കേപ് ബ്രെട്ടന്: കനത്ത മഴയും ശക്തമായ കാറ്റും നാശം വിതച്ചതിനു പിന്നാലെ കാനഡയിലെ കേപ് ബ്രെട്ടന് ദ്വീപില് വെള്ളപ്പൊക്കത്തില് തകര്ന്ന റോഡുകളുടെ സുരക്ഷയെക്കുറിച്ചുള്ള ആശങ്ക തുടരുന്നു. നോവ സ്കോഷ്യയുടെ വടക്കുകിഴക്കന് മേഖലയില് വെള്ളിയാഴ്ചയും ശനിയാഴ്ചയും പെയ്തിറങ്ങിയ മഴയെ തുടര്ന്ന് റിച്ച്മണ്ട്, ഇന്വര്നെസ്, വിക്ടോറിയ കൗണ്ടികളിലും പോര്ട്ട് ഹോക്സ്ബറി നഗരത്തിലും അടിയന്തരാവസ്ഥ പ്രഖ്യാപിച്ചിരുന്നു.
റിച്ച്മണ്ട് കൗണ്ടിയിലാണ് കാലാവസ്ഥ ഏറ്റവുംപ്രതികൂലമായി ബാധിച്ചത്. ശക്തമായ കാറ്റിനൊപ്പം ചില പ്രദേശങ്ങളില് മണിക്കൂറില് 200 മില്ലിമീറ്ററിലധികം മഴ ലഭിച്ചു. നിരവധി റോഡുകളില് മരങ്ങള് വീണു, വൈദ്യുതി ബന്ധം വ്യാപകമായി തടസ്സപ്പെട്ടു, തോടുകളും ഓടകളും കരകവിഞ്ഞു. റിവര് ബുര്ജ്വാ, വെസ്റ്റ് ബേ റോഡിലെ സെന്റ് ജോര്ജസ് ചാനല് തുടങ്ങിയ രണ്ട് പ്രദേശങ്ങള് റോഡ് ഒലിച്ചുപോയതിനെ തുടര്ന്ന് ഞായറാഴ്ചയും ഒറ്റപ്പെട്ട നിലയിലായിരുന്നു.
വെള്ളപ്പൊക്കത്തില് മുങ്ങിയ റോഡുകളും പാലങ്ങളും പുറമേനിന്ന് സുരക്ഷിതമായി തോന്നുന്നുണ്ടെങ്കിലും അവയുടെ അടിത്തറയ്ക്ക് കേടുപാടുകള് സംഭവിച്ചിട്ടുണ്ടോ എന്നതാണ് പ്രധാന ആശങ്കയെന്ന് അധികൃതര് പറഞ്ഞു. അടിയന്തര സേവനങ്ങള്ക്കുള്ള പ്രവേശനം ഉറപ്പാക്കുന്നതും റോഡുകളുടെ സുരക്ഷ പരിശോധിക്കുന്നതും മുന്ഗണനയാണെന്ന് ലാന്ഡ്രി വ്യക്തമാക്കി. ഇന്വര്നെസ് കൗണ്ടിയിലും നിരവധി റോഡുകളില് വെള്ളം കയറിയും മരങ്ങള് വീണും നാശനഷ്ടങ്ങളുണ്ടായി. വൈദ്യുതി ബന്ധം ഞായറാഴ്ചയോടെ ഭൂരിഭാഗവും പുനഃസ്ഥാപിച്ചെങ്കിലും റോഡുകളുടെ ഉറപ്പ് സംബന്ധിച്ച ആശങ്ക തുടരുകയാണെന്ന് വോര്ഡന് ബോണി മക്ഐസക് പറഞ്ഞു.
സംസ്ഥാന പൊതുമരാമത്ത് വകുപ്പിന്റെ കണക്കനുസരിച്ച് 120ലധികം റോഡുകള് വെള്ളപ്പൊക്കത്തെ തുടര്ന്ന് അടയ്ക്കുകയോ കേടുപാടുകള് സംഭവിക്കുകയോ ചെയ്തിരുന്നു. നിലവില് 54 റോഡുകള് അടച്ചിട്ടിരിക്കുകയാണ്. എട്ട് പാലങ്ങള്ക്കും കേടുപാടുകള് സംഭവിച്ചതായും ഇതില് രണ്ടെണ്ണം പൂര്ണമായി മാറ്റിസ്ഥാപിക്കേണ്ടിവരുമെന്നും അധികൃതര് അറിയിച്ചു. ശക്തമായ മഴയ്ക്കും കാറ്റിനും പിന്നാലെ ഉണ്ടായ നാശനഷ്ടത്തിന്റെ ആകെ തോത് ഇപ്പോഴും വിലയിരുത്തിവരികയാണ്.
വിക്ടോറിയ കൗണ്ടിയില് നാശനഷ്ടം താരതമ്യേന കുറവായതിനാല് ഞായറാഴ്ച വൈകിട്ടോടെ അടിയന്തരാവസ്ഥ പിന്വലിച്ചേക്കുമെന്ന് വോര്ഡന് ജാക്കി ഓര്ഗന് പറഞ്ഞു. പോര്ട്ട് ഹോക്സ്ബറിയിലും നാശനഷ്ടത്തിന്റെ പൂര്ണ തോത് വ്യക്തമാകാന് ദിവസങ്ങള് വേണ്ടിവരുമെന്നാണ് അധികൃതരുടെ വിലയിരുത്തല്. നഗരത്തിലെ ചില താഴ്ന്ന പ്രദേശങ്ങള് വെള്ളത്തില് മുങ്ങിയതായും പ്രിന്സ് സ്ട്രീറ്റില് മരം വീണ് റോഡിന് കേടുപാടുകള് സംഭവിച്ചതായും മേയര് ബ്രെന്ഡ ചിഷോം-ബീറ്റണ് അറിയിച്ചു. കനത്ത മഴയും ശക്തമായ കാറ്റും ചേര്ന്നുണ്ടാക്കിയ ദുരന്തത്തിന്റെ സാമ്പത്തിക ബാധ്യത വലുതായിരിക്കുമെന്നാണ് അധികൃതരുടെ പ്രാഥമിക വിലയിരുത്തല്.
Heavy rain and winds; extensive damage to roads in Cape Breton, Canada.
