ഫോൺ നമ്പറുകൾ വെളിപ്പെടുത്താതെ യൂസർ നെയിം മാത്രം ഉപയോഗിച്ച് ചാറ്റ് ചെയ്യാൻ ഉപയോക്താക്കളെ അനുവദിക്കുന്ന വാട്സാപ്പിന്റെ പുതിയ ഫീച്ചർ കേന്ദ്ര സർക്കാർ പരിശോധനയ്ക്ക് വിധേയമാക്കുന്നു. ഈ സംവിധാനം ദുരുപയോഗം ചെയ്ത് ആൾമാറാട്ടവും മറ്റ് സൈബർ തട്ടിപ്പുകളും വർദ്ധിക്കാൻ സാധ്യതയുണ്ടെന്ന ആശങ്കയെത്തുടർന്നാണ് കേന്ദ്രത്തിന്റെ നടപടി. സുരക്ഷാ ഏജൻസികൾ ഈ ഫീച്ചറിനെ വളരെ ഗൗരവത്തോടെയാണ് നിരീക്ഷിക്കുന്നത്.
ഉപയോക്താക്കളുടെ സ്വകാര്യത ഉറപ്പാക്കാനാണ് ഈ ഫീച്ചർ അവതരിപ്പിച്ചതെന്ന് മെറ്റ വ്യക്തമാക്കുമ്പോൾ, ഇത് സാമ്പത്തിക തട്ടിപ്പുകൾക്കും മറ്റ് കുറ്റകൃത്യങ്ങൾക്കും വഴിവെച്ചേക്കാമെന്നാണ് സർക്കാരിന്റെ വിലയിരുത്തൽ. ഇന്ത്യയിൽ വാട്സാപ്പിന് 50 കോടിയിലധികം ഉപയോക്താക്കളുള്ളതിനാൽ പുതിയ മാറ്റം വലിയ തോതിൽ ബാധിക്കുമെന്നാണ് കണക്കുകൂട്ടൽ.
യൂസർ നെയിം സംവിധാനവുമായി ബന്ധപ്പെട്ട് സുരക്ഷാപരമായ എന്തെങ്കിലും ക്രമക്കേടുകൾ കണ്ടെത്തുകയാണെങ്കിൽ മെറ്റയ്ക്ക് ഔദ്യോഗികമായി നോട്ടീസ് അയക്കാനും സർക്കാർ ആലോചിക്കുന്നുണ്ട്. ഫോൺ നമ്പറുകൾക്ക് പകരമായി യൂസർ നെയിം ഉപയോഗിക്കാൻ അനുവദിക്കുന്ന പുതിയ ഫീച്ചർ അടുത്തിടെയാണ് വാട്സാപ്പ് പ്രഖ്യാപിച്ചത്.
