വാഷിംഗ്ടണ്‍ ഡിസി: രാജ്യങ്ങളുടെയും ഭാഷകളുടെയും മതങ്ങളുടെയും അതിര്‍വര മ്പുകള്‍ക്കപ്പുറം മനുഷ്യരാശിയെ സമാധാനത്തിന്റെയും സ്‌നേഹത്തിന്റെയും വിശ്വസാഹോദര്യത്തിന്റെയും സന്ദേശത്തില്‍ ഒന്നിപ്പിച്ച് സംഘടിപ്പിച്ച ആഗോള ദൈവദശക പ്രാര്‍ത്ഥനാ യജ്ഞം ചരിത്രവിജയമായി. ശ്രീനാരായണ ഗുരുദേവന്‍ രചിച്ച ‘ദൈവദശകം’ ലോകമെമ്പാടുമുള്ള ജനങ്ങള്‍ ഒരേസമയം ആലപിച്ച ഈ മഹാസംഗമത്തില്‍, 50-ഓളം രാജ്യങ്ങളില്‍ നിന്നായി 40 ലക്ഷത്തിലധികം പേര്‍ പങ്കെടുത്തു.
ഈ ചരിത്രനിമിഷത്തിന്റെ ഭാഗമായി ശ്രീനാരായണ മിഷന്‍ സെന്റര്‍ (SNMC) വാഷിംഗ്ടണ്‍ ഡിസിയും പ്രാര്‍ത്ഥനാഗീതം ആലപിച്ച് പങ്കാളികളായി. അമേരിക്കയിലെ ഗ്രേറ്റര്‍ വാഷിംഗ്ടണ്‍ ഡിസി മേഖലയില്‍ ശ്രീനാരായണ ഗുരുദേവന്റെ ദര്‍ശനങ്ങളും സന്ദേശങ്ങളും പ്രചരിപ്പിക്കുന്നതിനും, ജീവകാരുണ്യ സാംസ്‌കാരിക പ്രവര്‍ത്തനങ്ങള്‍ ഏകോപിപ്പിക്കുന്നതിനും മുന്‍പന്തിയില്‍ നില്‍ക്കുന്ന സംഘടനയാണ് SNMC. ഗുരുദേവദര്‍ശനങ്ങള്‍ അടുത്ത തലമുറയിലേക്ക് പകരുന്നതിനൊപ്പം, കൂട്ടായ്മയുടെയും സഹവര്‍ത്തിത്വത്തിന്റെയും പ്രകാശമാണ് ഈ സംഘടന പകരുന്നത് .
2026 ഒക്ടോബര്‍ 25 ഞായറാഴ്ച, ഇന്ത്യന്‍ സമയം രാത്രി 7:15-നായിരുന്നു ലോകത്തിന്റെ വിവിധ കോണുകളില്‍ ഒരേസമയത്ത് പ്രാര്‍ത്ഥനാ സ്വരങ്ങള്‍ ഉയര്‍ന്നത്. ഇന്ത്യയിലെ 18 സംസ്ഥാനങ്ങള്‍ക്ക് പുറമേ യൂറോപ്പ്, അമേരിക്ക, ഏഷ്യ, ഗള്‍ഫ് മേഖലകള്‍ ഉള്‍പ്പെടെയുള്ള വിവിധ രാജ്യങ്ങളിലെ ഗുരുമന്ദിരങ്ങളിലും ആശ്രമങ്ങളിലും സംഘടനാ കേന്ദ്രങ്ങളിലും പൊതുവേദികളിലും കുടുംബസംഗമങ്ങളിലും വിശ്വാസികളും ഗുരുദര്‍ശന സ്‌നേഹികളും ഒത്തുചേര്‍ന്നു.
യുദ്ധങ്ങളും സംഘര്‍ഷങ്ങളും മതവിദ്വേഷവും സാമൂഹിക വിഭജനങ്ങളും കടുത്ത വെല്ലുവിളിയുയര്‍ത്തുന്ന ആധുനിക കാലഘട്ടത്തില്‍, സമാധാനത്തിന്റെയും ഐക്യത്തിന്റെയും പ്രകാശമേകുകയെന്ന ലക്ഷ്യത്തോടെയാണ് ‘ഒരു ലോകം, ഒരു പ്രാര്‍ത്ഥന’ എന്ന ആശയത്തില്‍ ഈ ആഗോള സംരംഭം സംഘടിപ്പിച്ചത്.
ജര്‍മ്മനി ആസ്ഥാനമായി പ്രവര്‍ത്തിക്കുന്ന ‘ശ്രീനാരായണ ഫോറം ഫോര്‍ യൂണിവേഴ്‌സല്‍ ബ്രദര്‍ഹുഡി’ന്റെ (Sree Narayana Forum for Universal Brotherhood) സ്ഥാപക ചെയര്‍മാന്‍ ഡോ. വരുണ്‍ രാധാകൃഷ്ണന്റെ നേതൃത്വത്തിലാണ് ലോകവ്യാപകമായ ഈ പ്രാര്‍ത്ഥനാ കൂട്ടായ്മ യാഥാര്‍ഥ്യമായത്. എസ്.എന്‍.ഡി.പി. യോഗം ഉള്‍പ്പെടെയുള്ള പ്രമുഖ ശ്രീനാരായണ പ്രസ്ഥാനങ്ങളുടെയും വിവിധ രാജ്യങ്ങളിലെ ആത്മീയ, സാംസ്‌കാരിക, സാമൂഹിക സംഘടനകളുടെയും പൂര്‍ണ്ണ സഹകരണത്തോടെയായിരുന്നു സംഘാടനം.
മലയാളത്തില്‍ രചിക്കപ്പെട്ട ദൈവദശകം തമിഴ്, കന്നഡ, ഹിന്ദി, ഇംഗ്ലീഷ്, ജര്‍മ്മന്‍ തുടങ്ങിയ ഭാഷകളിലും ആലപിക്കപ്പെട്ടു. ഭാഷാ വ്യത്യാസങ്ങള്‍ക്കപ്പുറം ഒരേ പ്രാര്‍ത്ഥനയുടെ ആശയവും മനുഷ്യസ്‌നേഹത്തിന്റെ സന്ദേശവും പങ്കുവെക്കാന്‍ ഈ കൂട്ടായ്മയ്ക്ക് സാധിച്ചു.
1914-ല്‍ ശ്രീനാരായണ ഗുരുദേവന്‍ ആലുവയിലെ സംസ്‌കൃതപാഠശാലയിലെ വിദ്യാര്‍ഥികള്‍ക്കായി രചിച്ച പത്ത് ശ്ലോകങ്ങളടങ്ങിയ ‘ദൈവദശകം’, ഉന്നതമായ ആത്മീയദര്‍ശനം അവതരിപ്പിക്കുന്ന പ്രാര്‍ത്ഥനാഗീതമാണ്. കാലാന്തരത്തില്‍ ഇത് ലോകമെമ്പാടുമുള്ള ആത്മീയാന്വേഷകരുടെയും പ്രിയപ്പെട്ട പ്രാര്‍ത്ഥനയായി മാറി.
”ദൈവമേ! കാത്തുകൊള്‍കങ്ങു, കൈവിടാതിങ്ങു ഞങ്ങളെ…” എന്ന പ്രാര്‍ത്ഥനയില്‍ തെളിയുന്നത് വ്യക്തിയുടെ മാത്രം നന്മയല്ല; മറിച്ച്, സമസ്ത ജീവജാലങ്ങളുടെയും ക്ഷേമം ആഗ്രഹിക്കുന്ന വിശാലമായ മാനവികബോധമാണ്. ജാതി, മത, ദേശ വ്യത്യാസങ്ങള്‍ക്കപ്പുറം മനുഷ്യന്റെ അന്തസ്സിനെയും സഹവര്‍ത്തിത്വത്തെയും ഉയര്‍ത്തിപ്പിടിച്ച ഗുരുദേവദര്‍ശനം ഇന്നത്തെ ലോകത്തിന് എത്രത്തോളം പ്രസക്തമാണെന്ന് ഈ ആഗോള കൂട്ടായ്മ വീണ്ടും ഓര്‍മിപ്പിച്ചു.
മനുഷ്യരെ വേര്‍തിരിക്കുന്ന അതിരുകളേക്കാള്‍ ശക്തമാണ് അവരെ ഒന്നിപ്പിക്കുന്ന സ്‌നേഹത്തിന്റെയും സാഹോദര്യത്തിന്റെയും സന്ദേശമെന്ന വലിയ സന്ദേശം നല്‍കിക്കൊണ്ടാണ് 2026 ഒക്ടോബര്‍ 25-ലെ ആഗോള ദൈവദശക പ്രാര്‍ത്ഥനാ സംഗമം ചരിത്രത്തില്‍ രേഖപ്പെടുത്തപ്പെട്ടത്.
വിഡിയോ കാണാന്‍ താഴെ കാണുന്ന യുട്യൂബ് ലിങ്കില്‍ ക്ലിക്കുചെയ്യുക
https://www.youtube.com/watch?v=CsPb-_3RwEU
വാര്‍ത്ത: സന്ദീപ് പണിക്കല്‍
SNMC Washington DC participated in the global ‘Daivadasakam’ prayer gathering.
