ഇന്ത്യൻ പൗരത്വം നേടുന്നതിന് മുൻപ് വോട്ടർപട്ടികയിൽ പേര് ചേർത്തെന്ന പരാതിയിൽ വിചാരണ നടപടികൾ തടഞ്ഞ കീഴ്ക്കോടതി ഉത്തരവ് റദ്ദാക്കിക്കൊണ്ട് ദില്ലി ദ്വാരക ജില്ലാ കോടതിയുടെ നിർണ്ണായക വിധി. ജുഡീഷ്യൽ മജിസ്ട്രേറ്റ് കോടതിയുടെ മുൻ ഉത്തരവ് തികച്ചും നിയമവിരുദ്ധവും യുക്തിരഹിതവുമാണെന്ന് നിരീക്ഷിച്ചാണ് ജില്ലാ കോടതി ഉത്തരവ് റദ്ദാക്കിയത്. മുതിർന്ന കോൺഗ്രസ് നേതാവ് സോണിയ ഗാന്ധിക്ക് വലിയ തിരിച്ചടിയാകുന്നതാണ് ഈ തീരുമാനം. കേസിൽ ഇരുവിഭാഗത്തിന്റെയും വാദം വീണ്ടും കേട്ട് നിയമനടപടികളുമായി മുന്നോട്ടുപോകാൻ മജിസ്ട്രേറ്റ് കോടതിയോട് നിർദ്ദേശിച്ച ജില്ലാ കോടതി, കേസ് വീണ്ടും പരിഗണിക്കുന്നതിനായി ഈ മാസം 29-ലേക്ക് മാറ്റിയിട്ടുമുണ്ട്.
1983-ലാണ് സോണിയ ഗാന്ധിക്ക് ഔദ്യോഗികമായി ഇന്ത്യൻ പൗരത്വം ലഭിക്കുന്നത്. എന്നാൽ പൗരത്വം ലഭിക്കുന്നതിന് മൂന്ന് വർഷം മുൻപ്, അതായത് 1980-ൽ തന്നെ വ്യാജരേഖകൾ ചമച്ച് അവർ ദില്ലിയിലെ വോട്ടർപട്ടികയിൽ അനധികൃതമായി പേര് ഉൾപ്പെടുത്തിയെന്നാണ് ഹർജിയിലെ പ്രധാന ആരോപണം. ഇത്തരത്തിൽ വ്യാജ തെളിവുകൾ ഉണ്ടാക്കി വോട്ടർപട്ടികയിൽ പേര് ചേർത്തത് ക്രിമിനൽ കുറ്റമാണെന്നും സോണിയ ഗാന്ധിക്കെതിരെ കടുത്ത വിചാരണ നടപടികൾ സ്വീകരിക്കണമെന്നും ആവശ്യപ്പെട്ട് വികാസ് ത്രിപാഠി എന്നയാളാണ് നീതിപീഠത്തെ സമീപിച്ചത്.
നേരത്തെ ഈ ഹർജിയിൽ ക്രിമിനൽ വിചാരണ നടപടികൾ ആരംഭിക്കുന്നത് തടഞ്ഞുകൊണ്ട് മജിസ്ട്രേറ്റ് കോടതി ഉത്തരവിട്ടിരുന്നു. എന്നാൽ ഈ ഉത്തരവിനെ ചോദ്യം ചെയ്തുകൊണ്ട് സമർപ്പിച്ച ഹർജിയിലാണ് ഇപ്പോൾ ജില്ലാ കോടതിയുടെ നിർണ്ണായക ഇടപെടൽ ഉണ്ടായിരിക്കുന്നത്. കേസിൽ കൃത്യമായ തെളിവുകളുടെ അടിസ്ഥാനത്തിൽ പുനർവാദം കേൾക്കണമെന്നും നിയമപരമായ തുടർനടപടികൾ സ്വീകരിക്കണമെന്നും ജില്ലാ കോടതി വ്യക്തമാക്കിയതോടെ സോണിയ ഗാന്ധിക്കെതിരെയുള്ള നിയമപോരാട്ടം കൂടുതൽ ശക്തമായ ഘട്ടത്തിലേക്ക് കടക്കുകയാണ്.
