മന്ത്രി കെ.എം. ഷാജി അനുമതിയില്ലാതെ ചെക്ക് റിപ്പബ്ലിക്കിലെ പ്രാഗിലേക്ക് നടത്തിയ വിവാദ യാത്രയിൽ കേന്ദ്ര സർക്കാർ അന്വേഷണം പ്രഖ്യാപിച്ചു. യാത്രയുടെ പ്രാഥമിക വിവരങ്ങൾ കേന്ദ്ര രഹസ്യാന്വേഷണ വിഭാഗം ശേഖരിച്ചുതുടങ്ങിയിട്ടുണ്ട്. കെ.എം. ഷാജിയുടെ യാത്രാ ഉദ്ദേശ്യവും, യാത്രയിൽ ക്രിമിനൽ കേസിലെ പ്രതികളുടെ സാന്നിധ്യമുണ്ടായിരുന്നോ എന്നതുമാണ് രഹസ്യാന്വേഷണ വിഭാഗം പ്രധാനമായി പരിശോധിക്കുന്നത്.
സർക്കാർ അനുമതിയില്ലാതെയാണ് മന്ത്രി കെ.എം. ഷാജി പ്രാഗിൽ സന്ദർശനം നടത്തിയതെന്നും, അദ്ദേഹം ഒന്നിലധികം ദിവസങ്ങൾ അവിടെ ചെലവഴിച്ചതായും സൂചനയുണ്ട്. സെപ്റ്റംബർ 16 മുതൽ 26 വരെയായിരുന്നു യൂറോപ്യൻ രാജ്യങ്ങളിലേക്കുള്ള മന്ത്രിയുടെ ഔദ്യോഗിക യാത്ര. ഓസ്ട്രിയ, ബൾഗേറിയ, സ്വിറ്റ്സർലന്റ്, യു.എ.ഇ. എന്നീ നാല് രാജ്യങ്ങളിൽ യാത്ര ചെയ്യാൻ മാത്രമാണ് അദ്ദേഹത്തിന് അനുമതി ലഭിച്ചിരുന്നത്. എന്നാൽ കേന്ദ്ര-സംസ്ഥാന സർക്കാരുകളുടെ ഔദ്യോഗിക അനുമതിയില്ലാതെയാണ് അദ്ദേഹം പ്രാഗ് സന്ദർശിച്ചത് എന്ന് സാമൂഹിക മാധ്യമങ്ങളിലെ വ്യത്യസ്ത ദിവസങ്ങളിലെ ചിത്രങ്ങൾ വ്യക്തമാക്കുന്നു.
കെ.എം. ഷാജിയുടെ ചെക്ക് റിപ്പബ്ലിക് യാത്ര സംബന്ധിച്ച് പുറത്തുവരുന്ന വിവരങ്ങൾ അതീവ ഗൗരവമുള്ളതാണെന്ന് മുൻ മന്ത്രി പി. രാജീവ് ആരോപിച്ചു. മറ്റേതൊക്കെ മന്ത്രിമാരാണ് ഇത്തരത്തിൽ അനുമതി വാങ്ങിയും വാങ്ങാതെയുമുള്ള യാത്രകൾ നടത്തിയതെന്ന് ഇനി പുറത്തുവരാനുണ്ടെന്നും അദ്ദേഹം പരിഹസിച്ചു. ഏത് വണ്ടിയിലും സഞ്ചരിക്കാമെന്നും താൻ സഞ്ചരിക്കുന്നതാണ് മന്ത്രിയുടെ വാഹനം എന്നാണല്ലോ മന്ത്രി പറയുന്നതെന്നും, സ്വാഭാവികമായും താൻ പോകുന്നിടത്തെല്ലാം അനുമതി കിട്ടും എന്നായിരിക്കും മന്ത്രി ധരിച്ചിട്ടുണ്ടാവുകയെന്നും പി. രാജീവ് കുറ്റപ്പെടുത്തി.
