വാഷിങ്ടൺ: അമേരിക്കയിലെ ടെക്സസ് സംസ്ഥാനത്ത് ഹൂസ്റ്റണിന് പുറത്തുള്ള ഷുഗർ ലാൻഡിലെ ശ്രീ അഷ്ടലക്ഷ്മി ക്ഷേത്രത്തിൽ നിർമ്മിച്ച 90 അടി ഉയരമുള്ള ഹനുമാൻ പ്രതിമയെച്ചൊല്ലി രൂക്ഷമായ തർക്കങ്ങളും രാഷ്ട്രീയ വിവാദങ്ങളും ഉടലെടുക്കുന്നു. ‘സ്റ്റാച്യൂ ഓഫ് യൂണിയൻ’ എന്ന് ഔദ്യോഗികമായി നാമകരണം ചെയ്യപ്പെട്ട ഈ പ്രതിമ ശക്തിയുടെയും ഭക്തിയുടെയും ഐക്യത്തിന്റെയും പ്രതീകമായാണ് പ്രാദേശിക ഹൈന്ദവ സംഘടനകൾ നിർമ്മിച്ചത്. എന്നാൽ ഇത് കുടിയേറ്റം, മതം, സംസ്കാരം എന്നിവയെച്ചൊല്ലി ടെക്സസിൽ നടക്കുന്ന വലിയ രാഷ്ട്രീയ തർക്കങ്ങളുടെ കേന്ദ്രബിന്ദുവായി മാറിയിരിക്കുകയാണ്. 2024 ഓഗസ്റ്റിൽ അനാച്ഛാദനം ചെയ്ത ഇത് അമേരിക്കയിലെ നാലാമത്തെ ഏറ്റവും ഉയരമുള്ള പ്രതിമയാണ്.
പ്രതിമ സ്ഥാപിച്ചതിന് പിന്നാലെ പ്രാദേശിക ക്രൈസ്തവ സഭകളും യാഥാസ്ഥിതിക രാഷ്ട്രീയക്കാരും എതിർപ്പുമായി രംഗത്തെത്തി. ഇത് ഒരു ക്രിസ്ത്യൻ രാഷ്ട്രത്തിന് ചേർന്നതല്ലെന്നും വ്യാജ ദൈവമാണെന്നും ആരോപിച്ച് ചിലർ പ്രതിഷേധം ഉയർത്തി. അന്യഗ്രഹത്തിൽ നിന്നുള്ളവർ ടെക്സസ് പിടിച്ചെടുക്കുന്നുവെന്നും, ‘കുരങ്ങൻ ദൈവത്തിന്റെ’ പ്രതിമയുള്ളപ്പോൾ ടെക്സസിനെ എങ്ങനെ ഗൗരവമായി കാണുമെന്നും ഉള്ള തരത്തിൽ വംശീയവും രാഷ്ട്രീയവുമായ അധിക്ഷേപങ്ങൾ സോഷ്യൽ മീഡിയ വഴി പ്രചരിച്ചു. കടുത്ത വംശീയ അധിക്ഷേപങ്ങൾക്കും പ്രചാരണങ്ങൾക്കും ഇടയിലും ക്ഷേത്ര അധികൃതർ എല്ലാ നിയമപരമായ അനുമതികളും വാങ്ങിയാണ് നിർമ്മാണം പൂർത്തിയാക്കിയതെന്ന് വ്യക്തമാക്കി.
ഹൈദരാബാദിലെ സമത്വ പ്രതിമ വിഭാവനം ചെയ്ത ശ്രീ ചിന്ന ജീയാർ സ്വാമിയുടെ ആശയത്തിൽ നിന്നാണ് ഈ പ്രതിമ നിർമ്മിക്കപ്പെട്ടത്. രാമായണത്തിൽ രാമനെയും സീതയെയും ഒന്നാക്കാൻ സഹായിച്ച ഹനുമാൻ പാലങ്ങൾ പണിയുന്നവനും ഐക്യത്തിന്റെ പ്രതീകവുമാണെന്ന സങ്കൽപ്പത്തിലാണ് പ്രതിമയ്ക്ക് ‘സ്റ്റാച്യൂ ഓഫ് യൂണിയൻ’ എന്ന് പേരിട്ടത്. ഇന്ത്യൻ ശില്പികൾ നിർമ്മിച്ച് കഷണങ്ങളായി അമേരിക്കയിലെത്തിച്ച പ്രതിമ ഏകദേശം 8 ദശലക്ഷം ഡോളർ ചെലവഴിച്ചാണ് നിർമ്മിച്ചത്. മണിക്കൂറിൽ 180 മൈൽ വേഗതയിലടിക്കുന്ന ചുഴലിക്കാറ്റുകളെ അതിജീവിക്കാൻ തക്കവണ്ണമാണ് ഇതിന്റെ എഞ്ചിനീയറിംഗ് രൂപകൽപ്പന.
ടെക്സസ് ഇന്ത്യയായി മാറുന്നു എന്നതിനേക്കാൾ തങ്ങൾ ടെക്സസിന്റെ ഭാഗമാണെന്ന സന്ദേശമാണ് ഈ പ്രതിമ നൽകുന്നതെന്ന് ഇന്ത്യൻ-അമേരിക്കൻ സമൂഹ നേതാക്കൾ വ്യക്തമാക്കുന്നു. മുൻ യു.എസ് പ്രസിഡന്റ് ബരാക് ഒബാമ തന്റെ പോക്കറ്റിൽ ഹനുമാന്റെ ചെറിയ രൂപം സൂക്ഷിച്ചിരുന്നതും, സ്റ്റീവ് ജോബ്സ്, മാർക്ക് സക്കർബർഗ് തുടങ്ങിയവർ ആരാധിച്ചിരുന്ന നീം കരോളി ബാബയുടെ അമേരിക്കൻ അനുയായികൾ കാലങ്ങളായി ഹനുമാൻ ഭക്തി പുലർത്തുന്നതും ചൂണ്ടിക്കാണിക്കപ്പെടുന്നു. അതേസമയം ടെക്സസ് ഗവർണർ ഗ്രെഗ് ആബട്ട് ഇന്ത്യൻ സമൂഹത്തിന് പൂർണ പിന്തുണ പ്രഖ്യാപിക്കുമ്പോഴും പ്രതിമയെച്ചൊല്ലിയുള്ള വിവാദങ്ങൾ അടങ്ങാതെ തുടരുകയാണ്.
