അമേരിക്കയിൽ നവംബർ മൂന്നിന് നടക്കുന്ന ഇടക്കാല തിരഞ്ഞെടുപ്പിൽ തങ്ങളുടെ രാഷ്ട്രീയ പ്രാതിനിധ്യം വൻതോതിൽ വർധിപ്പിക്കാനുള്ള ഒരുക്കത്തിലാണ് ഇന്ത്യൻ വംശജർ. ഗവർണർ പദവി മുതൽ യു.എസ് കോൺഗ്രസ്, സംസ്ഥാന നിയമസഭകൾ, പ്രാദേശിക ഭരണസമിതികൾ വരെയുള്ള വിവിധ അധികാര കേന്ദ്രങ്ങളിലേക്ക് പ്രധാന പാർട്ടികളായ റിപ്പബ്ലിക്കൻ, ഡെമോക്രാറ്റിക് ടിക്കറ്റുകളിലും സ്വതന്ത്ര സ്ഥാനാർഥികളായും നിരവധി ഇന്ത്യൻ വംശജർ ജനവിധി തേടുന്നുണ്ട്. ഒഹായോ സംസ്ഥാനത്തെ ഗവർണർ മത്സരമാണ് ഇത്തവണ ഏറ്റവും ശ്രദ്ധയാകർഷിക്കുന്നത്. ഇവിടെ ഡെമോക്രാറ്റിക് സ്ഥാനാർഥി ആമി ആക്ടനെതിരെ റിപ്പബ്ലിക്കൻ പാർട്ടി ടിക്കറ്റിൽ മത്സരിക്കുന്നത് ഇന്ത്യൻ വംശജനായ വിവേക് രാമസ്വാമിയാണ്. വിജയിക്കുകയാണെങ്കിൽ ബോബി ജിൻഡാൾ, നിക്കി ഹേലി എന്നിവർക്കുശേഷം അമേരിക്കയിലെ മൂന്നാമത്തെ ഇന്ത്യൻ വംശജനായ ഗവർണറായി രാമസ്വാമി മാറും.
നിലവിലെ ജനപ്രതിനിധികളും പ്രമുഖ നേതാക്കളും തങ്ങളുടെ പദവികൾ നിലനിർത്താൻ വീണ്ടും മത്സരരംഗത്തുണ്ട്. മേരിലാൻഡ് ലെഫ്റ്റനന്റ് ഗവർണറായ അരുണ മില്ലർ ജനവിധി തേടുന്ന പ്രമുഖരിൽ ഉൾപ്പെടുന്നു. ഇവർക്ക് പുറമേ യു.എസ് ജനപ്രതിനിധി സഭയിലെ ഡെമോക്രാറ്റിക് അംഗങ്ങളായ റോ ഖന്ന, അമി ബെറ, പ്രമീള ജയപാൽ, സുഹാസ് സുബ്രഹ്മണ്യം എന്നിവരും വീണ്ടും തിരഞ്ഞെടുപ്പിനെ നേരിടുന്നുണ്ട്. ഒപ്പം തന്നെ, ചില മണ്ഡലങ്ങളിൽ ഇന്ത്യൻ വംശജർ തമ്മിൽ നേർക്കുനേർ പോരാട്ടവും നടക്കുന്നുണ്ട്. കാലിഫോർണിയയിലെ 17-ാം കോൺഗ്രഷണൽ ഡിസ്ട്രിക്റ്റിൽ റോ ഖന്നയ്ക്കെതിരെ റിപ്പബ്ലിക്കൻ സ്ഥാനാർഥിയായി റിതേഷ് ടാണ്ഡനും, വാഷിങ്ടണിലെ 7-ാം കോൺഗ്രഷണൽ ഡിസ്ട്രിക്റ്റിൽ പ്രമീള ജയപാലിനെതിരെ റിപ്പബ്ലിക്കൻ സ്ഥാനാർഥിയായി നീരവ് ഷെത്തും മത്സരിക്കുന്നു.
യു.എസ് ജനപ്രതിനിധി സഭയിലേക്ക് മത്സരരംഗത്തുള്ള പുതുമുഖങ്ങളും സ്വതന്ത്ര സ്ഥാനാർഥികളുമായ ഇന്ത്യൻ വംശജരും വലിയ ശ്രദ്ധ നേടുന്നുണ്ട്. ഫ്ലോറിഡയിൽ മുൻ സ്കൂൾ പ്രിൻസിപ്പലായ പിയ ദാണ്ടിയയും അരിസോണയിൽ എമർജൻസി വിഭാഗം ഡോക്ടറായ അമിഷ് ഷായും ഡെമോക്രാറ്റിക് പാർട്ടി ടിക്കറ്റിൽ മത്സരിക്കുന്നു. നോർത്ത് കരോലിനയിൽ മഹേഷ് ഗണോർക്കർ റിപ്പബ്ലിക്കൻ സ്ഥാനാർഥിയായും, ഒഹായോയിൽ സന്ദീപ് ദീക്ഷിതും മിഷിഗണിൽ അനിൽ കുമാറും സ്വതന്ത്ര സ്ഥാനാർഥികളായും ജനവിധി തേടുന്നുണ്ട്.
സംസ്ഥാന നിയമസഭകളിലും ഭരണകൂട പദവികളിലും ഉയർന്ന ചുമതലകളിലേക്ക് എത്തിച്ചേരാൻ നിരവധിയാളുകൾ മത്സരരംഗത്തുണ്ട്. അരിസോണ സ്റ്റേറ്റ് സെനറ്റ് മൈനോറിറ്റി ലീഡറായ പ്രിയ സുന്ദരേശനും മിഷിഗൺ ഹൗസ് മൈനോറിറ്റി ലീഡറായ രൺജീവ് പുരിയും വീണ്ടും മത്സരിക്കുമ്പോൾ, തങ്ങളുടെ പാർട്ടികൾ ഭൂരിപക്ഷം നേടിയാൽ യഥാക്രമം സെനറ്റ് പ്രസിഡന്റ്, ഹൗസ് സ്പീക്കർ പദവികളിൽ എത്താൻ അവസരമുണ്ട്. ന്യൂയോർക്ക് അറ്റോർണി ജനറൽ പദവിയിലേക്ക് ഡൊണാൾഡ് ട്രംപിന്റെ പിന്തുണയോടെ റിപ്പബ്ലിക്കൻ സ്ഥാനാർഥി സരിത കൊമാഡിറെഡ്ഡി മത്സരിക്കുമ്പോൾ, വിസ്കോൺസിൻ അറ്റോർണി ജനറലായി ജോഷ് കൗളും ന്യൂയോർക്ക് സെനറ്റിലേക്ക് ലിസ കൗളും ടെക്സാസ് ഹൗസിലേക്ക് പൂജ സേത്തിയും ജനവിധി തേടുന്നു.
നഗര ഭരണസമിതികളിലും പ്രാദേശിക തലത്തിലും നിർണായക സാന്നിധ്യമായി ഇന്ത്യൻ വംശജർ മാറിയിട്ടുണ്ട്. അമേരിക്കയിലെ രണ്ടാമത്തെ വലിയ നഗരമായ ലോസ് ആഞ്ചലസിലെ മേയർ പദവിയിലേക്ക് നിത്യ രാമൻ മത്സരിക്കുമ്പോൾ, ജോർജിയയിലെ ഫോർസിത്ത് കൗണ്ടി കമ്മിഷണർ പദവിയിലേക്ക് മത്സരിക്കുന്ന ആദ്യ ഇന്ത്യൻ വംശജയായി ചാർട്ടേഡ് അക്കൗണ്ടന്റായ ശുചിത പട്ടേൽ മാറി. യു.എസ് കോൺഗ്രസിലെ 435 ഹൗസ് സീറ്റുകളിലേക്കും 100 അംഗ സെനറ്റിലെ 37 സീറ്റുകളിലേക്കുമാണ് നവംബർ മൂന്നിന് വോട്ടെടുപ്പ് നടക്കുന്നത്. പ്രസിഡന്റ് ഡൊണാൾഡ് ട്രംപിനും റിപ്പബ്ലിക്കൻ പാർട്ടിക്കും ഭരണത്തിന്റെ വിലയിരുത്തലാകുന്ന ഈ തിരഞ്ഞെടുപ്പിൽ ജനപ്രതിനിധി സഭയുടെ ഭൂരിപക്ഷം നഷ്ടപ്പെടാൻ സാധ്യതയുണ്ടെന്നാണ് സർവേകൾ സൂചിപ്പിക്കുന്നത്. ഈ സാഹചര്യത്തിൽ 52 ലക്ഷം വരുന്ന ഇന്ത്യൻ വംശജരുടെ വോട്ടുകളും നിലപാടുകളും അമേരിക്കൻ രാഷ്ട്രീയത്തിൽ നിർണായക സ്വാധീനം ചെലുത്തുമെന്നാണ് കരുതപ്പെടുന്നത്.
