നാഷ്‌വിൽ: ടെന്നസിയിലെ ജയിലിൽ നിന്ന് ജീവപര്യന്തം തടവശിക്ഷ വിധിച്ച കൊലക്കേസ് പ്രതി ചാടിപ്പോയി. ഞായറാഴ്ച രാത്രി ജയിൽ വേലി ചാടിക്കടന്ന് രക്ഷപ്പെട്ട 28 കാരനായ ജേക്കബ് മോർലെ എന്ന പ്രതിക്കായി അധികൃതർ അന്വേഷണം ഊർജ്ജിതമാക്കി. ജയിലിൽ നിന്ന് രക്ഷപ്പെട്ടതിന് പിന്നാലെ ഇയാൾ ഒരു വാഹനം മോഷ്ടിച്ച് കടന്നുകളയുകയായിരുന്നു.
ടെന്നസി ബ്യൂറോ ഓഫ് ഇൻവെസ്റ്റിഗേഷന്റെ ‘മോസ്റ്റ് വാണ്ടഡ്’ പട്ടികയിൽ ഉൾപ്പെടുത്തിയിട്ടുള്ള പ്രതിയെക്കുറിച്ച് വിവരം നൽകുന്നവർക്ക് 2,500 ഡോളർ വരെ പാരിതോഷികം പ്രഖ്യാപിച്ചിട്ടുണ്ട്. ഒക്ടോബർ 26-ന് പുലർച്ചെ 1 മണിയോടെ ടെന്നസി രജിസ്ട്രേഷനുള്ള വെള്ള നിറത്തിലുള്ള 2008 ഫോർഡ് എഫ്-350 ട്രക്ക് മോർലെ മോഷ്ടിച്ചതായി അന്വേഷണ ഏജൻസി വ്യക്തമാക്കി. നോർത്ത് വെസ്റ്റ് കറക്ഷണൽ കോംപ്ലക്സിൽ നിന്ന് ഏകദേശം 15 മൈൽ അകലെയുള്ള ഹോൺബീക്ക് ഫയർ ഡിപ്പാർട്ട്മെന്റിന്റെ സിസിടിവി ദൃശ്യങ്ങളിൽ മോഷ്ടിച്ച ട്രക്കുമായി പ്രതി കടന്നുപോകുന്നത് പതിഞ്ഞിട്ടുണ്ട്.
ഞായറാഴ്ച രാത്രി 11:30 ഓടെയാണ് തടവുകാരനായ മോർലെയെ കാണാനില്ലെന്ന വിവരം നോർത്ത് വെസ്റ്റ് കറക്ഷണൽ കോംപ്ലക്സ് അധികൃതർ അറിയുന്നത്. ജയിൽ യൂണിഫോം ധരിച്ചുകൊണ്ട് പ്രതി സുരക്ഷാ വേലി തകർത്ത് പുറത്തു കടക്കുകയായിരുന്നുവെന്ന് സുരക്ഷാ ക്യാമറ ദൃശ്യങ്ങളിൽ വ്യക്തമായതായി അധികൃതർ പറഞ്ഞു. എന്നാൽ വേലി എങ്ങനെയാണ് ഇയാൾ മറികടന്നത് എന്ന കാര്യത്തിൽ വ്യക്തത വന്നിട്ടില്ല. കഴിഞ്ഞ ഒരു ആഴ്ചയ്ക്കിടെ ടെന്നസി ജയിൽ വകുപ്പിന്റെ കസ്റ്റഡിയിൽ നിന്ന് രക്ഷപ്പെടുന്ന രണ്ടാമത്തെ തടവുകാരനാണ് മോർലെ.
ഒന്നാം ഡിഗ്രി കൊലപാതകം, കവർച്ച, തെളിവ് നശിപ്പിക്കൽ, അറസ്റ്റിൽ നിന്ന് ഒളിച്ചോടൽ തുടങ്ങിയ കുറ്റകൃത്യങ്ങളിലാണ് ഇയാൾക്ക് ജീവപര്യന്തം തടവുശിക്ഷ ലഭിച്ചത്. 2022 ഫെബ്രുവരിയിൽ കാണാതായ കോഡി ബിർച്ച്ഫീൽഡ് എന്നയാളെ കൊലപ്പെടുത്തിയ കേസിലാണ് മോർലെ ശിക്ഷിക്കപ്പെട്ടത്. കാണാതായി ആഴ്ചകൾക്ക് ശേഷം ബിർച്ച്ഫീൽഡിന്റെ മൃതദേഹം മോർലെയുടെ വീടിന് താഴെയുള്ള പെട്ടിയിൽ നിന്നാണ് കണ്ടെടുത്തത്. കഴിഞ്ഞ ഒരു ആഴ്ചയ്ക്കുള്ളിൽ ടെന്നസിയിലെ വിവിധ ജയിലുകളിൽ നിന്ന് തടവുകാർ ചാടിപ്പോകുന്ന സംഭവങ്ങൾ വർദ്ധിച്ചുവരുന്നത് അധികൃതരെയും ആശങ്കപ്പെടുത്തുന്നുണ്ട്.
