കണ്ണൂർ: കെ.എസ്.യു പ്രവർത്തകരുടെ പ്രതിഷേധത്തിനിടെ പരിക്കേറ്റ് ചികിത്സയിൽ കഴിയുന്ന ആരോഗ്യ മന്ത്രി വീണാ ജോർജിന്റെ ആരോഗ്യനിലയിൽ ആശ്വാസകരമായ പുരോഗതിയെന്ന് മെഡിക്കൽ ബുള്ളറ്റിൻ. മന്ത്രിയുടെ കടുത്ത വേദനയ്ക്ക് കുറവുണ്ടെന്നും നിലവിൽ അടിയന്തര ശസ്ത്രക്രിയയുടെ ആവശ്യമില്ലെന്നും ഡോക്ടർമാർ അറിയിച്ചു.
കഴുത്തിലെ കശേരുക്കൾക്കേറ്റ സമ്മർദ്ദം മൂലമുണ്ടായ കടുത്ത വേദനയ്ക്ക് ശമനമുണ്ട്.
മരുന്നുകളുടെ സഹായത്തോടെ ബി.പി നിയന്ത്രണവിധേയമാക്കിയിട്ടുണ്ട്.
യാത്ര ചെയ്യുന്നത് ആരോഗ്യനിലയെ ബാധിക്കാൻ സാധ്യതയുള്ളതിനാൽ പരിയാരം മെഡിക്കൽ കോളേജിൽ തന്നെ ചികിത്സ തുടരും.
കഴിഞ്ഞ ദിവസം വൈകിട്ട് മൂന്നരയോടെ കണ്ണൂർ റെയിൽവേ സ്റ്റേഷനിൽ വെച്ചാണ് സംഭവമുണ്ടായത്. തിരുവനന്തപുരത്തേക്ക് പോകാൻ വന്ദേഭാരത് ട്രെയിൻ കാത്തുനിൽക്കുകയായിരുന്ന മന്ത്രിയെ കെ.എസ്.യു പ്രവർത്തകർ കരിങ്കൊടി കാണിക്കുകയും തടയാൻ ശ്രമിക്കുകയും ചെയ്തു. പൊലീസിന്റെ സുരക്ഷാ വലയം ഭേദിച്ചെത്തിയ പ്രവർത്തകർക്കിടയിൽ പെട്ടാണ് മന്ത്രിയുടെ കഴുത്തിന് പരിക്കേറ്റത്. ഉടൻ തന്നെ കണ്ണൂർ ജില്ലാ ആശുപത്രിയിലും പിന്നീട് വിദഗ്ധ ചികിത്സയ്ക്കായി പരിയാരം മെഡിക്കൽ കോളേജിലും പ്രവേശിപ്പിച്ചു.
രാഷ്ട്രീയ വിവാദം:
മന്ത്രിയെ കെ.എസ്.യു പ്രവർത്തകർ ശാരീരികമായി ഉപദ്രവിച്ചു എന്ന സി.പി.എം ആരോപണം പ്രതിപക്ഷം തള്ളിക്കളഞ്ഞു. മന്ത്രിയുടെ ഗൺമാന്റെ വസ്ത്രമാണ് കരിങ്കൊടി എന്ന പേരിൽ സി.പി.എം പ്രചരിപ്പിക്കുന്നതെന്ന് പ്രതിപക്ഷ നേതാവ് കുറ്റപ്പെടുത്തി. സംഭവത്തിൽ ഉന്നതതല ഗൂഢാലോചന ആരോപിച്ചു യൂത്ത് കോൺഗ്രസ് ഡി.ജി.പിക്ക് പരാതി നൽകിയിട്ടുണ്ട്. കേസിൽ രാഷ്ട്രീയ വാക്പോര് തുടരുകയാണ്.
