ടെഹ്റാൻ: ഹോർമൂസ് കടലിടുക്ക് ഗതാഗതത്തിനായി തുറന്നുകൊടുക്കുന്നതിൽ പരാജയപ്പെട്ടതോടെ, തോൽവി സമ്മതിക്കാതെ യുദ്ധം അവസാനിപ്പിക്കാനുള്ള വഴികളാണ് യു.എസ് പ്രസിഡന്റ് ഡോണൾഡ് ട്രംപ് തിരയുന്നതെന്ന് ടെഹ്റാനിലെ യൂണിവേഴ്സിറ്റി ഓഫ് അപ്ലൈഡ് സയൻസസിലെ പ്രൊഫസർ മോസ്തഫ ഖോഷ്ചെഷ്മം ‘അൽ ജസീറ’യോട് പറഞ്ഞു.
“യാഥാർത്ഥ്യത്തിൽ എന്ത് സംഭവിച്ചാലും താൻ പരാജയപ്പെട്ടുവെന്ന് ട്രംപ് ഒരിക്കലും സമ്മതിക്കില്ല,” ഖോഷ്ചെഷ്മം വ്യക്തമാക്കി. “വിജയം അവകാശപ്പെട്ടുകൊണ്ട് പുറത്തുകടക്കാനുള്ള വഴി കണ്ടെത്താൻ അദ്ദേഹം നിരന്തരം ശ്രമിക്കുന്നുണ്ടെങ്കിലും വീണ്ടും വീണ്ടും പരാജയപ്പെടുകയാണ്.”
“നിലവിൽ ഇറാന്റെ നിയന്ത്രണത്തിലുള്ള കോറിഡോറിലൂടെ മാത്രമാണ് കപ്പലുകൾക്ക് സഞ്ചരിക്കാൻ സാധിക്കുന്നത്. അതിനാൽ തന്നെ ഈ യുദ്ധത്തിൽ ട്രംപ് പരാജയപ്പെട്ടിട്ട് നാളുകളേറെയായി,” അദ്ദേഹം കൂട്ടിച്ചേർത്തു.
മേഖലയിലെ അമേരിക്കൻ എംബസികളുടെ പ്രവർത്തനം ചുരുക്കാൻ വാഷിംഗ്ടൺ നിർദ്ദേശം നൽകിയിട്ടുണ്ട്. വരുന്ന ആഴ്ചകളിലോ മാസങ്ങളിലോ ഇറാന് നേരെ വൻതോതിലുള്ള സൈനിക ആക്രമണം നടത്താനുള്ള യു.എസ് നീക്കത്തിന്റെ സൂചനയാണിതെന്നും ഖോഷ്ചെഷ്മം വിലയിരുത്തി.
