അമേരിക്കൻ-ഇസ്രയേൽ സംയുക്ത ആക്രമണത്തിൽ കൊല്ലപ്പെട്ട ഇറാന്റെ മുൻ പരമോന്നത നേതാവ് ആയത്തുള്ള അലി ഖമേനിയുടെ സംസ്കാര ചടങ്ങുകൾ സംബന്ധിച്ച ഔദ്യോഗിക വിവരങ്ങൾ പുറത്ത്. പുതിയ പരമോന്നത നേതാവായ മുജ്തബ ഖമേനിയുടെ ഭാര്യയും ഈ ആക്രമണത്തിൽ കൊല്ലപ്പെട്ടിട്ടുണ്ടെന്നും ഇവരുടെ മൃതദേഹവും ഒപ്പം സംസ്കരിക്കുമെന്നും ഇറാൻ വ്യക്തമാക്കി. സുരക്ഷാ കാരണങ്ങളാൽ പുതിയ പരമോന്നത നേതാവ് മുജ്തബ ഖമേനി ചടങ്ങുകളിൽ പങ്കെടുക്കുന്നില്ല. അന്തരിച്ച ഖമേനി, മകൾ, മകളുടെ ഭർത്താവ്, പേരക്കുട്ടി, മരുമകൾ എന്നിവരുടെ മൃതദേഹങ്ങളാണ് പൊതുദർശനത്തിന് വെച്ചിരിക്കുന്നത്. ഒന്നര കോടിയിലധികം ജനങ്ങൾ പൊതുദർശന ചടങ്ങുകളിൽ പങ്കെടുക്കുമെന്നാണ് പ്രതീക്ഷിക്കുന്നത്. ഇറാന്റെ രാഷ്ട്രീയ-സൈനിക നേതൃത്വം ഒന്നടങ്കം പങ്കെടുക്കുന്ന ചടങ്ങിൽ കനത്ത സുരക്ഷാ ആശങ്കകളുമുണ്ട്.
അതേസമയം, ഖമേനിയുടെ സംസ്കാര ചടങ്ങുകളിൽ നിന്ന് വിവിധ രാജ്യങ്ങളെ പിന്തിരിപ്പിക്കാൻ അമേരിക്ക കടുത്ത സമ്മർദ്ദം ചെലുത്തിയതായി ഇറാൻ മാധ്യമങ്ങൾ ആരോപിച്ചു. അമേരിക്കൻ സ്റ്റേറ്റ് സെക്രട്ടറിയുടെ ഭീഷണിയെത്തുടർന്ന് മൂന്ന് കിഴക്കൻ യൂറോപ്യൻ രാജ്യങ്ങളും അഞ്ച് ആഫ്രിക്കൻ രാജ്യങ്ങളും ഗൾഫ് രാജ്യങ്ങളും ഉൾപ്പെടെ 13 രാഷ്ട്രങ്ങൾ ചടങ്ങുകളിൽ നിന്ന് വിട്ടുനിന്നതായി ഇറാന്റെ തസ്നീം ന്യൂസ് ഏജൻസി റിപ്പോർട്ട് ചെയ്തു. എന്നാൽ അമേരിക്കൻ സമ്മർദ്ദങ്ങൾക്കിടയിലും നൂറിലധികം രാജ്യങ്ങളിൽ നിന്നുള്ള പ്രതിനിധികൾ പൊതുദർശന ചടങ്ങിൽ പങ്കെടുത്തതായി ഇറാൻ അവകാശപ്പെട്ടു. ഖത്തർ, ഒമാൻ, സൗദി അറേബ്യ തുടങ്ങിയ രാജ്യങ്ങളുടെ പങ്കാളിത്തം ശ്രദ്ധേയമായി. ഇന്ത്യയെ പ്രതിനിധീകരിച്ച് ബിഹാർ ഗവർണറുടെ നേതൃത്വത്തിലുള്ള സംഘമാണ് ചടങ്ങിൽ പങ്കെടുത്തത്.
മേഖലയിലെ മറ്റ് സൈനിക നീക്കങ്ങളിൽ, ഹോർമൂസ് കടലിടുക്കിലെ മൈനുകൾ നീക്കം ചെയ്യാനും ബ്രിട്ടനൊപ്പം ചേർന്ന് പാത തുറക്കാനും മുൻപ് വിന്യസിച്ചിരുന്ന പടക്കപ്പൽ വ്യൂഹം ഫ്രാൻസ് പെട്ടെന്ന് പിൻവലിച്ചു. ഇറാനിൽ ഇന്നുമുതലാണ് പൊതുജനങ്ങൾക്കായുള്ള വിലാപയാത്രയും മറ്റ് ചടങ്ങുകളും ആരംഭിച്ചത്. വൻ ജനപ്രവാഹമാണ് ടെഹ്റാനിലേക്ക് ഒഴുകിയെത്തുന്നത്.
