പെന്സില്വാനിയ: ഐഎസിനെ പിന്തുണച്ച് ആക്രമണത്തിന് പദ്ധതിയിട്ടെന്നാരോപിച്ച് പെന്സില്വാനിയ സ്വദേശിയായ 21കാരന് അറസ്റ്റില്. വലന്സിയ സ്വദേശിയായ ജൊനാഥന് ഹണ്ടര് ക്രാമറാണ് അറസ്റ്റിലായത്. ഐഎസുമായി ബന്ധമുണ്ടെന്ന് അവകാശപ്പെട്ടിരുന്ന ഇയാള് ഹംസ അല് റഷീദ് എന്ന പേരില് അറിയപ്പെട്ടിരുന്നതായും സ്ഫോടകവസ്തുക്കളുമായി ബന്ധപ്പെട്ട വിവരങ്ങള് മറ്റുള്ളവരുമായി പങ്കുവെക്കാമെന്ന് പറഞ്ഞിരുന്നതായും യുഎസ് നീതിന്യായ വകുപ്പ് അറിയിച്ചു.
2023 മുതല് ക്രാമര് എഫ്ബിഐയുടെ നിരീക്ഷണത്തിലായിരുന്നുവെന്നാണ് അധികൃതരുടെ വിശദീകരണം. കൂട്ടമരണത്തിന് ഇടയാക്കാവുന്ന ആക്രമണവുമായി ബന്ധപ്പെട്ട ഗൂഢാലോചനയിലും കുട്ടികളെ ലൈംഗികമായി ദുരുപയോഗം ചെയ്തതുമായി ബന്ധപ്പെട്ട ഉള്ളടക്കം കൈവശം വെച്ച കേസിലും ഇയാള്ക്കെതിരെ നേരത്തെ പെന്സില്വാനിയയില് നടപടി സ്വീകരിച്ചിരുന്നു. അടുത്തിടെ ലഭിച്ച വിവരത്തിന്റെ അടിസ്ഥാനത്തിലാണ് എഫ്ബിഐ വീണ്ടും അന്വേഷണം ശക്തമാക്കിയത്.
സെപ്റ്റംബര് 12ന് ക്രാമര് ഒരു റൈഡ്ഷെയര് വാഹനത്തില് കയറി ഡിസ്പോസബിള് ഫോണ് വാങ്ങാന് പോയതായി എഫ്ബിഐ ഉദ്യോഗസ്ഥര് നിരീക്ഷിച്ചു. തുടര്ന്ന് നീളമുള്ള കറുത്ത ബാഗുമായി മറ്റൊരാളെ കാണുകയും ഹോട്ടലില് പണം നല്കി മുറിയെടുക്കുകയും ചെയ്തതായി കോടതി രേഖകള് പറയുന്നു. പിന്നീട് സ്പോര്ട്സ് ഗുഡ്സ് സ്റ്റോറിലെ തോക്ക് കൗണ്ടറിലും ഇയാളെ കണ്ടതായി അധികൃതര് അറിയിച്ചു.
ഇയാളെ പിടികൂടുമ്പോള് ക്രാമറുടെ കൈവശത്തും ഹോട്ടല് മുറിയിലുമായി സെമിഓട്ടോമാറ്റിക് റൈഫിള്, അഞ്ച് റൈഫിള് മാഗസിനുകള്, ബൈപോഡ്, സ്കോപ്പ്, 190 റൗണ്ട് വെടിയുണ്ടകള്, പെപ്പര് സ്പ്രേ, ഏകദേശം 30 കത്തികള് എന്നിവ കണ്ടെത്തിയതായി നീതിന്യായ വകുപ്പ് അറിയിച്ചു. എന്നെ അന്വേഷിക്കരുത് എന്നര്ഥമുള്ള കൈയെഴുത്ത് കുറിപ്പും കണ്ടെത്തിയതായി കോടതി രേഖകളില് പറയുന്നു.
സെപ്റ്റംബര് 11 ആക്രമണത്തിന്റെ 25-ാം വാര്ഷികം അമേരിക്ക ആചരിക്കുന്നതിനിടെയാണ് ആക്രമണം തടഞ്ഞതെന്ന് യുഎസ് അറ്റോര്ണി ജനറല് ടോഡ് ബ്ലാഞ്ച് പറഞ്ഞു. എഫ്ബിഐ ഡയറക്ടര് കാഷ് പട്ടേലിന്റെ വാക്കുകളില്, ഐഎസിനെ പിന്തുണച്ചുള്ള അക്രമാസക്തമായ ആക്രമണത്തിനാണ് ക്രാമര് പദ്ധതിയിട്ടിരുന്നത്. ഓണ്ലൈനില് ഐഎസ് പ്രചാരണം പിന്തുടരുകയും ആക്രമണ പദ്ധതികള് രൂപപ്പെടുത്തുകയും ആയുധങ്ങള് സ്വന്തമാക്കുകയും ചെയ്തുവെന്നാണ് അന്വേഷണ ഉദ്യോഗസ്ഥരുടെ ആരോപണം.
21-year-old Pennsylvania man arrested for plotting attack in support of ISIS.
