിക്കാറ്റുകള്‍ക്കും സാധ്യതയുള്ളതിനാല്‍ ജനങ്ങള്‍ ജാഗ്രത പാലിക്കണമെന്ന് അധികൃതര്‍ നിര്‍ദേശിച്ചു. ചുഴലിക്കാറ്റ് കരതൊടുന്ന പ്രദേശങ്ങളിലും അതിന്റെ കിഴക്കന്‍ ഭാഗങ്ങളിലും ഉയര്‍ന്ന തിരമാലകളും ശക്തമായ കടല്‍ക്ഷോഭവും ഉണ്ടാകാന്‍ സാധ്യതയുണ്ട്. തീരദേശവാസികള്‍ ഔദ്യോഗിക മുന്നറിയിപ്പുകള്‍ നിരന്തരം ശ്രദ്ധിക്കുകയും സുരക്ഷാ നിര്‍ദേശങ്ങള്‍ പാലിക്കുകയും ചെയ്യണമെന്ന് അധികൃതര്‍ അഭ്യര്‍ഥിച്ചു.
Hurricane Isaias is moving rapidly towards the US Gulf Coast; wind speed is 169 km/h.
