പശ്ചിമ ബംഗാളിലെ നന്ദിഗ്രാം നിയമസഭാ ഉപതിരഞ്ഞെടുപ്പിൽ കോൺഗ്രസ് സ്ഥാനാർത്ഥി മിലൻ പ്രധാനിന് പിന്തുണ പ്രഖ്യാപിച്ച് തൃണമൂൽ നേതാവ് മമത ബാനർജി. രണ്ടായി വിഘടിച്ച തൃണമൂൽ കോൺഗ്രസിലെ മമത വിഭാഗം നിർത്തിയ സ്ഥാനാർത്ഥി സഞ്ജിത പ്രധാൻ ദേ അപ്രതീക്ഷിതമായി നാമനിർദേശപ്പത്രിക പിൻവലിച്ചതോടെയാണ് പുതിയ ബദൽനീക്കം. അടുത്ത മാസം ആറിന് നടക്കുന്ന ഉപതിരഞ്ഞെടുപ്പിൽ തന്റെ പാർട്ടി മത്സരിക്കില്ലെന്നും ബി.ജെ.പിയെ പുറത്താക്കാൻ കോൺഗ്രസ് സ്ഥാനാർത്ഥിയെ പിന്തുണയ്ക്കുമെന്നും മമത അറിയിച്ചു. കേന്ദ്രസർക്കാരിനെതിരെ പ്രതിപക്ഷ നിരയിൽ ശക്തമായ ഐക്യമുണ്ടെന്ന സന്ദേശം നൽകാനാണ് ഈ നടപടിയെന്നും രാഹുൽ ഗാന്ധിയുമായി വിഷയം സംസാരിച്ചിരുന്നതായും മമത വ്യക്തമാക്കി.
ബംഗാൾ മുഖ്യമന്ത്രിയും ബി.ജെ.പി. നേതാവുമായ സുവേന്ദു അധികാരിയുമായി കൂടിക്കാഴ്ച നടത്തിയതിന് പിന്നാലെയാണ് മമതയുടെ സ്ഥാനാർത്ഥിയായ സഞ്ജിത പ്രധാൻ പത്രിക പിൻവലിച്ചത്. നാമനിർദേശപ്പത്രിക സമർപ്പിക്കാനുള്ള സമയം അവസാനിച്ചതിനാൽ പുതിയൊരു സ്ഥാനാർത്ഥിയെ നിർത്താൻ മമതയ്ക്ക് സാധിച്ചില്ല. ദേശീയതലത്തിൽ ഇന്ത്യ സഖ്യത്തിലാണെങ്കിലും ബംഗാളിൽ തൃണമൂലും കോൺഗ്രസും വെവ്വേറെയാണ് മത്സരിക്കുന്നത്. നന്ദിഗ്രാമിൽ കോൺഗ്രസിനെ പിന്തുണയ്ക്കുമ്പോഴും ഉപതിരഞ്ഞെടുപ്പ് നടക്കുന്ന മറ്റൊരു മണ്ഡലമായ റജിനഗറിൽ മമതയുടെ സ്ഥാനാർത്ഥി റബീഉൽ ആലം ചൗധരിയും കോൺഗ്രസ് സ്ഥാനാർത്ഥി മുഹമ്മദ് അബ്ദുള്ളാഹിൽ കാഫിയും തമ്മിൽ നേരിട്ടാണ് പോരാട്ടം.
കഴിഞ്ഞ നിയമസഭാ തിരഞ്ഞെടുപ്പിൽ രണ്ട് മണ്ഡലങ്ങളിൽ നിന്ന് ജയിച്ചവർ ഒരു സീറ്റ് രാജിവെച്ചതാണ് നന്ദിഗ്രാമിലും റജി നഗറിലും ഉപതിരഞ്ഞെടുപ്പിന് കളമൊരുക്കിയത്. നന്ദിഗ്രാമിലും ഭവാനിപൂരിലും വിജയിച്ച മുഖ്യമന്ത്രി സുവേന്ദു അധികാരി ഭവാനിപൂർ നിലനിർത്താൻ തീരുമാനിച്ചതോടെയാണ് നന്ദിഗ്രാം ഒഴിവന്നത്. എ.ജെ.യു.പി. നേതാവ് ഹുമയൂൺ കബീർ ഗൗഡ നിലനിർത്തി റജി നഗർ രാജിവെക്കുകയായിരുന്നു. തൃണമൂൽ കോൺഗ്രസ് മമത ബാനർജി പക്ഷമെന്നും ഋതബ്രത ബാനർജി പക്ഷമെന്നും പിളർന്നുനിൽക്കുന്ന പശ്ചാത്തലത്തിലാണ് ഈ ഉപതിരഞ്ഞെടുപ്പ് നടക്കുന്നത്.
പാർട്ടി പിളർപ്പിന് പിന്നാലെ തൃണമൂലിന്റെ ഔദ്യോഗിക പേരും ‘പൂക്കളും പുല്ലും’ ചിഹ്നവും ഉപയോഗിക്കുന്നതിൽ നിന്ന് ഇരുവിഭാഗങ്ങളെയും തിരഞ്ഞെടുപ്പ് കമ്മിഷൻ വിലക്കിയിരുന്നു. തുടർന്ന് മമത വിഭാഗത്തിന് ‘മമത ഓൾ ഇന്ത്യ തൃണമൂൽ കോൺഗ്രസ്’ എന്ന പേരും ‘ഫുട്ബോൾ താരം’ ചിഹ്നവും അനുവദിച്ചു. ഋതബ്രത വിഭാഗത്തിന് ‘ഡെമക്രാറ്റിക് തൃണമൂൽ കോൺഗ്രസ്’ എന്ന പേരും ‘കവർ’ ചിഹ്നവുമാണ് നൽകിയിട്ടുള്ളത്. ഇരുവിഭാഗങ്ങൾക്കും പശ്ചിമ ബംഗാൾ, മേഘാലയ, ത്രിപുര എന്നിവിടങ്ങളിൽ അംഗീകൃത രാഷ്ട്രീയ പാർട്ടിയായി പ്രവർത്തിക്കാൻ അനുമതിയുണ്ട്.
