ടെഹ്റാൻ: തങ്ങളുടെ രാജ്യത്തിന് നേരെ ഉണ്ടാകുന്ന ഏതൊരു പുതിയ അധിനിവേശ ശ്രമത്തിനും മുൻപത്തേക്കാൾ ശക്തവും മാരകവുമായ രീതിയിലായിരിക്കും മറുപടി നൽകുകയെന്ന് അമേരിക്കയ്ക്കും സഖ്യകക്ഷികൾക്കും കടുത്ത മുന്നറിയിപ്പ് നൽകി ഇറാന്റെ മുതിർന്ന സൈനിക കമാൻഡർ. അമേരിക്കൻ ഉപരോധങ്ങളും മിഡിൽ ഈസ്റ്റിലെ കപ്പലുകൾക്ക് നേരെയുള്ള മിസൈലാക്രമണങ്ങളും തുടരുന്ന പശ്ചാത്തലത്തിലാണ് ഇറാന്റെ ഭാഗത്തുനിന്ന് ഈ കടുത്ത പ്രസ്താവന പുറത്തുവന്നിരിക്കുന്നത്.
ഇറാന്റെ ഔദ്യോഗിക മാധ്യമമായ ‘പ്രസ് ടിവി’ പുറത്തുവിട്ട റിപ്പോർട്ടുകൾ പ്രകാരം, ഇറാന്റെ ഡെപ്യൂട്ടി ആർമി കമാൻഡർ (കോർഡിനേഷൻ) റിയർ അഡ്മിറൽ ഹബീബുള്ള സയ്യാരിയാണ് ശത്രുരാജ്യങ്ങൾക്ക് കർശനമായ താക്കീത് നൽകിയത്. “രാജ്യത്തിന്റെ പരമാധികാര അതിരുകൾക്ക് നേരെ ഉണ്ടാകുന്ന ചെറിയൊരു അധിനിവേശ ശ്രമത്തിന് പോലും മുൻപ് നൽകിയതിനേക്കാൾ അതിശക്തമായ മറുപടിയായിരിക്കും ശത്രുക്കൾക്ക് ലഭിക്കുക എന്ന് അവർ നന്നായി മനസ്സിലാക്കണം.” – റിയർ അഡ്മിറൽ ഹബീബുള്ള സയ്യാരി വ്യക്തമാക്കി.
ഇസ്ലാമിക് റിപ്പബ്ലിക്കിന്റെ സൈന്യം ഇന്ന് എല്ലാവിധ സജ്ജീകരണങ്ങളോടെയും അതീവ ദൃഢതയോടെയുമാണ് നിലകൊള്ളുന്നതെന്നും, ശത്രുക്കളുടെ ഭാഗത്തുനിന്നുള്ള ഏത് ശത്രുതാപരമായ നീക്കത്തെയും നേരിടാൻ രാജ്യം പൂർണ്ണ സജ്ജമാണെന്നും അദ്ദേഹം കൂട്ടിച്ചേർത്തു. കഴിഞ്ഞ ദിവസങ്ങളിൽ അമേരിക്കൻ സൈന്യം ഇറാനിലേക്ക് പോകുകയായിരുന്ന ചരക്കുകപ്പൽ മിസൈലയച്ച് തകർത്തതിന് പിന്നാലെ, ഹോർമുസ് കടലിടുക്കിന്റെ നിയന്ത്രണം ശക്തമാക്കിക്കൊണ്ട് തങ്ങളും യുദ്ധത്തിന് തയ്യാറാണെന്ന വ്യക്തമായ സൂചനയാണ് ഈ പ്രസ്താവനയിലൂടെ ഇറാൻ നൽകുന്നത്.
