വാഷിംഗ്ടൺ: അമേരിക്കയും ഇറാനും തമ്മിലുള്ള യുദ്ധം അവസാനിപ്പിക്കാനായി ഇറാൻ മുന്നോട്ടുവെച്ച പുതിയ നിർദ്ദേശങ്ങൾ യുഎസ് പ്രസിഡന്റ് ഡോണൾഡ് ട്രംപ് തള്ളിയതോടെ ആഗോള വിപണിയിൽ എണ്ണവില വീണ്ടും ഉയർന്നു. സമാധാന ചർച്ചകൾ വഴിമുട്ടുന്നതും സംഘർഷം കൂടുതൽ ശക്തമാകാനുള്ള സാധ്യതയുമാണ് വിപണിയിൽ ആശങ്ക പടർത്തുന്നത്. ഇതോടെ തന്ത്രപ്രധാനമായ ഹോർമുസ് കടലിടുക്ക് കൂടുതൽ കാലം അടഞ്ഞുകിടക്കുമെന്ന ഭീതിയും വർധിച്ചു.
അന്താരാഷ്ട്ര വിപണിയിൽ ബ്രെന്റ് ക്രൂഡ് ഓയിലിന്റെ വില 2.9 ശതമാനം വർധിച്ച് ബാരലിന് 104.2 ഡോളറിലെത്തി. അമേരിക്കൻ വിപണിയിലെ മാനദണ്ഡമായ ഡബ്ല്യു.ടി.ഐ (WTI) ക്രൂഡ് വില 2.4 ശതമാനം ഉയർന്ന് 97.7 ഡോളറിലുമെത്തി. ഇറാന്റെ സമാധാന നിർദ്ദേശങ്ങൾ തികച്ചും അസ്വീകാര്യമാണെന്നാണ് കഴിഞ്ഞ ദിവസം ട്രംപ് വ്യക്തമാക്കിയത്. ഹോർമുസ് കടലിടുക്കിന് മേലുള്ള തങ്ങളുടെ പരമാധികാരം അംഗീകരിക്കണമെന്നും യുദ്ധക്കെടുതികൾക്ക് നഷ്ടപരിഹാരം നൽകണമെന്നുമാണ് ഇറാൻ പ്രധാനമായും ആവശ്യപ്പെടുന്നത്.
യുദ്ധം ആരംഭിച്ചതിനുശേഷം എണ്ണവിലയിൽ ഏകദേശം 45 ശതമാനത്തിന്റെ വർധനവാണ് ഉണ്ടായിരിക്കുന്നത്. അതായത് ബാരലിന് 30 ഡോളറോളം വില വർധിച്ചു. ലോകത്തെ എണ്ണ-പ്രകൃതിവാതക വിതരണത്തിന്റെ അഞ്ചിലൊന്നും കടന്നുപോകുന്ന ഹോർമുസ് കടലിടുക്ക് തടസ്സപ്പെട്ടതാണ് ഈ വിലക്കയറ്റത്തിന് പ്രധാന കാരണം. സൗദി അറേബ്യയും യുഎഇയും എണ്ണ കയറ്റുമതിക്കായി ബദൽ മാർഗങ്ങൾ കണ്ടെത്തിയിട്ടുണ്ടെങ്കിലും, പ്രതിദിനം 10 മുതൽ 12 ദശലക്ഷം ബാരൽ വരെ ക്രൂഡ് ഓയിൽ ഇപ്പോഴും ആഗോള വിപണിയിൽ എത്താതെ കുടുങ്ങിക്കിടക്കുകയാണെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു.
ഇരുപക്ഷവും ചർച്ചകളിൽ മേൽക്കൈ നേടാൻ ശ്രമിക്കുന്നതിന്റെ ഭാഗമാണ് നിലവിലെ തർക്കങ്ങളെന്ന് നിരീക്ഷകർ വിലയിരുത്തുന്നുണ്ടെങ്കിലും, ഹോർമുസ് കടലിടുക്ക് അടഞ്ഞുകിടക്കുന്നത് ആഗോള സമ്പദ്വ്യവസ്ഥയ്ക്ക് വലിയ പ്രത്യാഘാതങ്ങൾ സൃഷ്ടിക്കുമെന്നാണ് മുന്നറിയിപ്പ്. ചർച്ചകൾ നീണ്ടുപോകുന്നത് വിപണിയിലെ അസ്ഥിരത വർധിപ്പിക്കാൻ കാരണമാകും.
