വാഷിംഗ്ടൺ: അമേരിക്കയും ഇറാനും തമ്മിൽ നിലനിൽക്കുന്ന യുദ്ധം അവസാനിപ്പിക്കാനായി ഇരുരാജ്യങ്ങളും ഒരു ഹ്രസ്വ ധാരണാപത്രത്തിലേക്ക് അടുക്കുന്നതായി റിപ്പോർട്ടുകൾ. നയതന്ത്ര ചർച്ചകളുമായി സഹകരിക്കുന്ന പ്രാദേശിക വൃത്തങ്ങളാണ് ഈ ശുഭസൂചന നൽകുന്നത്. എന്നാൽ, മുൻകാലങ്ങളിൽ അവസാന നിമിഷം ചർച്ചകൾ പരാജയപ്പെട്ട ചരിത്രമുള്ളതിനാൽ ട്രംപ് ഭരണകൂടത്തിലെ ഉന്നത ഉദ്യോഗസ്ഥർ അതീവ ജാഗ്രതയിലാണ്. പാകിസ്ഥാൻ മധ്യസ്ഥർ വഴി ഇറാൻ വിട്ടുവീഴ്ചകൾക്ക് തയ്യാറാണെന്ന അനുകൂല സന്ദേശം വൈറ്റ് ഹൗസിന് ലഭിച്ചതായും റിപ്പോർട്ടുകൾ സൂചിപ്പിക്കുന്നു.
സങ്കീർണ്ണമായ വിഷയങ്ങൾ ലഘൂകരിച്ചുകൊണ്ട് ഇറാനിലെ മിതവാദികളെ ചർച്ചാ മേശയിലേക്ക് തിരികെ എത്തിക്കാനാണ് യുഎസ് പ്രസിഡന്റ് ഡോണൾഡ് ട്രംപിന്റെ ഇപ്പോഴത്തെ നീക്കം. ഇതിന്റെ ഭാഗമായി തയ്യാറാക്കിയ ഏക പേജ് പ്ലാനിൽ യുദ്ധം അവസാനിപ്പിക്കുന്ന പ്രഖ്യാപനവും തുടർന്ന് സങ്കീർണ്ണമായ തർക്കവിഷയങ്ങൾ പരിഹരിക്കാൻ 30 ദിവസത്തെ പ്രത്യേക ചർച്ചാ കാലയളവും നിർദ്ദേശിക്കുന്നു. ആണവ പദ്ധതികൾ, മരവിപ്പിച്ച ഇറാനിയൻ ആസ്തികൾ, ഹോർമുസ് കടലിടുക്കിലെ സുരക്ഷ എന്നിവയുൾപ്പെടെയുള്ള വിഷയങ്ങളാണ് ഈ ഘട്ടത്തിൽ ചർച്ച ചെയ്യുക. യുറേനിയം സമ്പുഷ്ടീകരണത്തിന് പത്ത് വർഷത്തിലേറെ നിരോധനം ഏർപ്പെടുത്തുന്നതും ഇറാൻ കൈവശം വെച്ചിരിക്കുന്ന ഉയർന്ന അളവിലുള്ള യുറേനിയം വിദേശത്തേക്ക് മാറ്റുന്നതും കരാറിന്റെ ഭാഗമായേക്കും.
ചർച്ചകളിലെ പുരോഗതിയെത്തുടർന്ന് ഹോർമുസ് കടലിടുക്കിൽ കുടുങ്ങിക്കിടക്കുന്ന കപ്പലുകളെ പുറത്തെത്തിക്കാനുള്ള ‘പ്രൊജക്റ്റ് ഫ്രീഡം’ എന്ന സൈനിക നീക്കം താൽക്കാലികമായി നിർത്തിവെക്കാൻ പ്രസിഡന്റ് ട്രംപ് ഉത്തരവിട്ടു. അമേരിക്കൻ സൈനിക സമ്മർദ്ദം വർദ്ധിക്കുന്നത് ഇറാനിലെ തീവ്രവാദികളെ പ്രകോപിപ്പിക്കുമെന്ന വിലയിരുത്തലിനെത്തുടർന്നാണ് നയതന്ത്ര നീക്കങ്ങൾക്ക് മുൻഗണന നൽകുന്നത്. നിലവിലെ സാഹചര്യത്തിൽ യുദ്ധം അവസാനിപ്പിക്കാനും കടലിടുക്കിലെ തടസ്സങ്ങൾ നീക്കി ഗതാഗതം പുനഃസ്ഥാപിക്കാനുമാണ് ട്രംപ് ഭരണകൂടം മുഖ്യ പരിഗണന നൽകുന്നത്.
