ടെഹ്റാൻ/ദോഹ: ഇസ്രായേലിന്റെ ആവശ്യപ്രകാരമാണ് അമേരിക്ക ഇറാനെതിരെ യുദ്ധം ആരംഭിച്ചതെന്നും, എന്നാൽ ഇപ്പോൾ യുഎസ് പ്രസിഡന്റ് ഡോണൾഡ് ട്രംപ് കടുത്ത പ്രതിസന്ധിയിലാണ് അകപ്പെട്ടിരിക്കുന്നതെന്നും വിദഗ്ധൻ. ടെഹ്റാനിലെ സെന്റർ ഫോർ സ്ട്രാറ്റജിക് സ്റ്റഡീസിന്റെ ജേണലിലെ ഗവേഷകനും എഴുത്തുകാരനുമായ അലി അക്ബർ ദാരേനി ‘അൽ ജസീറ’യ്ക്ക് നൽകിയ അഭിമുഖത്തിലാണ് അമേരിക്കയ്ക്കെതിരെ കടുത്ത ഭാഷയിൽ വിമർശനമുന്നയിച്ചത്.
“യുദ്ധം വീണ്ടും ആരംഭിക്കാൻ ട്രംപിന് മുന്നിൽ നല്ല വഴികളൊന്നുമില്ല. കാരണം അദ്ദേഹം യുദ്ധം പരീക്ഷിച്ചു നോക്കുകയും അത് പരാജയപ്പെടുകയും ചെയ്തു. യുദ്ധം വീണ്ടും തുടങ്ങിയാൽ അതിന്റെ കടുത്ത രാഷ്ട്രീയ-സാമ്പത്തിക പ്രത്യാഘാതങ്ങൾ നേരിടേണ്ടി വരുമെന്ന് ട്രംപിന് നന്നായറിയാം. അത് സംഭവിച്ചാൽ ലോക സമ്പദ്വ്യവസ്ഥ തന്നെ തകർന്നടിയും,” അലി അക്ബർ ദാരേനി വ്യക്തമാക്കി.
അമേരിക്ക കരാർ വ്യവസ്ഥകളിൽ നിന്ന് പിന്നോട്ട് പോകുകയാണെന്ന് ഇറാൻ കരുതുന്നതായി അദ്ദേഹം ചൂണ്ടിക്കാട്ടി. “അമേരിക്കക്കാർ സമയം നീട്ടിക്കൊണ്ടുപോകാനും ഭാവിയിൽ വീണ്ടുമൊരു യുദ്ധത്തിന് തയ്യാറെടുക്കാനുമാണ് ഇപ്പോൾ ശ്രമിക്കുന്നത് എന്നാണ് ടെഹ്റാന്റെ വിലയിരുത്തൽ. അതുകൊണ്ടുതന്നെ അതിനെ പ്രതിരോധിക്കാൻ ഇറാനും പൂർണ്ണ സജ്ജമായിക്കൊണ്ടിരിക്കുകയാണ്,” അദ്ദേഹം കൂട്ടിച്ചേർത്തു. അമേരിക്കൻ പ്രതിരോധ സെക്രട്ടറി പീറ്റ് ഹെഗ്സെത്ത് സൈനിക നടപടിക്ക് യു.എസ് സന്നദ്ധമാണെന്ന് പ്രസ്താവിച്ചതിന് തൊട്ടുപിന്നാലെയാണ് ഇറാന്റെ ഭാഗത്തുനിന്നുള്ള ഈ തന്ത്രപരമായ നിരീക്ഷണം പുറത്തുവരുന്നത്.
